En Wapenroh in’n Gazastremel steiht nu ok formal nix mehr in’n Weg. Na dat israeelsche Sekerheitskabinett hett in de Nacht ok de hele Regeren ja seggt to dat Afkamen mit de Terror-Organisatschoon Hamas. Dor binnen is fastleggt, dat de Wapen in den Gazastremel vun morgen af an för söss Weken lang swiegen schüllt. In düssen eersten Törn schüllt alltohoop 33 israeelsche Gieseln freekamen. Op de anner Siet is plaant, dat hunnerte Palästinensers, de in Israel achter Trallen sitten doot, freelaten warrt.
Grönen-Kanzlerkandidat Robert Habeck hett in Hamborg vör den Wedderwillen gegen de EU un vör Rassismus wohrschaut. Beids warrt de weertschopliche Laag vun Düütschland leger maken, see he bi en Weertschopsdrapen vun sien Partei op St. Pauli. Ok dat aggressive Ageren vun China, de Krieg in de Ukrain un dat Warmerwarrn vun de Eer wörrn sik op Düütschland utwarken, so Habeck. Düsse Maleschen kunn een ok nich afwählen, een müss jüm afarbeiden, stell he rut.
Wokeen to Foot ünnerwegens is, de kennt dat: Een süht Slaglöcker, Laternen, de twei sünd, oder Müll op de Straat. Doröver hebbt sik de Hamborgers verleden Johr mehr as 50.000 Mal beswoort. Ingahn sünd de Besworen bi den sonöömten Melde-Michel, de mehrsten kemen ut den Bezirk Wandsbeek. In’t Johr tovör weren dat noch alltohoop 36.000 Besworen. Mehr as 90 Perzent vun den Müll hett de Stadtreinigen binnen dree Daag wegschafft.
Se kaamt op Volksfesten un Johrmarkten to’n Insatz: Reedschoppen för Schaustellers warrt vundaag bi en Mess in Hamborg wiest, bi de Interschau. De löppt dat eerste Mal siet 20 Johr hier in de Stadt un stellt de ne’esten Fohrgeschäften, Speelgereden un Festartikels för. Mehr as 100 Utstellers ut söven Länner sünd dorbi. Grund för de Mess in uns Stadt is de Delegeertendag vun den Düütschen Schaustellerbund in Hamborg.
De fröhere SPD-Bunnsdagsafornte Johannes Kahrs warrt nich vör den Cum-Ex-Ünnersökensutschuss in Hamborg utseggen. Sien Afkaat deel güstern mit, dat he vun sien Recht Bruuk maakt, de Utsaag to verweigern. In’n Ruum steiht, dat Kahrs Verbinnens to de Warburg-Bank hett. De eenzigste Partei in de Börgerschop, de em vörladen wull, weer man de Linke. De Staatsafkaatschop Köln harr länger gegen em ünnersöcht, bet dat Verfohren instellt worrn is.
Den eersten Satz hett so noch verloren man denn hett de Hamborger Tennisspelersch Eva Lys dat Match doch noch wunnen: Se harr bei de Australien Open gegen Jaqueline Cristin ut Rumänien de Nees vörn. In’t Achtelfinaal speelt se denn gegen Iga Swiatek ut Polen. Un Spood harrn ok de düütschen Handballers: Mit 31 to 29 hebbt se de Swiez bi de Weltmeisterschop na Huus schickt.
Vundaag sünd vele Wulken an’n Heven un dat is teemlich diesig, man meisttiets blifft dat dröög. An’n Namiddag warrt dat en beten heller. De Temperaturen schafft dat blots op 1 bet 2 Graad. Opstünns sünd dat noch 2 Graad ünner 0 in de Havencity. Morgen köönt wi uns denn wedder op Sünnschien freien. Blots en poor Wulkenfeller treckt dör. Dat Ganze bi 3 bet 4 Graad.
