Gruppenkloppereen, Drogen un mehr un mehr Elend: De CDU verlangt vun den Senat för Horborg nu en Maatregelpaket, jüst so as an’n Hööftbahnhoff un in St. Georg: Mit mehr Polizei, mehr Videokameras to’n Oppassen, en Zoon, in de Wapen verbaden sünd un den Ornensdeenst vun’n Bezirk, de gegen den Müll gegenan geiht. Dat allens weer in de Mitt vun Horborg nödig, sünnerlich in’t Phoenix-Viddel, meent de CDU Börgerschopsafoornte Birgit Stöver. Se bekrittelt ok, dat de Senat vun en „prinzipiell unopfällige Sekerheitslaag“ in’t Viddel snacken deit.
In dat Gebüüd weer mal en Ünnernehmen binnen. Neegst schall dat Huus in Langenhoorn to en Flüchtlingsquarteer ümboot warrn. Dat geiht üm en Gebüüd an de Tangstedter Landstraat, wo bummelig 250 Minschen ünnerkamen schüllt, de Asyl- oder Schuul söökt – un dat wohrschienlich vun Enn tokamen Johr af an. Plaant sünd Wahnens mit je veer bet söss Plätz.
Vundaag an’n Grööndünnersdag kunn folgens den ADAC to Oostern dat mehrste los ween op de Straten. Sünnerlich vun Middag af an warrt sik en Barg Minschen op den Weg maken un Familie oder Frünnen besöken oder in de Ferien fohren. De Ferienünnerkümst an Noord- un Oostsee sünd goot bookt, man op beide Sieden vun’n Elvtunnel gifft dat Maleschen dör Bosteden op de A7. To’n Nadelöhr bi’n Reisverkehr to Oostern kann de rotte Noorderelvbrüch över de A1 warrn. Dor rekent de Autobahn GmbH Noord mit teemlich veel Stau. Wat ruhiger op de Straten warrt dat woll Oostersünnavend un -sünndag. Oostermaandag fohrt Velen denn wedder torüch – in söss Bunnslänner gaht de Ferien toenn.
Den US-Bunnsstaat Kalifornien langt dat: He sett sik gegen de weltwieden Töll vun US-Präsident Trump to Wehr un hett dorgegen Klaag vörleggt. De kalifoornsche Gouverneur un de General-Staats-Afkaatschop seggt, dat de US-Präsident mit de ne’en Töll över sien Rechten rutgeiht. De Kongress harr över de Töll afstimmen müsst. In Kalifornien warrt en Grootdeel vun de chineeschen Woren över den Seeweg na de USA importeert.
Auto twei, Föhrerschien weg, Autobahn meist twee Stünnen lang afsparrt – en Autofohrer, de ornlich duun weer, hett in de Nacht op de A25 en Unfall maakt. De 56-Jöhrige weer folgens Polizei an de Anslusssteed Neeallermeuh ut de Kurv rutsleudert worrn un gegen en Schild rumst. He sülvst hett sik nix daan. En Test hett wiest, dat he böös veel Alkohol in’t Bloot harr.
Dat weer en Liekop – un dat hett nich langt för den FC Bayern. De Football-Rekordmeister is ut de Champions League utscheedt, na en twee to twee bi Inter Mailand. Nu sünd de Bayern jüst so as Dortmund bi den Wettstriet rutflagen.
Vundaag hebbt de Wulken de Bavenhand un dat kann eerst noch en beten wat Natts vun baven geven, de Sünn kriegt wi meist gor nich to sehn. Bi 13 bet 14 Graad is dat düütlich frischer as opletzt. Opstünns sünd dat 10 Graad op de Veddel. An’n Stillfreedag is dat wulkendüüster un dat gifft deegte Regenschuern. De Temperaturen schafft dat blots noch op 10 bet 11 Graad.
