Dat hett pladdert as man wat. Liekers hebbt in Paris poor hunnertdusend Minschen den Start vun de Olympschen Spelen fiert. De Teams mit de Sportlers sünd in 85 Bööt över de Seine fohrt. Avends kort vör Klock ölven sä Präsident Emmanuel Macron, dat de Spelen nu losgaht. Un de olympsche Flamm hebbt twee franzöösche Spoortstars anmaakt: De Lichtathletin Marie-José Pérec un de Judoka Teddy Riner.
Bunnsbutenministersch Annalena Baerbock weer güstern op Sommertour in Hamborg. Dorbi hett de gröne Politikersch den Kurs vun'n Haven löfft. De möht sik, ne'e Hannelspartners to finnen, dat he nich mehr so afhängig vun China is. Un denn finnt Baerbock noch goot, wat de Havenbedriever HHLA deit. Denn dat Terminal Oolwarder is dat eerst in de Welt, wat klimaneetral arbeiden deit.
Mehr as 20 Millionen Euro - so hooch is de Schaden den de Organiseerte Kriminalität in Hamborg verleden Johr anricht hett. Dat hett de Senat op en CDU-Anfraag antert. Mehrsttiets güng dat dorbi üm den Hannel mit Drogen. Dat is al normal för en Havenstadt. Bummelig 30 Lüüd hebbt se dorüm achter Trallen steken.
Dat is en lierlütten Middelweg, op den sik de G20-Staten eenigt hebbt. Se wüllt enger tosamenarbeiden un gegensiedig op Stand bringen, dat se Lüüd, de richtig Geld an de Hacken hebbt bestüern köönt. Man dor höört dat denn ok al op. Denn en weltwiede Milliardärsstüer is eerstmal vun'n Disch. Se hebbt över dat Avgeven vun twee Perzent op en Vermögen vunaf een Millarde Dollar snackt. Dörch den Druck vun de FDP will Düütschland dor nix vun weten.
Wokeen vunmeddag mit den Wagen in Eimbüddel ünnerwegens is, de mutt dormit reken, dat de Verkehr mal korthannig lahm leggt warrt. De Aktivisten vun de Grupp "Letzte Generatschoon" plaant Blockaden. Bi dat so nöömte Swarming stöörmt mehre Lüüd op de Straat un verhinnert korthannig dat Wiederfohren. Se plaant dorför fief mal fief Minuten. De Akschoon is för vunaf Klock 12 anmellt.
De Sünn hett vundaag mal mehr mal minner Lust sik to wiesen. Liekers is dat de mehrste Tiet dröög bi bet to 25 Graad. Man’n an’n Nameddag un Avend kann’t doch noch mal de een oder anner Flaag geven. Dorto gifft dat en mauen Wind, de nich so recht weet, vun wo he den nu weihen sall.
Morgen weiht dat denn al en beten duller ut Noordwest, de Rege hollt bilütten wedder op un dat warrt wedder bet to 23 Graad warm.
De Sport-Welt kiekt hüüt na Paris, denn dor schüllt an'n Avend de Olympschen Spele mit en grote Show to'n Anfang losgahn. Wenige Stünnen vör de Fier mellt nu de franzöösche Bahngesellschop SNCF en massive Attack op dat Nett vun de gauen TGV-Töög. Vele Verbindungen mööt wegstreken warrn. De Reparaturarbeiden warrt woll noch dat ganze Wekenenn lang duern. Woans dat to de Brand-Anslääg kamen kunn, dat is noch unkloor.
![Podcastbild zum Podcast "MV im Fokus" © NDR Foto: [M]](/podcast/podcastbild508_v-fullhd.jpg "Podcastbild zum Podcast \"MV im Fokus\"")
