Wat hett de Hamborgsche Börgerschop to Migratschonspolitik to seggen? Güstern geev dat en aktuelle Stunn över dat Thema. In de Debatt möök Börgermeester Peter Tschentscher vun de SPD kloor, dat he op gor keen Fall mit de AfD tohooparbeiden wöör. De AfD wies sik man seker, dat de sonöömt Brandmuer gegen se nich mehr lang stahn wöör. Nipp un nau dat möök de SPD, de Grönen un de Linke Sorgen.
Migratschonspolitik is güstern ok Thema in'n Bunnsdag ween. An'n Avend kunn sik de Union mit en Andrag dörsetten. Dat güng ünner annern dorüm, dat Lüüd, de ahn Dokumenten na Düütschland inreisen wüllt, an de düütschen Grenzen afwiest warrn kunnen. Friedrich Merz, de Kanzlerkandidat vun de Union, harr in Koop nahmen, dat de Andrag mit Stimmen vun de deelwies rechtsextrem AfD dörkeem. Dat harr dat in'n Bunnsdag so noch nich geven. Bi de AfD hefft se sik över de Saak freiht; de SPD, de Grönen un de Linke weren achterher bannig gallig. In de ARD nööm Bunnskanzler Olaf Scholz vun de SPD dat en "Tabubröök".
Na en Floogunglück in de US-Hauptstadt Washington D.C. gifft dat woll mehr as en Dutz Dode. Dat mellt twee US-Senders. Dor heet dat, dat man bet nu keen funnen harr, de dat överlevt hett. En Passagiermaschien wull in Washington landen un weer mit en Militärhelikopter tosamenknallt. De Fleger un de Heli weren denn in'n Potomac River fallen. In de Passagiermaschien sünd veerunsüsstig Minschen ween. An Bord vun'n Helikopter weren drei Minschen – dat is woll en Trainingsfloog ween.
Hamborgs Staatsafkaatschop tööft op en groot Datenpaket – mit Informatschonen övern Drogenhannel. De Daten sünd ut sonöömt Kryptohandys ruthoolt worrn. Drogenkriminelle maakt över düsse Handys gern jümehr Deals, denn de sünd egens bannig seker. Kriminalers ut Frankriek harrn dat man henkregen, Daten vun düsse Handys optoslöteln. De Hamborger Hoven speelt för'n Drogenhannel en grote Rull.
De Handball-Weltmeesterschop is för dat düütsche Team vörbi. An'n Avend is de Mannschop in't Viddelfinal rutflogen. De Düütschen hefft in Oslo na Verlängern gegen Portugal verloren: mit dörtig to eenundörtig.
Vundaag hefft wi veel Wulken – blots af un an lockert dat op. An'n tweten Deel vun'n Dag mach dat en lütt beten regen. Dat allens denn bi bet to söven Graad. Morgen wesselt sik Wulken un Sünn denn af: ok wedder en beten Regen mit dorbi, bi bet to süss Graad.
De Union will in'n Bunnsdag, dat een bi't Recht op Asyl strenger warrt. To Noot ok mit de Stimmen vun de AfD. Dat geiht dorbi üm dat so nöömte "Tostroom-Bregrenzensgesett". Ok in de Hamborgsche Börgerschop is Migratschoon en Thema. Vundaag in de aktuelle Stünn. De Hamborger CDU verlangt Utreisearresten, dat is so en Oort Haft. Binnensenater Andy Grote wohrschaut: In Hamborg leevt üm un bi 9.000 Minschen, de utreisen mööt. Arrest wöör denn en Masseninhafteren bedüden un dat is gegen de Verfaten.
