Allens in allen 850 ne'e Wahnungen. So veel süllt alleen in twee Grootprojekten in Altna entstahn. An de Max-Brauer-Allee plaant de Hoochbahn 400 Wahnungen för jemehr Mitarbeiders. Op dat Flach vun den Selgros-Grootmarkt in Bohrenfeld boot SAGA un Quantum glieks 450 Wahnungen. De Bezirk hööpt, dat he mit düsse beiden Grootprojekten ok siene Tallen to'n Wahnungsbo verbetern kann. Egens sull he 1.500 Bogenehmigens in't Johr mööglich maken. In düt un in't verleden Johr leeg Altna noch düütlich dorünner.
An’n 23. Februar warrt de Bunnsdag nee wählt. Dorop stellt sik opstunns heel Düütschland in. Man tovör mutt de Bunnspräsident den Bunnsdag offiziell oplösen. Hüüt Vörmeddag maakt Frank-Walter Steinmeier sien Entscheden dorto künnig. Een wichtige Vörrutsetten dorto is al erfüllt: Kort vör Wiehnachten harr Kanzler Olaf Scholz de Vertroens-Afstimmen in’t Parlament verloren.
Hannelore Hoger is doot. De Schauspelersch is mit 82 Johr in Hamborg sturven. Bekannt is se sünnerlich as Kommissarsche in de ZDF-Serie "Bella Block" worrn. Man se stunn ok in masse Theaterrullen op de Bühn. ZDF-Intendant Norbert Himmler sä, Hoger weer en heel un deel besünner Persönlichkeit un en grootoordige Schauspelersch.
Woso is en Passageer-Fleger ut Aserbeidschan in Kasachstan afstört? De Behöörden in Aserbeidschan gaht dorvun ut, dat en russ'sche Rakeet de Utlöser dorför weer. Wat dor to hören is, is de Maschien vun Raketensplitters drapen worrn. De russ'sche Luftfohrtbehöörd seggt, dat kunn ok ween, dat de Fleger mit Vagels tosamenstött is. Bi dat Unglück kemen 38 Minschen to Dode.
In Hamborg geiht vundaag de Chaos Communication Congress los. Dat is de gröttste Hacker-Kungress vun Europa. In't CCH an'n Dammtor kaamt vundaag mehr as 14.000 Programmerers un Technikbegeisterte tohoop. Se wüllt veer Daag lang över aktuelle Themen snacken. Dat geiht dorbi to't Bispeel üm technischen Wedderstand gegen dat Överwaken un üm Datenschuul bi de elektroonsche Patschentenakt.
Dat weer ganz knapp. An't Enn mussen de Hamborgers mit en Nedderlaag leven. De Handballers vun'n HSV Hamborg harrn in Eisenach mit en 31 to 32 dat Nasehn. De Entscheden is in de letzte Sekunn vun't Speel fullen. Düütlicher weer de Nedderlaag för de Basketballers vun de Hamborg Towers. Se hebbt in Rostock mit en 78 to 92 verloren.
Vundaag hebbt wi mal wedder dicke Wulken an’n Heven, af un an is dor ok so’n Nevelsupp ünnerwegens. De mehrste Tiet is dat dröög, liekers kann dat ok mal spüttern un dat bi bet to negen Graad.
Morgen süht dat meist jüst so ut. Beten köhler is dat denn al wedder. Dor schafft de Temperaturen dat blots noch op bet to söss Graad.
