Bunnsbinnenministersch Nany Faeser, de hett dat rechtsextremist’sche „Compact“-Magazin verbaden. Dat hett dat Ministerium vun de SPD-Politikersch hüüt künnig maakt. Vun hüüt morgen af an sünd Beamte dorbi bunnswiet Rüüm nipp un nau antokieken, ünner annern in Berlin un Potsdamm. Ok de Wahnung vun’n Chefredakteur Jürgen Elsässer un sien Fruu in Falkensee bi Brandenborg hebbt se besünners in’t Oog. De Polizei, de schall Vermögen un annere Bewiesen sekenstellen.
En Tahl maakt de Wahnungsnoot in Hamborg noch mal sünnerlich düütlich: Bi de SAGA, dor sünd middewiel 100.000 Minschen op List för en Wahnung. Opstunns treckt meist keen mehr ut, rund 20 Johr blievt de Meders in jümehre günstigen SAGA-Wahnungen. Düssen Sommer köönt sik de Meders op Geld freuen, dat trüch betahlt warrt. Denn de Kosten för’t Inböten sünd alltohoop rünner gahn.
Goot dree Veertel vun de jüd’schen Lüüd in Hamborg, de hebbt in de letzte Tiet antisemit'sche Vörfäll beleevt. Se sünd beschimpt oder bedroht oder Lüüd sünd to todringlich worrn. Dat is bi en Studie vun de Polizei-Akademien in Neddersassen un Hamborg rutsuert. De meisten Saken, de hebbt se nich mellt bi de Polizei, so dat se dor ok nich bekannt sünd. För de Studie sünd rund 550 jüd’sche Lüüd befraagt worrn.
In de USA, dor is Donald Trump nu offiziell Kandidaat vun de Republikan’schen Partei för de Präsidentenwahl. Op den Nominerensparteidag in Milwaukee, dor hett he de Mehrheit vun de nötigen Delegeertenstimmen kregen. Dat Amt vun den Viezpräsidenten schall J.D. Vance, Senater ut Ohio övernehmen. Vance gellt as arbeitnehmerfröndlich, butenpolit‘sch is he gegen dat starke US-Engagement för de Ukraine.
Ok wenn dat in Berlin bi den Huushoolt kriseln deit, sünd twee grote Waterstoffprojekten in Hamborg seker. De plaante Grootelektrolyseur in Moorborg un 40 Kilometers Waterstoffnet in’n Haven, de köönt boot warrn. Denn de Bund, de gifft 280 Millionen Euro dorto un tahlt dormit twee Drüttel vun de Kosten. De Elektrolyseur, de schall grönen Waterstoff herstellen. De gellt as de Energie vun de Tokunft för en Industrie, free vun CO2.
Planten un Blomen is hüüt un morgen dicht – un twoors twüschen Mess, Dammtor un Marseiller Promenaad. De Kampmiddelrüümdeenst kiekt dorna, wat in’n Baden noch Blindgängers ut’n Krieg steken doot. Dorüm mutt de Park för hüüt un morgen to maakt warrn. De ole Botan’sche Goorn un de Wallanlagen, de blievt aver apen.
Hüüt hebbt wi Wulken un Gewidder, later warrt dat fröndlich bi bet to 24 Graad. Opstunns meet wi bi ju in de Havencity 17 Graad. De Wind weit flau ut Süüdwest. Morgen kriegt wi Wulken, Sünn un Schuers bi bet to 22 Graad.
