Düütschland is nich mehr de Nummer 1 wat de Tall vun de Containerscheep angeiht. Opstunns hett de Schwiez de mehrsten Containerscheep, dorna kümmt China. Düütschland is dormit op den drütten Platz rutscht. Dorför, dat utreekt de Schwiez as Binnenland bi Container-Scheep vörn liggt, sorgt de gröttste Rederee vun de Welt, de MSC. De boot ne'e Scheep, köfft masse Scheep, de al bruukt sünd un bedeligt sik ok an Havens, as hier in Hamborg.
De USA geevt jemehr Militärhölp för de Ukrain wedder free. Se sall ok wedder mit Informatschonen vun'n Geheemdeenst versorgt warrn, wieldat de Ukrain dorachter steiht, dat een för dörtig Daag de Wapen rohn lett. Dat kann een ut en Verklaren vun de beiden Länner rutlesen, nadem se güstern in Saudi-Arabien mit'nanner snackt hebbt. US-Butenminister Marco Rubio sä, nu weer de Ball in't Feld vun de Russen.
Nadem dor in de Noordsee twee Ööltankers tosamenstött sünd, hett de Polizei den Kaptein vun dat Frachtschipp ut Hamborg fastnahmen. Na dat, wat vun de BBC to hören is, hett dat de Rederee bekunnt. Folgens de britsche Behörden, gifft dat den Verdacht op en groff fohrlässig -Döden. De Frachter harr vör de ingelsche Küst en Tanker rammt, de dor vör Anker liggen hett. Dorbi is woll een Minsch vun de Besatten bi to Dode kamen.
Hebbt E-Autos weniger Pannen? Mit düsse Fraag hebbt sik ADAC un TÜV ut'nannersett. Bi'n ADAC snied de E-Wagens in'n Snitt üm 20 Perzent beter af as Diesel- un Benzin-Fohrtüüch. Dat liggt doran, dat E-Autos nich so veel Technik hebbt, keen Afgasreinigen, un keen Getriebe. Dorför fallt bi'n TÜV Elektro-Wagens teemlich faken dörch. De Tesla 3 to’t Bispeel - na dree Johr hebbt 14 Perzent swore Mängel.
Dat Verhältnis twüschen de USA un de EU warrt jümmer anspannter. Siet vundaag gellt de US-Töll op Stahl- un Aluminiumimporten. Un de EU hett vunmorgen de Gegentöll ankünnigt. De süllt vunaf April op amerikaanschen Whiskey, Motorrööd un Bööt anstahn.
Bayern gegen Bayer - düt düütsch-düütsche Achtelfinaal vun de Football-Champions-League hett München för sik entscheedt. De FC Bayern hett Leverkusen mit en 2 to 0 na Huus schickt. In't Viddelfinaal dröppt Bayern München op den italieenschen Meester Inter Mailand.
Vundaag wüllt sik de Wulken mal wedder in all jemehr Pracht wiesen. Denn kiekt aver ok mal kort de Sünn vörbi, man dat kann ok wat Natts geven. Dat allens bi bet to negen Graad.
Morgen süht dat meist jüst so ut.
