De EU-Kommischoon hett jo den Haven-Deal mit de Rederee MSC billigt – ahn dat dor noch wat an rümdreiht warrn mutt. Hamborgs Finanzsenater Andreas Dressel wiest sik bannig tofreed dormit. He sä, he glööv, dat de heel Saak bet na't End vun't Johr dör is. De Linken un de CDU freiht sik nich. Götz Wiese vun de CDU sä: Dat weer nich goot för de Stadt un ok nich för'n Haven, dat MSC meist föfftig Perzent vun de HHLA övernimmt.
Israel hett in de Nacht wedder präzies Attacken in'n Libanon maakt. Dat geev woll en Drohnenangreep in'n Noorden vun't Land, dicht bi de Stadt Tripoli, heet dat vun Sekerheitslüüd ut de Region. Dorbi is woll ok en Baas vun de Hamas ümkamen. Jümmer noch nich kloor is, wat Israel na'n Reketenangreep ut'n Iran maakt. US-Präsident Joe Biden höllt nix vun en Bombardement vun Atomanlagen or Ölfeller in Iran.
An'n Maandag is dat en Johr her, dat de Hamas Israel brutal angrepen hett. Vundaag un in de tokamen Daag sünd düütschlandwiet Demos anmellt. Bunnsbinnenministersche Nancy Faeser sä, dat hart dörgriepen warrn schall, wenn dat op welk vun de Demos antisemitisch Tüüch to sehn or to hüürn is. In Hamborg gifft dat vundaag an'n Middag en Demo gegen de Operatschoon vun Israels Armee in Gaza.
De Elvhang müss beter kontrolleert warrn – dat seggt Hamborgs CDU. Twüschen Nemöhlen un de Lannsgrenz rüüscht an'n Hang jümmer wedder Eer af. Op kritische Steden müss man de heel Tiet en Oog hebben – un Schadens müssen stracks utbetert warrn, sä CDU-Viez Anke Frieling. Dat bruuk mehr Personal un ok mehr Geld. En Gootachten vun de Sekerheit vun'n Bodden an'n Elvhang geev dat opletzt vör acht Johr. Tomals weer en Deel vun en Wanderweg in Rissen daalsackt.
In de Eerst Football Bunnsliga hett Augsborg mit twee to een gegen Mönchengladbach wunnen. Sankt Pauli speelt vunavend an'n Millerntor gegen Mainz. In Liga Twee kunn sik Paderborn gegen Regensborg dörsetten: mit drei to null. Karlsruhe un Darmstadt hefft drei to drei speelt. De HSV is eerst morgen an de Reeg – bi Fortuna Düsseldörp.
Vundaag wesselt sik Sünn un Wulken af. Dat blifft dröög – bi bet to süssteihn Graad. Ok morgen blifft dat üm un bi so: dröög, recht veel Sünn, en poor Wulken dorbi.
„Scotch&Soda“, Esprit oder "Die Wäscherei": Alleen in düt Johr mööt üm un bi 150 Ladens in Hamborg dicht maken. Dat glöövt de Hannelsverband Noord. Wat he seggt, hebbt sünnerlich de Ladens för Kledaasch in’t middlere Priessegment to lieden. Dat gifft jümmer mehr Lüüd, de kööpt sik de Saken in’t Internet. Un dor gifft dat jümmer mehr Konkurrenz dörch asiaatsche Anbeders. Nu hööpt de Verband op en godet Wiehnachtsgeschäft.
