De Bahnhööf in Hamborgs gröttsten Bezirk Wandsbeek schüllt sekerer warrn. Över den Weg dorhen warrt vunaf Maandag en ne'en runnen Disch Raat slaan. Mit dorbi sünd de Hoochbahn, Organisatschonen ut de Suchthölp un de Partei-Frakschonen. Alleen an'n U-Bahnhoff Wandsbeek Markt, dor müss de Polizei verleden Johr bummelig 200 Maal ingriepen.
Na den eersten Snee in't ne'e Johr is de Winterdeenst vun de Stadtreinigung siet fröh in de Nacht Klock twee in'n Insatz. Mit mehr as 700 Lüüd sünd se op de Hauptverkehrsstraten, bi de Bushollstellen un op de Radweeg an't Streuen. Dat kann glatt ween, man de Polizei seggt, dat de Laag op de Straten an'n Morgen ruhig weer.
De Vörmiddag bringt dicke Wulken mit Sneeregen- un Sneeschuern, hier un dor ok mit Blitz un Dunner. An’n Namiddag kriegt wi aver ok de Sünn nochmal to sehn – bi bet to 3 Graad. Nu (Klock negen) is in Fuhlsbüttel 1 Graad över null. Morgen denn vele Wulken, wenig Sünn un denn un wenn mal en Sneeregen-Schuer – bi bet to 2 Graad.
Hamborgs Hööftverkehrsstraten schüllt attraktiver warrn: Ok dör ne’e Mehrfamiljenhüüs un Gröönanlagen. Utdacht hett sik düt Magistralen-Konzept de Bezirk Altno. Hier sünd al hunnerte vun Wahnungen boot worrn. Man dat gifft Maleschen: Rad- un Footweeg un Bussporen schüllt breder maakt warrn, so as op de Luruper Hauptstraat. Dat schall folgens Bezirksamtsböverste Stefanie von Berg dorto föhren, dat Bussen dor nich ahn Stau fohren köönt. Wat sik de Plaan so dörsett, dat is man noch nich kloor.
Se sünd dor, üm to hölpen un Versehrten to versorgen – man to’n Deel warrt se ok sülvst angrepen, mit Böllers un Raketen. Ok in de Silvesternacht düt Johr sünd Nootfallkräft wedder attackeert worrn, so as in Steilshoop hier in Hamborg. De Warkschop vun de Polizei finnt dat bedenklich, dat jümmers mehr Personaal för jümehr Schuul praatstellt warrn mutt. Bunnsbinnenministersch Nancy Faeser vun de SPD verlangt, dat Lüüd, de sowat doot, hatt verfolgt un bestraaft warrt.
In dat Utgahviddel vun New Orleans is en Mann an’n Ooltjohrsavend mit en Pick-Up in en Minschenmeng karjoolt. Nu süht dat mehr un mehr dorna ut, dat he en islamistisch Motiv harr. Dor düüdt en Video op hen, dat de fröhere US-Suldat kott vör de Daat in’t Internet stellt hett. Dat deel US-Präsident Joe Biden mit. In den Wagen vun den Mann is ok en Fahn vun den sonöömten IS funnen worrn. 15 Minschen sünd bi den Anslag ümkamen.
De Polizei söcht in ganz Düütschland knapp 190 Rieksbörgerslüüd per Haftbefehl. Dat vermellt dat „Redakschoonsnettwark Düütschland“ un beröppt sik op Tallen vun’t Bunnsbinnenministerium vun Enn September. Affraagt harr jüm de Linken-Grupp in’n Bunnsdag. 20 vun de Haftbefehlen sünd vunwegen polietsch motiveerte Gewaltverbreken utstellt worrn – annern ok vunwegen Oorkunnenfälscheree oder Volksophissen.
