Mehr Personaal för de Polizei un düütlich beter utstaffeert - un bi düsse Utrüsten, dor schüllt denn ok sowat as Drohnen för de Afwehr mit tohören. Dat tominnst verlangt nu de Bund vun de Düütschen Kriminaalbeamten un de Düütsche Polizeiwarkschop in Hamborg. Achter düt Verlangen steekt woll ok de Milliarden, de se opstunns bi’n Bund planen doot för de Verdedigen uttogeven. Cyberattacken un Informatschonen, de mit Afsicht verkehrt sünd – ok sowat höört to de Binnenserkerheit mit to un dor is denn elkeen Lannspolizei för tostännig. Betto gifft dat Drohnen man blots bi’t Militär.
Dat kööm unvermodens: Denn de Grönen in Hamborg hebbt an’n Avend de Böversten vun jümehr Börgerschopsfrakschoon uttuuscht. De Dubbelspitz, de ut Jennifer Jasberg un Dominik Lorenzen bestahn deit, harr vöraf al op en ne’e Kandidatur op verzicht. Op de Beiden kaamt nu de Binnenpolitikersch Sina Imhof un de Migratschoonsfachmann Michael Gwosdz op na. De SPD-Frakschoon will ehr Entscheden över de Böversten bi sik eerst later drapen. Bi de CDU steiht wedder Dennis Thering bavenan. Un bi de AfD nochmals Dirk Nockemann. Un de Linken hebbt Heike Sudmann un David Stoop as Frakschoons-Dubbelspitz wählt.
Vundaag kummt de ne’e Bunnsdag dat eerste Mal tohoop. Man bet denn ok de ne’e Bunnsregeren stahn deit, duert dat aver noch’n beten wat. Opstunns loopt ja noch de Koalitschoonsverhanneln twüschen Union un SPD. Un dor schient dat nu noch’n poor Saken to geven, över de se snacken un sik kloor över warrn mööt. Dor höört denn Themen to so as Migratschoon, Börgergeld un en Stüer för de Rieken. De Partei-Böversten geevt sik aver toversichtlich, dat se sik bi all de Saken bald wat enigen köönt.
Dat is en swore Sekerheitspann bi de US-Regeren: Den strengen gehemen Plaan för den Angreep op de Huthi-Miliz in’n Jemen in’e Mitt vun’n Martmaand harrn se ok an en Journalisten schickt. Dat Witte Huus sä, dat düsse Geschicht stimmen dee. Utversehens harrn se woll den Böversten Redakteur vun dat Magazin Atlantic, Jeffrey Goldberg, bi en Chatgrupp mit hentopackt, wo ok de US-Vizepräsident, de Verdedigensminister un ok de Butenminister mit binnen ween sünd. So as Goldberg dat seggen dee, weern in den Plaan, den he kregen hett, präzise Informatschonen mit binnen över Wapen, Telen un Klockentieden vun de Angreep.
In’n Hamborger Haven finnt vundaag en grote Reddensöven op dat Water statt. Füerwehr, Polizei un Waterschuulpolizei, de DLRG un Lüüd vun’e Havenbehöörd öövt dat Söken un Bargen vun Lüüd ut’t Water. Dor mit to höört denn ok de Kommunikatschoon ünnerenanner to öven för den Fall, dat dat mal eernst warrn deit. Hüüt Vörmiddag Klock teihn schall dat losgahn. De grote Öven schall denn aver so openanner afstimmt warr, dat een dat in’n Fährverkehr nich marken deit.
Över en schemern Lichtwirbel an’n Heven hebbt güstern Avend vele Lüüd över raadt, wat dat ween kunn. Avends, so gegen Klock negen, is in wiede Delen vun Düütschland en licht blauhaftig Lüchten to sehn ween. Dat Phänomen geiht woll wedder op den Start vun en Falcon Negen Rakeet vun de Ruumfohrtfirma SpaceX op trüch. Denn de Rakeet stött den Sprit, den se nich bruken deit, af un de warrt denn vun’e Sünn anlücht, so dat een dat Ganze denn as lüchten Nevel to sehn kriegen deit. Dat is noch gor nich lang her, vör een Maand, dor harr en Lichtsteert na den Start vun een vun düsse Raketen an‘n Hamborger Nachthimmel lücht.
Wiel dat so vele Wulken ünnerwegens sünd, blifft dat vundaag meisttiets grau. Mit’n beten Glück kriegt wi de Sünn anfangs villicht noch’n beten wat to sehn, later na’n Avend hen fangt dat denn aver an to regen. De Temperaturen kaamt vundaag över twölf Graad meist nich henweg. Un ok morgen behollt de Wulken denn eerst noch’n beten wat de Böverhand un eerst later an’n Namiddag warrt dat denn wedder ’n beten wat fründlicher bi Temperaturen vun bet to dörteihn Graad.
