De SPD liggt vörn, CDU un Linke haalt op. Dat is opstunns de Laag in de Hamborger Politik. Dat wiest en ne’e Ümfraag vun Infratest-Dimap, de in’n Opdrag vun’n NDR maakt worrn is. Dorna to uurdelen liggt de SPD so as vörher bi 31 Perzent. De gröne Regerenspartner verlütt twee Punkten un kummt nu op 20 Perzent. De CDU leggt to üm een Punkt op nu 18 Perzent. De AfD liggt so as vörher ok al bi 9 Perzent. Un de gröttste Winner siet Januor sünd de Linken. Se liegt bi 8 Perzent. Dat is en Plus vun dree Punkten. FDP un BSW kaamt op je 3 Perzent.
In den Hamborger Wahlkamp güng dat nu jüst nochmal böös wat hen un her mit Reed un Gegenreed twüschen de dree Börgermeesterkandidaten. Peter Tschentscher vun’e SPD, Katharina Fegebank vun’e Grönen un Dennis Thering vun’e CDU sünd güstern Avend tohoopdrapen bi en so nöömtet Triell. Un dorto inlaadt harrn de Zeit Hamborg un Radio Hamborg. Streden hebbt se ok över den Wahnensbo. Thering bekrittelt, dat to wenig Wahnen boot worrn un deswegen de Hüern na baven gahn weern. Man Tschentscher un Fegebank wiesen dat trüch.
Wenn dat na US-Präsident Donald Trump gahn dee, denn schullen de USA de Kuntrull över den Gazastriepen övernehmen. Dat sä Trump bi en Presskunferenz, de he tohoop mit den israel’schen Regerensböversten Benjamin Netanjahu in Washington geven hett. He sä: Gaza weer opstunns keen Oort, wo een leven kunn. De USA wören den Landstriepen an’e Küst, wat de Weertschop angahn dee, eerstmal vöranbringen. Un dorna kunnen denn de Lüüd wedder trüchkamen. He hett ok nich utslaten hatt, dor amerikan’sche Suldoten hentoschicken, dormit he siene Plaans denn ok ümsetten kunn.
Egens wullen se dat güstern in’t Hamborger Raathuus nu vun Amts wegen her kunddoon, dat sik de Senaat un de Milliardär Klaus-Michael Kühne enigt harrn. Man de Termin is afseggt worrn. So as de Kühne Stiften dat seggen deit, sünd rund üm den finalen Verdrag noch apene Fragen opdükert. Un in’e Stadt kummt in’e Twüschentiet ümmer mehr Gegenwind op gegen düsse Plaans. So kummt opstunns Kritik vun‘n Denkmaalvereen un vun’e Linken.
Blangen düsse Fraag, wat en ne’e Oper angahn deit, dor gifft dat opstunns noch en ne’e Fraag bavento in uns Stadt: Un dat is de Fraag na en Magnetsweevbahn in Hamborgs Süden, wat een de, wat de Technik angahn deit, henkriegen dee? Dat is NDR 90,3 wies worrn, dat de Stadt dat opstunns nakieken laten deit. Dat geiht üm en annern Weg, den een denn blangen de S-Bahn noch bavento hett twüschen Hööftbahnhoff un Horborg. För den Senaat steiht opstunns noch de U-Bahnlien veer ganz baven an, dat se düsse länger maken doot. Man anner Mööglichkeiten, so as nu en Magnetsweevbahn, de schüllt nich utslaten warrn. Un langslopen kunn düsse denn an de Georg-Wilhelm-Straat över de Mengestraat hen na Kirchdörp-Süüd.
Hüüt fröh sünd noch veel Wulken ünnerwegens, de denn ok noch den een or annern Regendrapen mitbringen doot. Den Rest vun’n Dag blifft dat aver meisttiets dröög un de Sünn kunn hüüt Namiddag denn ok noch mal ’n beten wat dörkieken bi Temperaturen vun bet to söven Graad. Opstunns sünd dat dree Graad in Dulsbarg. Kort noch de Utsichten: Morgen gifft dat weniger Regen un ‘n beten mehr wat an Sünn bi Temperaturen vun bet to söss Graad.
In Wandsbeek hett dat hüüt Morgen ornlich wat rummst, denn in en Mehrparteienhuus an de Ohrensborger Straat geev dat en Exploschoon. Dat Huus müss rüümt warrn. Un för all de Lüüd, de dor wahnen doot, hebbt se eerstmal en hvv-Bus praatstellt hatt. So as de Polizei dat seggen deit, is bi de ganze Saak aver nüms bi to Schaden kamen. In’t Parterr vun dat Huus is normalerwies en Pizzaladen binnen, man de is nu twei. Woso dat rummst hett, dat is noch unkloor. En Statiker schall sik dat Huus nu eerstmal ankieken.
