In Hamborg gifft dat opstünns den 14. Extremwedderkongress. Goot 700 Fachlüüd tuuscht sik över böös hitte Temperaturen un Extremwedder ok hier in Düütschland ut. De Minschen mööt sik an Hitten över längere Tieden oder Starkregen wennen, so de Fachlüüd. Se meent, dat in de Scholen un in de Medien mehr Weten över dat Klima vermiddelt warrn mutt. Morgen geiht de Extremwedderkongress denn toennn.
Na dat de Bunnsvörstand vun de Grönen den Hoot nahmen hett, treckt nu ok de Bunnsvörstand vun de Gröne Jöögd torüch. De teihn Lüüd ut den Vörstand sünd nich tofreden mit ehr Partei un verlaat ehr nu. Se wüllt en egen linke Bewegen grünnen. Dat bruukt en polietsche Kraft, de sik dorför insett, de Weertschop in den Deenst vun de Minschen to stellen. Al güstern harrn de Hamborger Grönen düütlich maakt, dat se den Hoot treckt vör Ricarda Lang un Omid Nouripour, wieldat se instaht för de lege Laag vun de Partei.
De Hamborger Polizei hett güstern en Lagerhall in Rodenborgsoort stöörmt. De Insatzkräft, de mit swore Wapen utstaffeert weren, hebbt dat Flach vun en Firma un en Laster dörsöcht. Dat Fohrtüüch harr en Seecontainer oplaadt. Mag ween un in de Straat Mühlenhagen is en Slag gegen den organiseerten Drogenhannel glückt. Bi den Insatz sünd teihn Lüüd fastnahmen worrn, de se op’n Kieker hebbt, dormang ok de Fohrer vun den Laster.
Vun hüüt af an öövt de Bunnswehr för dree Daag lang, den Hamborger Haven to verdeffenderen. Dorachter stickt de russ’sche Krieg gegen de Ukrain un de Sorg vör en neegsten Angreep in Europa. Öven doot se, woans de Hamborger Haven bruukt warrn kann, üm Truppen vun hier na dor to verleggen. De Havenbedrief löppt man normal wieder. De Öven vun de Bunnswehr hett den Naam „Red Storm Alpha“.
De Hamborger Verkehrsverbund kontrolleert vundaag in de hele Metropolregion de Fohrschiens. Sünnerlich an de Hooltsteden sünd 300 Lüüd ünnerwegens, de de Fohrkoorten nakieken doot. Dat weer vöraf künnig maakt worrn, so dat ok jeedeen vundaag en Fohrschien köfft. Dör dat Swattfohren hett de HVV Johr för Johr en Schaden vun goot 40 Millionen Euro.
De Freehaven-Elv-Brüch is för Fohrtüüch, de mehr as 7,5 Tünnen wegen doot, sparrt. Dat gellt vun vundaag af an, fastleggt hett dat de Hamborg Port Authority. Dat steiht nich goot üm de meist hunnert Johr ole Brüch, so de HPA. Opletzt weer in’n Januor 2022 över de Brüch bericht worrn: En Kaptein, de duun weer, harr de Brüch mit sien Baggerschipp rammt.
Vundaag hebbt de Wulken de Bavenhand un dat gifft ornlich wat Natts vun baven. An’n Namiddag waagt sik ok de Sünn mal rut, man an’n Avend warrt dat denn wedder natt. De Temperaturen klattert op 18 bet 19 Graad. Opstünns sünd dat 14 Graad in de Havencity. Morgen wesselt sik Wulken un ok en beten Sünn af. Bi 15 bet 16 Graad warrt dat ornlich puustig.
