De Hamborger Immobilienpriesen gaht vun Stadtdeel to Stadtdeel ümmer wieder ut’nanner. Dat is ut den ne’en LBS-Immobilienatlas ruttolesen. En Bispeel: In Harvstehuud oder in’e Havencity betahlt een in’n Dörsnitt 11.500 Euro för den Quadraatmeter. In Marmsdörp, Huusbrook un Steilshoop sünd dat op’e anner Siet blots 3.500 Euro. Un bi Eenfamiljenhüüs süht dat meist jüst so ut.
US-Präsident Donald Trump hett nu ne’e Töll ankünnigt. Op den Import vun Saken ut Europa fallt denn 20 Perzent op an. Trump sä as Grund, so schull de amerikaan‘sche Industrie wedderboorn warrn. De EU-Kommischoon snackt vun en sworen Slag in’t Kontor för de Weertschop op’e Welt. De EU hett Gegentöll ankünnigt.
Kameras, de Gesichter kloorkriegen un wies warrn doot un so denn ok Minschen bi rutfinnen köönt – dat allens is mit künstliche Intelligenz mööglich. Hamborgs Datenschuulbeopdraagte Thomas Fuchs verlangt nu aver klore un enge Schranken för sowat, wenn denn sone Software insett warrt. In Behöörden kann KI, so as Fuchs dat seggen deit, en bannige Stütt ween, so as bi dat Verarbeiden vun Texten oder wenn een Daten analyseren deit.
In’e USA gifft dat dör Medienberichten opstunns en Hen un Her, wat den Milliardär Elon Musk angahn deit. So as welk Medien dat schrieven doot, warrt he woll villicht sien Job as wichtigsten Raatgever vun Präsident Trump opgeven. En Sprekersch vun de Regeren snackt bi de Berichten vun’t Woort her vun „Müll“. Musk wöör denn gahn, wenn he siene Arbeit maakt harr. Mehre Medien snackt dorvun, Trump harr den Afgang in de tokamen Weken ankünnigt. Musk is as Raatgever dorför tostännig, staatliche Strukturen aftoboen. Aver so as he dorbi vörgahn deit, sorgt dat för Striet.
En twee Johr ole Jung kummt bi en Autorennen in Billsteed üm’t Leven. In den Perzess üm düssen Fall hett nu de Autokutscher, de Doodsfohrer vör dat Landgericht utseggt. De 25 Johr ole Keerl sä, he un sien Fründ harrn verleden Sommer an en Ampel mitmal en Rennen afmaakt hatt. Un denn weern se beide mit 180 Kilometer de Stünn över den Schiffbeeker Weg raast. As se denn achteran mit en anner Fohrtüüg tohoopstöten deen, dor kööm denn de lütte Jung bi üm’t Leven. De Tweeschenbroder vun den Lütten hett de ganze Saak överleevt.
Dat is en lütten Droom, de dor nu wohr warrn deit – so beschrifft de Trainer vun’n VfB Stuttgart dat, wat he nu mit siene Mannschop henkregen hett. Denn dat Team vun Sebastian Hoeneß hett dat nu na dat Finaal vun den DFB-Pokaal hen schafft. Stuttgart hett Leipzig mit dree to een ut den Wettstriet rutsmeten un mutt nu in dat Finaalspeel Enn vun’n Maimaand gegen Arminia Bielefeld ran.
Un dat is ok vundaag kort vertellt, so as güstern: Dat warrt goot bi Temperaturen vun bet to 19 Graad. Un över morgen, dor mööt wi uns denn ok keen grote Gedanken maken, denn dat geiht ok morgen eerstmal so wieder as vundaag.
