De Bökertoorn op’n Campus vun de Hamborger Staats- un Universitätsbibliotheek is marood un kann ok nich mehr trechtmaakt warrn. So as de Senaat dat seggen deit, hett dat Huus al so dulle Mängel bi de Brandschuul un bi de Statik, so dat de Füerwehr al bang weer, wenn dat mal brennen dee, dat dor denn de Decken bi rünnerkamen kunnen. Nu mööt meist een Million Böker, weertvulle Kunstsaken un Schriften gau wat utlagert warrn.
Noch vör Wiehnachten will de Hamborger Senaat den neegsten Huusholt fastleggen un afnicken. Un bi den geiht dat üm rund 44 Miliarden Euro. För wat se dat Geld allens nipp un nau utgeven wüllt, dat stellt de SPD un de Grönen vundaag vör. De CDU in Hamborg hett al seggt, dat se noch achtig Andrääg op’n Weg bringen wullen, wo se denn noch wat dör ännern wüllt. Blangen anner Saken verlangt se mehr Polizei, weniger Grunderwarvstüer un ok Stütt bi Eigenheimen för Familjen. Woans dat allens betahlt warrn schall, dat weet een aver noch nich.
De Stannsämter in Hamborg schüllt op lange Sicht digital arbeiden. Denn, wenn de Verwandten vun Minschen, de dootbleven sünd, en Starvuurkunn beandragen doot, denn mööt se dor ümmer lang op töven. In Wandsbeek kaamt de Mitarbeiders mit jümehr Arbeit al nich mehr na un nehmt deswegen ok al keen ne’e Andrääg mehr an. In de tokamen veer Maand wüllt se denn eerstmal de Fäll afarbeiden, de sik al stapelt hebbt. Üm ne’e Andrääg, de ut Wandsbeek kamen doot, dor kümmert sik denn nu eerstmal de Stannsämter vun de anner Bezirken üm.
In Hamborg hett en dacklose Keerl bi Temperaturen üm den Frostpunkt rüm vör dat Krankenhuus Heidbarg dor op töven müsst, dat se em afholen deen. De Nootopnahm harr dat Team vun den Bus för de Küll Bescheed seggt hatt, dat se den Keerl na en Inrichten vun dat Winternootprogramm henbringen schullen. Un dat liekers de Ehrenamtlichen dorför egens gor nich tostännig sünd. Denn so as de Soziaalbehöörd dat neemich seggt, mööt sik de Kliniken üm sone Transporten sülvst üm kümmern. Passeert is dat Ganze an’n Dunnersdag. Nu will sik de Asklepios-Klinik den Fall noch mal nipp un nau ankieken.
In Lohbrüch hett en twölf Johr ole Jung en gröttere Söök vun’e Polizei utlööst hatt. He weer güstern Avend na en Striet in sien Slaapantog vun tohuus weglopen un verswunnen. Mit Polizeihelikopter un mehre Striepenwagens weern se em denn an’t Söken. Na en gode halve Stünn duuk de Jung denn mitmal wedder op. Passeert weer em aver nix.
De Justiz in’e USA lett nu wichtige Straafverfohren na, wo dat bi gegen Donald Trump güng. Denn de treckt nu ja as Präsident wedder in dat Witte Huus in. Un dor geiht een denn normalerwies nich mehr gegenan, wenn de in sien Amt is. Dor wies nu nochmal de tostännige Minsch op hen, de de Fäll extra ünnersöken schull. Bi een vun de beiden Verfohren güng dat üm den Versöök, dat, wat bi de Präsidentschopswahl 2020 bi rutsuert weer, nadreeglich noch to kippen. Un in den annern Fall schull Trump geheeme Regerenspaperen mit na Huus nahmen hebben.
Dat warrt vundaag en Dag mit vele Wulken, ’n beten wat an Sünn, meisttiets is dat dröög, na’n Avend hen is denn dat een oder anner Regenschuer mööglich un dat allens bi Temperaturen vun üm un bi negen Graad. Un morgen: Dor gifft dat denn noch ’n poor mehr Wulken, weniger Sünn, ’n beten wat an Regen, na’n Avend hen goors ’n beten wat mehr un dat Ganze denn bi Temperaturen vun üm un bi acht Graad.
