Dat is en Schock för all de Verbrukers: Denn de Fernwarms, de vun de Hamborger Energiewarken kamen deit, de warrt üm un bi een Drüddel wat dürer. De Pries geiht af Mitt vun dat neegste Johr üm dörtig Perzent wat na baven un dat för üm un bi 260.000 Huushollen. Dat Ganze liggt an de hogen Investitschonen för den Utstieg ut‘e Köhl. Dorto mutt man weten: Fernwarmskunnen köönt jümehren Anbeder nich wesseln un dat geiht jeden veerten Huusholt in Hamborg wat an.
Dat geiht üm dree Regen, de nu in den Koalitschoonsverdrag vun Union un SPD binnenstahn doot. Denn dor heet dat, de ne’e Bunnsregeren will mehr vun dat Vermögen afgriepen, wat kriminell verdeent worrn is. In’e Tokumst mööt anklaagte Lüüd in de sonöömte Ümkehr vun de Bewieslast beleggen, dat se dat Vermögen, üm dat dat denn gahn deit, legaal tohoopweertschopt hebbt. In den Fall dröövt se dat Vermögen denn ok behollen. Anners, wenn‘t illegaal is, kriggt dat denn Vadder Staat. De Bund vun de Düütschen Kriminaalbeamten in Hamborg betekent dat Ganze as en gigantischen Dörchbröök bi den Kamp gegen dat Reinwaschen vun Geld un gegen dat organiseerte Verbreken.
Wegen dat Neeborebeet Diekmoor in Langenhoorn gifft dat al siet Johren Hickhack. Egens schüllt dor sövenhunnert Wahnen henkamen. De gröttste Deel dorvun warrt mit Geld ut’e Staatskass wat stütt. Man nu will de tokümstige Koalitschoon in den Bezirk Noord ut SPD, CDU un FDP de Plaans, de dat hierför betto geven deit, nochmal överarbeiden. Un doröver warrt de Bezirksversammeln Noord tokamen Week afstimmen. De Grönen smiet de Koalitschoon nu vör, dat se den Bo so blots in’e Läng trecken un wat dürer maken doot.
Güstern Avend is de Polizei in Einbüddel to Gang ween. Denn dor hebbt mehre junge Lüüd in en vull besetten Linjenbus mit en Softair-Pistool rümhanteert un düsse dorbi denn ok op welk Fohrgäst richt. Lüüd, de dor mit in den Bus seten hebbt, de hebbt denn bi de Polizei anropen un Bescheed seggt. Un de hett dorophen denn den Bus vun’e Lien fief an’n Siemersplatz anhollen. Vun dor hebbt se de fief jungen Lüüd, de so twüschen veerteihn un föffteihn Johr oolt ween sünd, mit op dat Revier nahmen, wo se denn vun jümehr Öllern afhaalt worrn sünd.
In Brüssel draapt sik vundaag de Verdedigensministers vun de sonöömte Ukrain-Kontaktgrupp. Bi dat Drapen geiht dat üm mehr Militärhölp för den Afwehrkamp gegen Russland. Grootbritannien hett al en Paket in’n Weert vun ümrekent mehr as fiefhunnert Millionen Euro künnig maakt. Un de Regeren in London denkt ok doröver na, Suldaten na de Ukrain hentoschicken. En Bericht vun den Telegraph na to uurdelen, kunnen düsse Suldaten denn bet to fief Johr lang in’e Ukrain blieven un hölpen, de Armee dor nee optostellen.
Vundaag sünd veel Wulken ünnerwegens. Meisttiets blifft dat aver dröög. Un ’n ganz beten wat kriegt wi vundaag ok de Sünn to sehn bi Temperaturen vun üm un bi föffteihn Graad. Un deels is verenkelt ok ornlich Wind mit dorbi. De warrt na’n Avend hen aver weniger. Un morgen treckt de Wulken denn so na un na wedder af un de Sünn kummt mehr vördag bi Temperaturen vun üm un bi twintig Graad.
Union un SPD hefft vörstellt, wat se in en ne'e Bunnsregieren maken wüllt – in Hamborgs Politik sünd de Plaans heel ünnerscheedlich opnahmen worrn. CDU-Baas Dennis Thering sä, dat weer goot, dat de Stüern nich stiegen schüllt. Melanie Leonhard vun de SPD will eerst noch töven, wat de SPD-Liddmaten to de Saak seggt. Sina Imhof, de ne'e Baassche vun de Grönen-Fraktschon sä, dat weer goot, dat dat bald en ne'e Bunnsregieren gifft. Dirk Nockemann vun de AfD hööl fast, dat dat mit de CDU keen Asylwend geev.
