En Mann warrt ut en Auto rutreten un denn vun en Grupp Mannslüüd wegbröcht. So is dat in en Video to sehn, dat graad in't Internet de Runn maakt. Wiesen schall dat en Szeen ut Kaliningrad in Russland. Dor hett de Geheimdeenst en Mann ut Hamborg fastnahmen. He is süssunföfftig Johr oolt un kummt ut Jenfeld. De Russen seggt, he schall bi en Anslag op't Energienetwark vun Kaliningrad mitmaakt hebben. Dat Butenamt in Berlin hett to de Saak noch nix seggt.
De Parkzonen för Lüüd, de dor in en Naverschap wohnt, sorgt jümmer wedder för Arger in Hamborg. Dat sünd weniger de Navers, de sik argert, man Handwarkers, Leveranten un Pleegdeensten hefft dat faken nich licht dormit – un se hefft sik beklaagt: Över de Regeln, de dat nu al gifft – un ok, dat dat noch mehr Parkzonen geven schall. Nu hefft sik Lüüd ut de Branchen mit welk vun de Verkehrsbehörd drapen un över de Saak verhannelt. Rutkamen is, dat Parkschiens vun nu af an en beten mehr friegevig utstellt warrn schüllt. De hele Perzess schall man in de Hann vun de Ämter blieven.
In de tokamen Johren warrt woll düütlich mehr Krüüzfahrtscheep Hamborg anlopen. In'n Hamborger Haven gifft dat nu al twee faste Terminals un in't tokamen Johr schall in de Haven City Nummer drei opmaakt warrn. De Terminalbedriever CGH rekent dormit, dat Hamborg in't tokamen Johr bummelig dreihunnert Mal vun Krüüzfahrtscheep anlopen warrt. Dat weer en Plus vun üm un bi teihn Perzent in'n Vergliek to 2024.
In Eimsbüttel löppt en Debatt över de Oosterstraat, de jo graad deelwies sparrt is. Al dreiunhalf Maand warrt dor dat Nett för de Feernwarms utboot. In'n Weertschopsutschuss vun de Bezirksversammeln hefft nu Kooplüüd klaagt, dat se nich goot nog Infos to'n helen Perzess kriegt. Jümehr Kunnen müssen graad ok grote Ümwegen maken. Se wullen nu mit Hamborg Energie snacken un tosamen de Problemen lösen. Fast steiht al: En Oosterstratenfest schall dat wegen de Bosteed ok in't tokamen Johr nich geven.
In de Nacht geev dat en sworen Unfall in de Hamborger Binnenstadt. Dor wo sik Gorch-Fock-Wall un Jungiusstraat krüüzt, sünd en Auto un en Motorroller tohooprasselt. Swoor drapen hett dat den Föhrer vun'n Roller: De veerundörtig Johr ole Mann keem na't Krankenhuus. He is an'n Kopp to Schaden kamen: Dat geiht üm Leven un Doot. De Polizei seggt, an de Steed weer vör'n Crash ok de Ampel utfallen – dat weer man nich de Grund dorför. Woso dat allens so kamen is, müss eerst noch rutfunnen warrn.
Vundaag is wedder allens vull mit Wulken: Dat warrt deelwies regen un ok Sneeregen un Snee kaamt mal rünner. Dat warrt recht koolt – bet to drei Graad plus. Morgen denn jüst dat Sülbige noch mal: düster, koolt un natt.
De russ‘sche Inlandsgeheemdeenst FSB hett, so as se dat sülvst seggen doot, en düütschen Staatsbörger fastnahmen. So as dat heten deit, schall he woll een Sabotaasch plaant hatt hebben. Narichtenagenturen ut Russland snackt woll dorvun, dat de Keerl in Hamborg boorn is. Un he weer woll mit föfftig Gramm flüssigen Sprengstoff över Polen na Russland rin reist. Den Opdrag schall de Keerl dorna to uurdelen vun een ut’e Ukrain kregen hebben, de ok hier in Hamborg leven deit.
