So as dat utsüht, dor dröfft de Ukrain nu woll mit Wapen ut’e USA wieder na achtern hen, na Russland rin, scheten. So as dat nu in mehrere Medien to hören un to lesen is, hett woll US-Präsident Joe Biden de Schranken, de dat in düsse Saak betto noch geev, opböhrt. De Kreml-Böverste Wladimir Putin harr dorför, dat wohrhaftig ok to doon, ümmer wedder wohrschaut hatt. Denn för Moskau weer dat denn so, as weren de NATO-Länner af den Momang in den Krieg mit dorbi. De Grund för Biden, nu en annern Kurs to stüern, is woll, dat in’e Twüschentiet in Russland Suldoten ut Noordkorea statschoneert sünd.
Sietdem seggt worrn is, dat dat nu in Düütschland Neewahlen geven deit, warrt över de K-Fraag snackt. Man Lars Klingbeil, de Böverste vun’e SPD, de will geern, dat düsse Debatt en Enn hett. Un so hett he denn in de ARD-Sennen Miosga seggt: „Wi wüllt mit Olaf Scholz as Kanzlerkannidat antreden“. Över dat Wekenenn henweg harrn sik ok twee Bunnsdagsafornten vun’e SPD dorför utsnackt hatt, dat Verdedigensminister Boris Pistorius kannideren dee. De hett in den Bericht ut Berlin aver seggt hatt, dat he keen Interesse doran harr, Kanzler to warrn.
Fief Maand sünd de Bezirkswahlen nu al her un nu sünd dor in de Bezirken Noord un in Wandsbeek wichtige Wieken stellt worrn: In Wandsbeek hebbt sik SPD, Gröne un FDP nu tohoop op en Koalitschoon op enigt. Man de Grönen müssen bi sik in’e Verkehrspolitik bi jümehr Verlangen wat afstrieken, denn de Wandsbeker Chaussee to’t Bispeel, de schall so blieven as se is, mit söss Fohrbahnen. Un in den Bezirk Noord schall nu Bettina Schomburg vun’e SPD as ne’e Böverste vun dat Bezirksamt dor op Michael Werner-Boelz vun’e Grönen op nakamen. De sitt dor noch betto op den Amtsstohl.
In Hamborg nehmt se faken Parkplätz weg: Autos, de afmellt sünd un denn an’n Stratenrand blots noch so vör sik hengammeln doot. Mehr as veerdusend vun jüm sünd bet Enn vun’n Septembermaand tellt un to Papeer bröcht worrn. De CDU-Frakschoon verlangt nu in en Andrag, dat dat Straafgeld hierför düütlich wat na baven sett warrt. Opstunns sünd dat dreehunnert Euro, de een dorför betahlen mutt, wenn de Stadt ran mutt un so en Schrottauto afslepen deit.
In’e verleden Nacht hett en negenuntwintig Johr ole Keerl de Polizei in Hamborg un ok in Kiel ornlich wat in‘e Gang hatt. De Mann harr in’e Glacischaussee an’t Hilligengeistfeld en Reddenswagen klaut. Un mit düssen is he denn över de A7 henweg na Kiel hen utneiht un de Polizei em achterna. Op de Fohrt na Kiel hen harr he denn mehrfach dormit drauht hatt, sik un anner Lüüd in’e Luft to jagen. Hüüt fröh an’n Morgen kunnen se em denn in Kiel fastnehmen, de Schandarms kennen em al.
De Ole Elvtunnel is siet hüüt fröh knapp dree Weken lang ganz un gor dicht. Dat heet, dor kann een denn ok nich to Foot dörkamen noch mit dat Fohrrad. Dat Ganze gellt denn bet na’n sössten Dezember hen un liggt doran, dat se den Olen Elvtunnel instand setten doot. Dor mutt en ne’en Belag op’e Fohrbahn rop un bi de Arbeiden köönt giftige Dämp bi opkamen. De HADAG richt denn wegen de ganze Saak an de beiden tokamen Wekenennen as Utgliek en Fährverkehr in.
Dor kummt en Storm op uns to un vun den kann een al ’n beten wat vun marken dör den westen bet süüdwesten un deels ok al dullen Wind, mit den wi dat opstunns to doon hebbt. Vun’e Temperaturen her warrt dat vundaag mit bet to söss Graad noch’n Tick wat köhler as in’e verleden Daag. Un dorto kriegt wi vundaag denn vun allens wat: veel Wulken,‘n beten wat an Sünn, Regen- un Graupelschuer un hüüt Nacht stedenwies denn villicht goors ok’n beten wat an Snee. Un morgen geiht dat Ganze denn nochmal so wieder as vundaag.
