Twee Daag na den Dood vun Paapst Franziskus sall vundaag sien Lieknam in’n Petersdom in Rom opbohrt warrn. Denn köönt sik de Minschen bet Freedag vun em verafscheden. In düsse Minuten warrt he in en Prozeschoon na den Petersdom hen bröcht. För Sünnavend sünd en grote Truerfier op den Petersplatz un de Bisetten vun’n Paapst in de Basilika Santa Maria Maggiore buten vun’n Vatikan plaant.
Ok hier in’n Noorden truert vele Minschen üm Franziskus. Dat Erzbistum Hamborg laadt an’n Freedagavend to’n Gottsdeenst in den Mariendom in. Dat Leit för dat so nöömte Pontifikalrequiem hett Erzbischop Stefan Heße. De Gottsdeenst fangt avends viddel na söss an un warrt ok live in’t Internet överdragen.
Dat Amtsgericht St. Georg hett en LKW-Fohrer freespraken. He hett in'n November 2022 en Footgänger in Billsteedt överfohrt. De 65-Johrige weer noch an de Unfallsteed sturven. För dat Gericht weer dat keen fohrlässige Töten. Domals geev dat veel Verkehr, de Fohrer kunn man blots Stop-and-Go fohren - un hett dordörch den Footgänger, de direktemang vör den LKW de Straat krüzen wull, översehn.
"Hamburg Werbefrei" - so heet dat Volksbegehren, wat vundaag in Hamborg losgeiht. De Initiativ will dat grote Reklaam-Bildschirmen as an'n Jungfernstieg oder an de Lannensbrüchen afschalt warrt. Dat wöör Verkehrsdeelnehmers ahn Noot aflenken. Ok de Energieverbruuk un de Lichtversmudden kunnen so verringert warrn. Keen Problem hett de Initiativ mit klass'sche Litfaß-Sülen. Binnen vun dree Weken mutt "Hamburg Werbefrei" 65.000 Ünnerschriften sammeln. Blots denn kümmt dat to en Volksentscheed.
In'n indschen Deel vun de Himalaya-Region Kaschmir hett dat en Terroranslag geven, neem minnst 26 Minschen bi to Dode kemen. Folgens de Polizei sall sik de Angreep gegen hinduistsche Glövige richt hebben. Dorför maakt se en islamistsche Terrorgrupp ut Pakistan för verantwoortlich. De Extremisten hebbt dat Maal, op Indien sien Souveränität över de Region op daal to gahn.
Dat weer güstern al dat drütte Mal: Füeralarm in't Westfield-Inkoopzentrum in't Överseequarteer. Man ok dütmal weer dat blots en Fehlalarm. Wat en Füerwehrspreker sä, is en Brandmellanlaag gegen twintig na fief an'n Nameddag in en Gastroberiek losgahn. Dat is al an'n Karsünnavend un an 10. April to Fehlalarmen kamen. De Spreker vun de Füerwehr meen, bi so en grotet ne'et Huus kann dat sünnerlich an'n Anfang to sowat kamen, wieldat dat dat dor jümmer noch Boarbeiden geven deit.
Bet to 17 Graad warrt dat noch warm, liekers seht wi vundaag vele Wulken, man ok de Sünn kickt mal kort vörbi. An’n Nameddag kann’t mal enkelte Flagen geven.
Morgen fröh geiht de Dag mit lütt beten Regen los, da warrt denn aver stückerwies jümmer wedder wat dröger bi bet to 17 Graad.
