Hamborg hett wählt un hier bi uns in’e Stadt blifft de SPD de starkste Kraft. Dorna to uurdelen, wat bi de Wahl nu för’t Eerste bi rutsuert is, dor kaamt de Soziaaldemokraten op 33,5 Perzent un lannt dormit düütlich wiet vörn vör de annern. De CDU kummt op 19,8 Perzent un de Grönen op 18,5 Perzent vun’e Stimmen. De Linke kummt op 11,2 Perzent un de AfD op 7,5. FDP, BSW un Volt sünd all dree nich in de ne’e Hamborgische Börgerschop mit binnen. De SPD kunn dormit nu mit Börgermeister Peter Tschentscher mit de root-gröne Koalitschoon wiedermaken. För Tschentscher stünn dat tominnst bavenan. He sä aver ok, he wull ok mit de CDU snacken.
Frankriek un Grootbritannien hebbt tohoop en Plaan för en Wapenroh in’e Ukrain utarbeidt. Dat sä de franzöösche Präsident Emmanuel Macron to dat Blatt „Le Figaro“. Man de Wapenroh hett ok’n poor Schranken: Denn se gellt een Maand un man eerstmal nich direktemang an’e Front. Bi den Plaan geiht dat üm en Wapenroh in‘e Luft, op’e See un schall bavento denn ok för Energieanlagen gellen.
In’n Hamborger Haven sünd üm un bi 5.000 Liter Ööl in’e Elv rinlopen. So as de Füerwehr dat seggen deit, hett op en Firmenflach an’n Kattwykhaven en Swoorööltank en Leckaasch. Deswegen hebbt se nu ok Öölsparren insett, üm dat Ganze optofangen. Vundaag wüllt de Insatzlüüd tohoop mit de Ümweltbehöörd seggen, woans se dor nu wiedermaken doot.
Bi en Verkehrsunfall in’n Süden vun Hamborg, in Wilsdörp, dor is verleden Nacht en Autokutscher swoor wat bi to Schaden kamen. An en Ampel op de Wilsdörper Straat hett he en annern Wagen rechts wat överhaalt hatt, üm denn aver links aftobögen. Man dorbi is he mit siene Kist gegen de Ampel rummst. De 20 Johr ole Keerl müss na’t Krankenhuus hen. Bavento hett ok en 17 Johr ole Bifohrer vun dat annere Auto bi de ganze Saak licht wat bi afkregen.
In’n Oosten vun Hamborg geiht dat vundaag los, dat de Streck vun’e U2 ünnerbraken is un dat eerstmal över dree Weken henweg twüschen de Hammer Kark un Legienstraat. Lüüd, de dor ünnerwegens sünd, de schullen so üm un bi 20 Minuten mehr Tiet inplanen, denn an Steed vun’e U-Bahn föhrt dor nu Bussen. So as de Hoochbahn dat seggen deit, düert de Arbeiden dor an ünnerscheedlich Steden alltohoop twee Maand. Dat schall nu aver dat letzte Tuur ween, wo se in’n Oosten vun’e Stadt wat dichtmaken doot, üm de U4 wat länger to maken.
Bi de Oscar-Verlehen in Hollywood hett de Film „Anora“ ornlich Priesen afrüümt. Dat is en Tragikkumedi, de in de Gruppen beste Film, beste Regie, beste Snitt, bestet Originaaldreihbook un beste Hööftdorstellersch de Nees vörn hatt. Un dat is de Schauspelersch Mikey Madison, de in düsse Kategorie uttekent worrn is. Bi de Mannslüüd is dat de Schauspeler Adrien Brody, de för siene Rull in dat Drama „The Brutalist“ en Oscar kregen hett.
Den ganzen Dag över hebbt wi mit ornlich Wulken to doon. Hier un dor kriegt wi de Sünn aver ok’n beten wat to sehn. Meisttiets blifft dat dröög, regen deit dat blots ganz wenig bi Temperaturen vun nich mehr as teihn Graad. Opstunns sünd dat een Graad in Curslaak (Kl. 9:30). Un morgen maakt dat Wedder denn blots en Kopie vun vundaag.
