Magdeborg denkt an de Offers. Bummelig 4.000 Minschen hebbt in Sassen-Anhalt an de Offers vun den Anslag op'n Wiehnachtsmarkt erinnert. Se hebbt sik rund üm den Olen Markt to en Minschenkeed opboot. -Also akkraat dor, wo de Anslag passeert is. Un dormit wullen se denn ok glieks gegen Frömdenhass demonsteren. To glieke Tiet weer in de Magdeborger Binnenstadt en Kundgeven vun de AfD mit üm un bi 3.500 Minschen.
De Anslag in Magdeborg weer ok Thema in de Wiehnachts-Anspraak vun den Bunnspräsidenten. Frank-Walter Steinmeierr hett Minschen in Düütschland dorto opropen, dat se tosamenhollen doot. Wat he seggt, dröövt Haat un Gewalt nich dat letzte Woort hebben. Un denn hett Steinmeier de Parteien opfordert, dat se open över de Maleschen in't Land snackt. Wegen den Anslag harr Steinmeier sien traditschonelle Wiehnachtsanspraak nochmal nee schreven.
En Wiehnachtsbottschop gifft dat ok vun Hamborgs Eersten Börgermeester Peter Tschentscher. He hett all Insatzkräft un Mitarbeiders dankt, de de Stadt över de Fierdaag an't Lopen hollt. Tschentscher hett mit Blick op de Kunflikten un Kriegen, de dor överall op de Welt sünd, nochmal för en solidar'sch Mit'nanner hier in de Stadt trummelt.
Vundaag ennt de Frist för de Hamborger Parteien, dat se jemehr Wahllisten för de Börgerschopwahl afgeven köönt. Dorüm warrt vundaag ok noch bet laat an'n Namedddag in'n Lannswahlamt arbeid. An'n 30. Dezember kickt sik de Lannswahlutschuss an, wat se ik ok bi all Listen an de Regeln hollen hebbt. Achterna steiht fast, wokeen in Hamborg op den Wahlzeddel steiht.
De HVV is över de Wiehnachtsdaag mit en Sünnerplaan ünnerwegens. Dorbi gellt: De Töög un Bussen fohrt nich so faken as sünst. Vundaag sünd U- un S-Bahnen eerstmal so as op'n Sünnavend ünnerwegens. De gele Lien U3 is in'n 10-Minuten-Takt ünnerwegens un vunaf Klock söss fohrt all U- un S-Bahnen in'n 20-Minuten-Takt. Ok för de Bussen gellt över Wiehnachten de Fohrplaan för Sünn- un Fierdaag.
Vun witte Wiehnachten sünd wi in Hamborg wiet af. Man in de Alpen, dor is dat all en ganzen Snack anners. Dor reekt de Düütsche Wedderdeenst mit dulle Sneefäll mit Mengen twüschen fief un teihn Zentimeters. To't Deel sogor 15 Zentimeters bet to'n Nameddag. För dat Erzbarg un den Swattwoold reekt se mit twee bet fief Zentimeters.
De Wiehnachtsmann mutt en Noorddüütschen ween un kümmt vunavend in Gummisteveln. Bi Regen kümmt he ja ok veel flinker vöran, as harrn wi witte Wiehnachten. Man, bet vunavend is dat de mehrste Tiet dröög bi bet to söss Graad.
Morgen köönt wi twüschen Wiehnachtsfröhstück un Christstollen bi bet to 10 Graad spazeren gahn. Dat beten Spüterregen deit denn ja ok mal ganz goot.
