Bi de Bunnsdagswahl in veer Weken, dor köönt de Lüüd in Hamborg twüschen 13 Parteien mit de ehre Lannslisten utsöken. Dat hett de Lannswahlutschuss mitdeelt. Veer afgevene Vörslääg hebbt dat nich schafft. Mit dormang sünd twee Lannslisten vun dat Bündnis Sahra Wagenknecht - de vun de Bunnspartei nich anerkennt warrt. Ok nich schafft mit jem ehre Lannslisten hebbt dat de Europapartei MERA25 un de Piratenpartei - de hebbt beid nich noog Ünnerstütter-Ünnerschriften tosamen kregen.
Wo vele Fohrtüüch sünd op de Hamborger Straten ünnerwegens? Un woneem staut sik de Verkehr? Wetenschopslüüd vun de HavenCity Universität entwickelt tosamen mit Projektpartners en dichtet Daten-Nettwark. Bald schüllt wichtige Informationen to'n Stratenverkehr vun Funkempfängers op de Ampeln oder de Stratenlaternen sammelt warrn. De Grundlaag dorför billt en ne'et 6G-Mobilfunknett. Das Bunnsverkehrsministerium gifft för dit Projekt 25 Millionen Euro.
Bunnskanzler Olaf Scholz hett den CDU-Oppositschoonsföhrer Friedrich Merz wohrschaut, he schull nich mit de AfD ehre Stimmen en scharpere Migratschoonspolitik dörsetten. De Brandmüer to de AfD dörv nich bröckeln, sä Scholz to de Stuttgarter Zeitung. Un he hett Merz an den sien Verspreken erinnert, nich mit de AfD tosamen to arbeiden. Merz harr na dat Attentat vun Aschaffenburg seggt, he wull in'n Bunnsdag en scharpere Migratschoonspolitik beandragen, un em weer dat nich wichtig, wokeen dor tostimmen deit.
Knapp fief Johr na den eersten Corona-Fall in Düütschland verlangt Bunnspräsident Frank Walther Steinmeier en Oparbeiden vun de Pandemie-Politik. Passeren schall dat na de Bunnsdagswahl. Wenn en ne'e Regeern sik dor nich üm kümmern deit, denn wörr he sülvst dat doon, sä Steinmeier to dat Magazin "Stern". He meent, dat vele in Düütschland sik sowat wünschen doot, dat Ünnersöken vun all de Schutzregeln, dat Impfen un dat Dichtmaken vun de Scholen.
Schall dat Bernhard-Nocht-Institut för Tropenmedizin en annern Naam kriegen? Dor warrt över nadacht, wiel den Naamsgever Nocht vörsmeten warrt, dat he womööglich en Rassist un Natschonalist ween hebben schall. Dat Institut hett Recherchen in Opdrag geven, un de hebbt ünnerscheedliche Resultaten bröcht. Man dor keem ok rut, dat Nocht keen aktiven Natschonaalsozialist ween is. Över en eventuellen annern Naam för dat Institut will de Vörstand in twee Weken Raat slaan.
De Dag bringt dicke Wulken un jümmer wedder Regen. De warrt aver an’n Namiddag weniger, un dat warrt bet 7 Graad warm. Nu sünd dat an de Bill 6 Graad. Morgen geiht dat mit dicke Wulken los, dorto en beten Regen, man de Namiddag bringt hier un dor ok en beten Blau, bi blots noch 5 Graad.
De Streck, woneem jichtenswann de U5 langslopen deit, de schall nu woll noch mal ännert warrn. Dorna süht dat nu tominnst eerstmal ut. Denn so as NDR 90,3 dat wiesworrn is, kunn de Stoppsteed an’n Jungfernstieg wegfallen. Dordör wöör denn de ne’e U-Bahnlien vun’n Hauptbahnhoff bet hen na’n Stephansplatz in eens dörföhren. Un dat een denn gau mal even ümstiegen deit na de annern U- un S-Bahnlienen hen, dat weer bi düssen Plaan denn nich mööglich. So as de Verkehrsbehöörd dat seggt, warrt aver eerst in twee Weken een för allemal fastleggt, wat nu is.
