In St. Georg sünd in de Nacht Schööt fullen. Dorbi is minnst een Mann versehrt worrn. Folgens de Polizei, steiht sien Leven aver nich op't Speel. Passeert is de Saak vör en Lokal an'n Hansaplatz in St. Georg. Dor hebbt twee Gruppen op'nanner schaten. In de Nacht hebbt se denn fief Keerls eerstmal fastnahm. Op de Flucht is nu nüms mehr. Üm wat dat bi de Striederee güng, is noch nich rut.
1,3 Millionen Krüüzfohrt-Gäst: So veel hett Hamborg in't verleden Johr tellt. Un dat is en ne'en Rekord. Meist 270 Mal hebbt Krüüzfohrtscheep in't verleden Johr in Hamborg fastmaakt. För düt Johr reekt de stadtegen Krüüzfohrtsellschop Cruise Gate Hamborg gors mit 300 Anlööp. Üm un bi half vun de Scheep bruukt bi jemehrn Stopp in Hamborg Landstroom.
Bummelig 100 Meter is de Elvtower nu hooch. Langt dat, oder sall he - so as plaant- dubbelt so hooch warrn? Linke un poor Kritikers wüllt, dat he so hooch blifft, as he nu is. Man bi de Stadtentwickelnsbehöörd hebbt se utreekt, dat sik de körtere Elvtower gor nich reken deit. Wat Senatersch Karen Pein seggt, wöörn sünnerlich de böversten Stockwarken de Privatinvester högere Quadratmeter-Priesen bi de Hüer inbringen.
Opmal sünd Ünnerwaterleitens, de uns mit Stroom versorgen doot, twei. Sowat is in letzte Tiet fakener in de Oostsee passeert. Dorüm löppt dor nu en Insatz vun't Bündnis för Verdedigen NATO. Un dorför schickt Sweden nu bet to dree Kriegsscheep. Swedens Ministerpräsident Ulf Kristersson sä dorto: "Wi un uns Naverlänner sünd hybride Angrepen utsett". Westliche Politikers glöövt, dor stickt Russland dorachter."
Dat weer en reellet Speel. Dat sä de Hamborger Tennisprofi Alexander Zverev över sien Sieg to'n Optakt vun de Australian Open. In dree Sätz hett he den Franzosen Lucas Pouille slaan. Een Runn wieder is ok Laura Siegemund. Se hett de Amerikanersch Hailey Baptiste in dree Sätz slaan.
De mehrste Tiet is dat vundaag dröög, af un an kickt ok mal de Süün rut un dat bi een verdröömten Graad. Morgen is allens mööglich, Regen, Spütterregen oder Sneeregen bi bet to veer Graad. Dor mööt ji denn fix oppassen, dat kann denn ok mal goot glatt ween.
Festliche Kuliss för de Gröne Butenminmistersch. Annalena Baerbock weer güstern Avend bi de Neejohrsbegröten vun de Gröne Frakschoon in 't Hamborger Raathuus. Een Thema weer de Frachter, de dor in de Oostsee havareert is. Wat dat utsüht hett de de russ'sche Schaddenflott tohöört. Baerbock holl Russland vör, se nehmt en Katastrooph för de Ümwelt bewusst in Koop. De Neejohrsbegröten vun de Grönen stunn ganz in't Teken vun de Bunnsdags- un de Börgerschopwahl.
