Kolumne: Hör mal 'n beten to "Gorilla Taktik"
Bisher hat Ines Barber sich einfach still vor sich hin geärgert, wenn sich eine fremde Person nicht für ihr unmögliches Verhalten entschuldigt hat. Mit der Gorilla-Taktik geht das jetzt anders.
Vunne Guerilla-Taktik hest bestimmt al mol höört. Man ik heff nu för mi de Gorilla-Taktik entdeckt. Also, ik stunn mol wedder mit veele Minschen inne Slang anne Supermarktkass. Op eenmol knallt mi solk Töffel vun achtern de Wagen inne Hacken. Wusch, ik dreih mi üm, nix. Keen Pardon. Fröher harr ik mi verbeestert fix wedder trüchdreiht un argert. Dat is nu mit de Gorilla-Taktik anners.
Groot maken wie een Sülverrüch
De Sülverrüch, also, de Silberrücken bi de Gorillas, de hett jo so sien ganz egen Art, föhlt he sik inne Kniep. He makt sik groot, wies de Bagaluten de Teen, kiekt se starr un liek ut an, un wenn dat nix nützt, den schmitt he mit Twiegen or wat he sonst so to faat kriggt. Un total krass, he kann mit sien Drüsen een fiese Gestank prodzeern. Aggresschion rükt! Un as letzt Möglichkeit: He geiht de anner anne Plünnen. Also, in't Fell.
Flegende Doos Bohnensupp
Süh, ik heff mi nu düt un dat vun Gorilla afkeken. Nee, dat mit de Drüsen hmm, nee nee. Man ik drück de Rüch dörch, un riesengroot as ik denn bün, dreih ik mi langsom üm un kiek de Spacken vun Minsch stracks inne Oogen un tööv. Kümmt dor nix, wünsch ik em or ehr en Platten an't Auto, 'n Lock in' Schoh, Pickel oppe Nees, so lütte fiese Saken. Herrlich. Also, still. Un denn - as'n Königin - dreih ik mi wedder gediegen langsom trüch üm. Ik heff ok al överleggt, wat ik villicht ok mit wat schmieten schull, du, so'n Doos Bohnensupp villicht? Alleen de Vörstelln befreet enorm.
Zum Podcast-Angebot der plattdeutschen Sendereihe "Hör mal 'n beten to"
Die plattdeutsche Morgenplauderei "Hör mal 'n beten to" gehört seit mehr als 60 Jahren zum Alltag in Norddeutschland. Hier werden die Wunderlichkeiten des Alltags betrachtet. So klingt es, wenn wir Norddeutschen uns selbst auf die Schippe nehmen - liebevoll bis spöttisch, selten mit dem Finger in schmerzenden Wunden, aber immer an Stellen, an denen wir kitzelig sind. Im Radio: werktags um 10.40 Uhr auf NDR 1 Welle Nord, um 11.50 Uhr auf NDR 1 Niedersachsen und um 13.20 Uhr auf NDR 90,3.
Schlagwörter zu diesem Artikel
Plattdeutsch
