De Köhlbrandbrüüch, de is marood. Dorüm gellt dor vun hüüt af an Tempo 50 op de ganze Brüüch. Dormit schall sekerstellt warrn, dat se noch so lang bruukt warrn kann, bet dat en ne’e Brüüch geven deit. Al vöraf geev an op Afsneden vun de Köhlbrandbrüüch en Tempolimit vun 50 km/h. Verleden Johr, dor harr de Hamborger Senaat den Boo vun en ne’e Brüüch besloten, wiel de ole för grote Containerscheep to siet is.
Pauschal 10 Perzent op vele Waren ut all Länner – vun hüüt af an gellt deelwies de Töll, de US-Präsident Donald Trump ankünnt harr. Noch högere Töll för en Reeg vun Staaten, dorünner ok Düütschland, de schüllt in en tweten Schritt in de Midd vun de tokamen Week nakamen. De Chef vun de US-Notenbank, Jerome Powel, de wohrschaut för negative Folgen vun wegen Trumps Tollpolitik.
Wo geiht dat wieder in den Tarifstriet vun’n apentlichen Deenst vun’n Bund un Kommunen? In Potsdam, dor wüllt Arbeidgevers un Warkschopen vundaag wedder versöken, den Striet vun’n Disch to kriegen. Grundlaag is en Kompromissvörslag, den unafhängige Schlichters vörleggt hebbt. Dorin heit dat, dat de Lohn in twee Stopen na baven gahn schall – alltohoop 5,8 Perzent, man minnstens üm 110 Euro per Maand.
Wo geiht dat wieder in den Tarifstriet vun’n apenlichen Deenst vun’n Bund un Kommunen? In Potsdam, dor wüllt Arbeidgevers un Warkschopen vundaag wedder versöken, den Striet vun’n Disch to kriegen. Grundlaag is en Kompromissvörslag, den unafhängige Schlichters vörleggt hebbt. Dorin heit dat, dat de Lohn in twee Stopen na baven gahn schall – alltohoop 5,8 Perzent, man minnstens üm 110 Euro per Maand.
De düütschen Redereen, de wüllt, dat de tokünftige Bunnsregeren, wedder en maritimen Koordinator insetten deit. Dat wöör hölpen, wenn dat in Berlin een gifft, den se direkt ansnacken kunnen. Dat sä Martin Kröger, de Hauptgeschäftsföhrer vun den Redereeverband VDR to NDR 90, 3. De Posten, de weer wichtig, so Kröger. Wat dat in de ne’e Bunnsregeren en maritimen Koordinator geven warrt, dat is noch nicht rut.
Dat de Pries vun’t Düütschlandticket na baven gahn is, dat hett sik op de Tahl vun de Abonnenten bi‘n Hamborger Verkehrsverbund utwarkt. In Februar hett de HVV 1.230.000 Abonnenten – 30.000 weniger as in‘n Dezember. Middelwiel wörrn aver wedder mehr Abos afsloten, so en HVV-Spreker. To’n Anfang vun’t Johr weer de Pries för dat Düütschlandticket vun 49 op 58 Euro per Maand na baven gahn.
In de Football-Bunnsliga blifft Bayern München op Titelkurs. De Tabellenföhrer hett en Achterstand ophaalt un güstern gegen Augsburg mit 3:1 wunnen. In de twete Bunnsliga hett Eintracht Braunschweig en wichtigen Sieg rinhaalt – mit 3:2 gegen Paderborn. Hannover 96 hett gegen Karlsruhe mit 0:1 verloren. De HVS speelt vundaag in Nürnberg.
