Welk Anwaltslüüd hebbt ut Protest den Hamborgischen Anwaltsvereen verlaten. Dat is NDR 90,3 wies worrn. Achtergrund is en Podiumsveranstalten to dat Thema „Rechtsstandoort Düütschland“. Un opregen doot se sik doröver, dat op düt Podium ok Alexander Wolf vun de AfD sitten schall. De Anwaltsfro Doris Dierbach stellt in en Apen Breef de Fraag: Fangt nu wedder de Juristen an, rechtsextreme Lüüd den Weg free to maken? De Anwaltsvereen seggt, dat se all de Parteien, de in de Börgerschop vertreden sünd, inlaadt harrn.
Güstern Avend hebbt teihndusende Lüüd in ganz Düütschland demonstreert. Se sünd dorgegen un deswegen op’e Straat gahn, wiel dat de Union tohoop mit de AfD för en scharpere Asylpolitik stimmt hett. Protesten schall dat vundaag ok in Hamborg geven: De „Omas gegen Rechts“ hebbt to en Minschenkeed rund üm dat Raathuus opropen. Un so as dat bi den Oproop heten deit, schall de AfD symboolsch de Weg in’t Raathuus rin dichtmaakt warrn. Reken doot se mit üm un bi 2.500 Lüüd, de dor woll bi mitmaken warrt. Un denn is för vundaag noch en anner Protest anmellt. De kummt vun dat Bündnis mit den Naam „widersetzen“.
Vundaag mutt de Bunnsdag nochmal wedder ok över en Vörlaag för en Gesett vun’e Union afstimmen. Un ok dor geiht dat wedder üm de Migratschoonspolitik. De ne’e ARD-Düütschlandtrend wiest, dat de mehrsten Lüüd, un dat sünd 57 Perzent vun all de, de se fraagt hebbt, dat goot finnen doot, dat een de Minschen, de keen Paperen hebbt, nich na Düütschland hen rinlaten dee. In düssen Fall mutt een aver noch dorto seggen, dat dat noch vör de Afstimmen an’n Middeweken ween is, wo se de Lüüd fraagt harrn.
Na dat Flegerunglück in Washington hebbt de Behöörden nu woll de beiden Floogschrievers funnen. So is dat tominnst in welk Medien to lesen. Un de Daten schüllt nu nakeken warrn. Güstern is en Passageerfleger mit en Helikopter tohoopstött, wo beide denn dorna in’t Water rinfullen sünd. In den Fleger hebbt 64 Lüüd binnenseten, in den Heli dree. Bet nu hebbt se al mehr as 40 Lieken ut’t Water ruthaalt.
De ganzen Ecken in’n Weltruum gewohr warrn: Dat is in de Steernwarte in Bardörp mööglich. Dat Huus steiht ünner Denkmaalschuul, mutt aver nödig op Schick bröcht warrn. Un 340.000 Euro hierför schüllt nu ut en Geldputt för Saneren vun’e Stadt kamen. In’e Mitt vun’n Februaarmaand will de Börgerschop över en Andrag vun SPD un de Grönen dorto afstimmen.
Pendlers mööt vundaag överall dor, wo de VHH to Gang is, dormit reken, dat se op’n Weg vun un na jümehr Arbeit hen Maleschen hebbt, dat wat utfallen deit oder dat dat länger duern deit. Denn bi de Verkehrsbedrieven Hamborg-Holsteen hebbt de Arbeitslüüd siet hüüt fröh Klock dree jümehr Arbeit daalleggt. Dorto hett de Warkschop Ver.di opropen. Drapen deit dat all Buslinjen bi’n VHH. Grund för den Warnstreik sünd de Tarifverhanneln, de op Schiet lopen sünd.
Vundaag is de enn oder anner Wulk ünnerwegens. De Sünn schient ok mal ne Tiet lang. Hier un dor kann dat villicht ok mal ’n beten wat regen. Meisttiets blifft dat aver dröög bi Temperaturen vun bet to söss Graad. Morgen kriegt wi de Wulken denn mehr as de Sünn to sehn. Dat blifft aver meisttiets dröög bi Temperaturen vun bet to veer Graad.
