NDR 90,3 - Dat Wedder för uns in Hamborg
Dat weer för de Footballfans in Düütschland en Slag in’t Kontor. För dat DFB-Team is de Europamesterschop in ’t egen Land toenn gahn. De Mannschop harr güstern Avend in’t Viddelfinaal gegen Spanien mit en 1:2 na Verlängern dat Nasehn. In’t Halvfinaal speelt Spanien gegen Frankriek, De Franzosen hebbt jemehr Viddelfinaal in ’t utverköfft Volksparkstadion gegen Portugal mit 5:3 in ’t Ölvenmeterscheten wunnen.
NDR 90,3 - Dat Wedder för uns in Hamborg
In Hamborg hebbt sik bummelig 50.000 Minschen dat Speel op dat Hilligengeistfeld ankeken. Dor weern so veel Lüüd, dat se nich all na de Fan-Zoon un na dat Public Viewing Flach rinlaten kunnen. Liekers se dor all de Köpp hebbt hangen laten, is allens verdreeglich bleven. Folgens de Polizei is dor nix Besünners passeert.
NDR 90,3 - Dat Wedder för uns in Hamborg
Nadem se de Warborg Bank bi'n Wickel harrn, geiht dat nu bi'n Ünnersökensutschuss vun de Börgerschop dorüm, wat för 'n Rull de HSH Noordbank bi 'n Cum Ex Schandaal speelt hett. De Bank harr to 'n Anfang vun de 2000er Johrn mehr as 100 Millionen Euro dörch verbaden Cum-Ex-Geschäften innahmen. Johrn later hebbt se dat Geld mit Tinsen torüchbetahlt. Nu wüllt se kloor kriegen, wat dor ok allens mit rechte Dingen aflopen is. De Oppositschoon meent, Finanzamt un Justiz hebbt dor nich richtig oppasst.
NDR 90,3 - Dat Wedder för uns in Hamborg
Se sall in't verleden Johr bi en Angreep op Rechtsextremisten in Ungarn mitmaakt hebben. Maja T. - en non-binäre Person, also en Minsch, de nich so recht weet wat he nu em oder ehr ween mag. Düütsche Behöörden hebbt Maja T. vör rund een Week na Ungarn utlevert. Un twoors noch ehrdat een dor rechtlich gegenan gahn kunn. Mehr as 600 Lüüd sünd dorgegen an'n Avend in Hamborg op de Straat gahn. Se sünd vun de Rode Flora, över St. Pauli bet na'n Bahnhoff Altnaa trocken.
NDR 90,3 - Dat Wedder för uns in Hamborg
Över Maanden hebbt se dorna söcht. Nu gifft dat en ne'en Standoort för den Hamborger Kultclub Molotow. To 'n Anfang vun 't tokamen Johr treckt de Club vun 't Nobisdoor na de Reeperbahn 136 hen. Dorhen, wo al de Beatles oder de Kinks speelt hebbt. Opstunns is dor noch de Club moondoo ünnerbröcht. Wat de Kulturbehöörd seggt, maakt de to'n Johrswessel hen dicht. Dat Molotow gifft dat al siet 34 Johr.
NDR 90,3 - Dat Wedder för uns in Hamborg
Dat Wedder för uns in Hamborg lett sik ja eerstmal noch ganz goot an, mit de schöne Sünn dor baven. Un mit bet to 25 Graad warrt dat vundaag ok gor nich mal so koolt. Liekers mööt wi to’n Nameddag un Avend hen wedder mit enkelte Flagen un villicht ok mal en Dünnerslag reken.
Morgen is dat för längere Tiet recht wat fründlich. Wi kriegt dor twoors blots noch bet to 21 Graad, man dorför is dat ok de mehrste Tiet dröög bi frischen Wind ut Süüdwest.
Un dat is dat Dack vun den Weltkriegsbunker bi dat Hilligengeistfeld, denn dat is nu gröön. Hen kummt en dor af vundaag över den Bargpadd. Dat kunn aver angahn, dat een dor eerst villicht ok noch’n beten wat töven mutt, wenn dat dor to vull warrn deit. Bummelig 23.000 Bööm un Strüker sünd dor op dat Dack vun den Bunker plant worrn. Nee binnen in den Bunker gifft dat dor ok en Hotel mit en Bar un veel Livemusik. Un bavento gifft dat dor binnen in ok en Sporthall för bet to 2.200 Besökers.
