Hamborgs Hööftverkehrsstraten schüllt attraktiver warrn: Ok dör ne’e Mehrfamiljenhüüs un Gröönanlagen. Utdacht hett sik düt Magistralen-Konzept de Bezirk Altno. Hier sünd al hunnerte vun Wahnungen boot worrn. Man dat gifft Maleschen: Rad- un Footweeg un Bussporen schüllt breder maakt warrn, so as op de Luruper Hauptstraat. Dat schall folgens Bezirksamtsböverste Stefanie von Berg dorto föhren, dat Bussen dor nich ahn Stau fohren köönt. Wat sik de Plaan so dörsett, dat is man noch nich kloor.
Se sünd dor, üm to hölpen un Versehrten to versorgen – man to’n Deel warrt se ok sülvst angrepen, mit Böllers un Raketen. Ok in de Silvesternacht düt Johr sünd Nootfallkräft wedder attackeert worrn, so as in Steilshoop hier in Hamborg. De Warkschop vun de Polizei finnt dat bedenklich, dat jümmers mehr Personaal för jümehr Schuul praatstellt warrn mutt. Bunnsbinnenministersch Nancy Faeser vun de SPD verlangt, dat Lüüd, de sowat doot, hatt verfolgt un bestraaft warrt.
In dat Utgahviddel vun New Orleans is en Mann an’n Ooltjohrsavend mit en Pick-Up in en Minschenmeng karjoolt. Nu süht dat mehr un mehr dorna ut, dat he en islamistisch Motiv harr. Dor düüdt en Video op hen, dat de fröhere US-Suldat kott vör de Daat in’t Internet stellt hett. Dat deel US-Präsident Joe Biden mit. In den Wagen vun den Mann is ok en Fahn vun den sonöömten IS funnen worrn. 15 Minschen sünd bi den Anslag ümkamen.
De Polizei söcht in ganz Düütschland knapp 190 Rieksbörgerslüüd per Haftbefehl. Dat vermellt dat „Redakschoonsnettwark Düütschland“ un beröppt sik op Tallen vun’t Bunnsbinnenministerium vun Enn September. Affraagt harr jüm de Linken-Grupp in’n Bunnsdag. 20 vun de Haftbefehlen sünd vunwegen polietsch motiveerte Gewaltverbreken utstellt worrn – annern ok vunwegen Oorkunnenfälscheree oder Volksophissen.
Vunwegen ornliche Stormböen un ümkippte Bööm sünd an’n Neejohrsdag en Reeg Bahnen un Scheep utfullen. Middewiel fohrt de mehrsten Töög man wedder, so as op de Streken Altno – Westerland/Sylt un Hamborg – Ahrensborg. Ok de Fähren na de Eilannen in Noord- un Oostsee sünd wedder na Plaan ünnerwegens.
Vundaag wesselt sik Wulken un Sünnschien af, dorto gifft dat den een oder anner Schuer, to’n Deel ok mit Graupel oder Snee un ornlich Wind. De Temperaturen klattert op 4 bet 5 Graad. Morgen gifft dat denn wedder mehr Wulken, dorto Regen-, Snee oder Graupelschuern un an’n Namiddag mal Sünn. Dat Ganze bi 2 bet 3 Graad, dorto stöörmsche Böen.
In Altna-Noord sünd twee junge Mannslüüd bi en Unfall to Dode kamen. En 28 Johr olen Autofohrer hett woll op de Kieler Straat de Kuntrull verloren un is denn gegen en Lichtmast un en Boom prallt. Folgens de Polizei is he in't Krankenhuus sturven. In't Auto weern noch twee anner Lüüd binnen. Een 23 Johr olen Mann, de ok sturven is un noch en 28-Johrigen. De is swoor an't Lief to Schaden kamen. Wat dat utsüht, weer de Mercedes veel to gau ünnerwegens.
