Mit den Wahnensbo in Hamborg geiht dat wedder bargop. Dat see SPD-Börgermeister Peter Tschentscher in’t Topkandidaten-Interview mit NDR 90,3 un dat Hamborg Journal. Wi peilt wedder dat Maal vun 10.000 Wahnens an, meen Tschentscher. Bi de Boverlöven hett Hamborg verleden Johr man toleggt – op 6.500. Jüst is vördag kamen, dat Sleswig-Holsteen nu dubbelt so vele free-finanzeerte Wahnens boot as Hamborg.
Morgen ist dat so wiet, denn steiht de vörtrocken Neewahl vun den Bunnsdag an: Jümehren Wahlkamp hebbt de Grönen in Hamborg afslaten. Kanzlerkandidat Robert Habeck hett sien Parteianhängers in de Fischaukschoonshall opropen, nochmal allens to geven. Bummelig 2.000 Lüüd weren dorbi. De neegste Bunnsregeren mutt en wichtige Rull in Europa spelen, so Habeck. Bi de Veranstalten is en Fro in Oppass nahmen worrn, se harr bi de Reden bannig dull stöört.
Vundaag gifft dat allerwegens in Düütschland wedder Demonstratschonen gegen Rechtsextremismus – de gröttste schall dat in Hamborg geven. Vun Middag af an rekent se mit 65.000 Minschen in de Binnenstadt. Dorto opropen harrn blangen annern Fridays for Future un de DGB Hamborg. In Horborg gaht de Minschen rund üm de Friedrich-Ebert-Hall op de Straat – gegen en Veranstalten vun de AfD.
Verdedigensminister Boris Pistorius wohrschaut de EU, sik an US Präsident Donald Trump rantomaken. He betreckt sik op plaante US-Reisen vun en Reeg europääsche Staatsböverste, bi de dat üm de Ukrain gahn schall. Pistorius gifft de USA man in jümehr Kritik recht, dat de Europäers in de verleden Johren to wenig för de Verdedigen daan hebbt. Un he röppt de EU dorto op, sik vun de amerikaansche Rüstindustrie free to maken.
Vunmorgen is en Auto in den Eilbeekkanal rinfohrt. De Wagen weer in de Richardstraat in’t Sleudern kamen, rutsch folgens de Polizei dat Över dal un keem half in’t Water to’n Stoppen. Twee vun de dree Lüüd in’t Auto müssen na’t Krankenhuus bröcht warrn. De Fohrer müss en Blootproov afgeven. Middewiel hett de Füerwehr den Wagen wedder ut den Kanal ruthaalt.
De HSV harr gegen den 1. FC Kaiserslautern mit 3 to 0 de Nees vörn. Nu staht de Hamborgers an de eerste Steed vun de Tweetliga-Tabell. Dat weer dat ölvente Speel in de Reeg, dat de HSV nich verloren hett.
Vundaag gifft dat mal mehr, mal weniger Wulken an’n Heven. Un dortwüschen waagt sik ok de Sünn mal rut. De Luft föhlt sik al na Fröhjohr an: De Temperaturen klattert op 13 bet 14 Graad. Opstünns sünd dat 5 Graad an de Bill. Morgen gifft dat en poor mehr Wulken, an’n Vörmiddag kann dat noch wat Natts vun baven geven un an’n Namiddag denn Sünn. Dat Ganze bi 12 bet 13 Graad.
