Union un SPD hefft vörstellt, wat se in en ne'e Bunnsregieren maken wüllt – in Hamborgs Politik sünd de Plaans heel ünnerscheedlich opnahmen worrn. CDU-Baas Dennis Thering sä, dat weer goot, dat de Stüern nich stiegen schüllt. Melanie Leonhard vun de SPD will eerst noch töven, wat de SPD-Liddmaten to de Saak seggt. Sina Imhof, de ne'e Baassche vun de Grönen-Fraktschon sä, dat weer goot, dat dat bald en ne'e Bunnsregieren gifft. Dirk Nockemann vun de AfD hööl fast, dat dat mit de CDU keen Asylwend geev.
US-Präsident Donald Trump hett en Grootdeel vun sien Töll drei Maand op Paus sett. Das gellt för de mehrsten vun de Länner, de in'n Hannel mit de USA mehr Töll betahlen schullen: man nich för China. De USA wüllt de Töll op Woren ut China noch wieder na baven setten: op nu eenhunnertfiefuntwintig Perzent. In de EU sünd se sik ünnerdes enig worrn – un maakt nu Gegentöll vun bet to fiefuntwintig Perzent. Drapen schull dat eerst mal Woren so as Jeans un Motorrööd ut de USA.
In'n Baumpieperweg in Neegroben-Fischbek hett dat fröh an'n Morgen brennt. Dat Füer is so üm un bi Viddel vör veer losgahn: op de Terrass vun en Huus. Vun dor leep dat denn wieder bet na de Slaapkamer. De Bewahners sünd all noch rechttiedig rutkamen un se sünd ok nich to Schoden kamen. Woso dat brennt hett, is noch nich rut.
Sövenunveertig Lüüd ahn Ünnerdack sünd in Hamborg in'n Winter dootbleven. Dat hett de Senat op en Anfraag vun de Linksfraktschon antert. Twüschen September un März weren süssuntwintig dorvun in't Krankenhuus storven – eenuntwintig op de Straat. De Mehrsten vun de Doden harrn en Krankheit, de nich or nich goot behannelt worrn is.
Passwöör vun mehr as föfftig düütsche Politikers sünd in't Darknet stellt worrn. Dat schrifft de Spiegel. Experten, de sik mit IT-Sekerheit utkennt, hefft bi tweehunnerteenunveertig Afornten Henwiesen funnen, dat jümehr Daten leakt worrn sünd. Vele vun de Politikers harrn private Mail-Adressen för'n Kontakt mit Börgers insett. Ok de Daten vun en Ministerpräsidenten weren mit dorbi. Wokeen dat weer, schrifft de Spiegel nich.
In de Football-Champions-League hett Borussia Dortmund kuum noch Chancen op't Half-Finaal. De BVB is in't Viddelfinaal-Henspeel bi'n FC Barcelona mit null to veer ünnergahn. In de Basketball-Bunnsliga is ok speelt worrn. De Hamborg Towers hefft sik in Göttingen dörsett: mit tweeunnegentig to fiefunsöventig.
Vundaag gifft dat veel Wulken, man dat blifft dorbi tomehrst dröög. In'n tweten Deel vun'n Dag kummt denn ok mehr de Sünn dör. De Temperaturen klattert op bet to süssteihn Graad. Ok morgen blifft dat üm un bi so: veel Wulken, wenig Sünn, tomehrst dröög.
