Dat Bunnsverfatensgericht uurdeelt vundaag över en wichtige Saak, bi de sik dat üm uns Stüergeld dreihen deit: Dat geiht üm de Fraag, wokeen dorför betahlen mutt, wenn de Polizei bi Footballspelen mit to Gang is. Ok op de beiden Hamborger Clubs, den FC St. Pauli un den HSV kunn en ganzen Barg wat op tokamen, wat dat kösten deit, wenn se tokamen Tieden de Polizeiinsätz nu betahlen schullen. Wenn dat Uurdeel vun dat Bunnsverfatensgericht in düsse Richt utfallen schull, denn kunn dat angahn, dat ok de Veranstalters vun Stratenfesten, Wiehnachtsmarkten oder Karnevalsümtöög deep in jümehr Taschen ringriepen un betahlen mööt.
Op Finkwarder sett sik en Initschatiev vun’e Börgerslüüd för mehr barrieerarme Fähren in. Se bekrittelt, dat dat to’n Bispeel Lüüd, de in’n Rullstohl sitten doot, swoor hebbt, in ole Fährscheep na binnen hen rintokamen un dat de ne’en Scheep dor blots af un to op de Lien 62 ünnerwegens sünd. Welk vun de Fohrgäst müssen denn laang op de neegste Fähr op töven. Op de anner Siet, dor maakt de HADAG aver kloor, dat prinzipjell all Lüüd, de en Beinträchtigen hebbt, mitföhren köönt. Mehr to dat Thema finnt een ok in uns NDR Hamborg App.
In Steilshoop steiht nu en Ümbo op’n Plaan, de ‘n poor Johr lang duern deit. Dat maroode Inkoopscenter un rund 430 Wahnen schüllt dor op Schick bröcht warrn. Teihn Johr lang warrt se dor woll för bruken un kösten warrt dat so üm un bi söven Komma fief Millionen Euro. Güstern nu kunnen de Anwahners mit de Verantwoortlichen över de ganzen Plaans snacken. Welk vun jüm sünd nervöös, wiel dat se glieks mit twee grote Bosteden leven schüllt: Mit den Ümbo vun de Wahnen un bavento denn noch mit den Bo vun de U5.
Mehr Sekerheit in’e Oostsee - dat is dat Maal vun en Drapen vundaag, wat dat in Helsinki geven deit. In de Hööftstadt vun Finnland kaamt Vertrederslüüd vun de NATO-Länner tohoop. Mit dorbi is ok Bunnskanzler Olaf Scholz. Snacken warrt se dor blangen anner Saken denn ok över de Schuul vun Internet- oder ok de Stroomkavels, de dor ünnen an’e Eer vun’e Oostsee liggen doot. Denn düsse sünd in’e verleden Tiet al mehrmals twei maakt worrn. Ok de Scheep, de Schaddenflott vun Russland, de warrt woll Thema ween bi dat Drapen, wiel dat se dormit, mit düsse Scheep, dat Importverbott, wat in Europa gellen deit, ümmer wedder ümgahn doot.
De Handballfans kiekt vunaf vundaag na uns Naverland na Däänmark hen. Denn dor geiht de Handball-Weeltmeesterschop los. Alltohoop finnt düsse in dree Länner statt: in Däänmark, Noorwegen un Kroation. Dat düütsche Team is bi düsse WM in de Stadt Silkeborg ünnerkamen, de middenbinnen in Däänmark liggen deit. Morgen steiht denn för jüm dat eerste Speel op’n Plaan gegen Polen.
Vun de Sünn kriegt wi vundaag nich veel to sehn. Sünd veel Wulken ünnerwegens. Af un to gifft dat Spütterregen, weswegen dat denn ok glatt warrn kunn. De Temperaturen kaamt vundaag meist nich över veer Graad henweg. Opstunns sünd dat noch null Graad op Finkwarder. Un hier un dor kann vundaag ok de Wind mal ’n beten wat duller utfallen. Morgen warrt dat denn ’n Ticken wat warmer, dat gifft weniger Regen, man liekers kriegt wi ok dor de Sünn kuum wat to sehn.
In St. Georg sünd in de Nacht Schööt fullen. Dorbi is minnst een Mann versehrt worrn. Folgens de Polizei, steiht sien Leven aver nich op't Speel. Passeert is de Saak vör en Lokal an'n Hansaplatz in St. Georg. Dor hebbt twee Gruppen op'nanner schaten. In de Nacht hebbt se denn fief Keerls eerstmal fastnahm. Op de Flucht is nu nüms mehr. Üm wat dat bi de Striederee güng, is noch nich rut.
