De Ampel-Koalitschoon is op Schiet lopen un dat treckt dat een oder anner na sik. Ok dat en för Hamborg wichtiget Projekt an't Kippeln is. De Bahnstreek twüschen Hamborg un Berlin kann woll för't Eerst nich op Schick bröcht warrn. Dat liggt doran, dat se den Huusholt för dat tokamen Johr noch nich beslaten hebbt. Dorüm kunnen de Opdrääg för dat Vörhebben noch nich geven warrn. De Düütsche Bahn wull de Bahnstreek vunaf August 2025 för negen Maand dicht maken un saneren.
De Worenümslag in'n Hamborger Haven geiht torüch. Siet Anfang vun't Johr is he üm dree Perzent bargdaal gahn. Folgens Haven Hamborg Marketing liggt dat ok an de swacke Weertschop un den Krieg in de Ukrain. De Senat hööpt nu op den Havendeal mit de Swiezer Reederee MSC. Güstern seev ok de ukrainsche Wettbewarvbehöörd "Ja" dorto. Un dat weer nödig wieldat de HHLA en Terminal in'n Swattmeerhaven Odessa bedrieven deit
Bunnskanzler Olaf Scholz telefoneert mit den russ'schen Präsident Wladimir Putin - un de Ukrain reegt sik op. Präsident Wolodymyr Selenskyj sä in Kiew, Scholz harr de Büx vun de Pandora open maakt. He meen, jüst düsse Oort vun Telefonaten weern dat, wat Putin will: Dat sien Isolatschoon minnert warrt. Scholz hett Putin anropen un verlangt, dat he de Truppen ut de Ukrain aftreckt.
In Rissen hett de Polizei Hamborg an'n Morgen unnütt mit en Drohn un Hunnen na en Autofohrer söcht. He weer in'n Klövensteen mit en Meedwagen gegen en Boom prallt un achterna in'n Graven lannt un flücht. De Unfallfohrer leet den tweien Wagen dor un flücht. De Polizei geiht dorvun ut, dat de Fohrer versehrt is.
Nich blots de Hamborgers möögt uns Wiehnachtsmarkten, ok de Touristen treckt se an. Wat Hamborg Tourismus seggt, reekt se dorüm in de tokamen Weken mit mehre Millionen Gäst, de en Utfloog maakt oder ok över Nacht blieven doot. To de Höhepunkten blangen de Wiehnachtsmarkten höört sünnerlich ok de Märkenscheep an'n Jungfernstieg, de Wiehnachtsparaad dörch de Binnenstadt un de Christmas Garden in'n Loki-Schmidt-Goorn. Man vun de Wiehnachtstiet hebbt ok de Levensmiddel- un de Eenzelhannel veel Goods.
Dat weer de drütte Sieg in't drütte Speel: Tennisprofi Alexander Zverev is bi de ATP Finals in't Halffinaal introcken. De Hamborger hett gegen den Spanier Carlos Alcaraz wunnen un dröppt vundaag op Taylor Fritz ut de USA.
Wenn ji an’n Sünnavend op Sünn luert, denn köönt ji aver lang söken, de maakt vundaag free. Eerst recht an’n Avend. Dorför gifft dat masse Wulken bi bet to negen Graad. To’n Avend hen, warrt dat ok jümmer fuchtiger un de Wind weiht frisch ut Süüdwest.
Morgen hollt dat denn mal af un an mit den Regen wedder op, un jümmer mehr Wulken sünd to sehn. Dat lockert sik ok mal bi bet to acht Graad op. Wat sik dat ok so mild anföhlen deit, dat is en anner Fraag, denn de Wind ut Süüdwest bet West warrt tosehn, dat he allens geven deit.
