Woans wüür Hamborg wählen, wenn al an'n Sünndag Börgerschopswohl weer? Dat is bi’n ne'n Hamborg-Trend in Opdrag vun'n NDR fraagt worrn – Infratest Dimap harr de Ümfraag maakt. Un rutkamen is: Root-Gröön harr wieder kloor de Majorität. De SPD kummt op eenundörtig Perzent un de Grönen op tweeuntwintig Perzent. Dormit kunn Root-Gröön sien Vörsprung in'n Vergliek mit de verleden Ümfraag ut'n November licht utboon. De CDU kummt op söventeihn Perzent, de AfD op negen un De Linke op fief Perzent. FDP un BSW liggt bi veer Perzent.
De Stadt Hamborg köfft Plegen un Wohnen torüch – för bummelig dreihunnertachtig Millionen Euro. Börgermeester Peter Tschentscher vun de SPD seggt, dat de Stadt so to'n gröttsten Heimbedriever vun Hamborg warrt. De CDU bekrittelt dat. De Rückkoop weer blots en Wohlkampaktschoon. Op de anner Siet wull De Linke al johrenlang, dat dat Ünnernehmen vun de Stadt wedder torüchköfft warrt. Ok de Warkschop Verdi hett sik övern Rückkoop freiht.
Vundaag geiht dat in Hamborg mit de elektroonsch Patientenakt los. Hamborg is en vun de Pilotregionen in Düütschland. Hier warrt test, wo goot de Saak in'n Praxisalldag löppt. Patienten, de wat dorgegen hefft, dat jümehr Diagnosen un Rezepten dor afspiekert warrt, mööt dat bi'n Dokter kunnig maken. De Chaos Computer Club harr jüst eerst wohrschoot, dat dat bi de Akt Sekerheitslücken geev. De Datenschutzbeopdragte seggt man, dat de Problemen in Hamborg al löst weren.
In'n Gazastriepen gifft dat woll grote Chancen op en Wapenroh. De "Times of Israel" schrifft, dat twüschen de islamistisch Terrororganisatschon Hamas un Israel verhannelt warrt – un dat dat woll blots noch üm Details geiht. Dat güng apenbor ok dorüm, dat de Hamas de övrigen Geiseln freilett. Se harr vör üm un bi eenunhalf Johr en Terrorattack op Israel maakt. Vun denn af an geiht Israel gegen de Hamas in Gaza vör.
De Börsenopsicht in de USA klaagt gegen Elon Musk. Dat geiht üm sien Koop vun Twitter-Aktien in't Johr 2022. Em warrt vörsmeten, he harr nich rechttietig kunnig maakt, dat he mehr as fief Perzent vun de Aktien köfft. So harr Musk denn wieder Twitter-Aktien to'n lütten Pries köpen kunnt. He schull so tominnst 150 Millionen Dollar spoort hebben. Musks Afkaat wiest all dat torüch.
An'n Theodor-Heuss-Platz is en Footgänger an'n Avend vun en HVV-Bus anföhrt worrn. He keem dorbi swoor to Schaden. En Dokter un en Sani bröchen em na't Krankenhuus. De Bus harr ok batsch bremst un de Polizei seggt, dorbi weren Fohrgäst licht to Schaden kamen.
Vundaag hefft wi eerst wedder veel Wulken. Dat lockert övern Dag en beten op. Af un an mach dat en lütt beten regen, blifft man tomehrst dröög. De Temperaturen klattert op bet to söven Graad. Morgen denn ok üm un bi so: veel Wulken, tomehrst dröög, bet to üm un bi söven Graad.
