De ADAC rekent dormit, dat de Straten vör Wiehnachten wedder bannig vull warrt – un hett en Raatslag: beter so fröh as mööglich or so laat as mööglich föhren. Ok de Bahn rekent üm Wiehnachten rüm mit veel Fohrgäst: bet to 450.000 per Dag. Se hett 410 ICE-Töög op de Sporen. Ok de Flooghaven Hamborg rekent vundaag mit en groten Andrang.
Bunnsbinnenministersche Nancy Faeser will gau ne'e Sekerheitsgesetten besluten. Na'n Anslag vun Meideborg see se to'n Spiegel, dat dat al en Reig Vörslääg geev: to'n Bispeel dat Bunnspolizeigesett. Dormit dröffen Ämter Biller ut't Internet dörsöken – mit en Software, de Gesichter rutkennen deit. Faeser rööp Union un FDP op, dat se dat ünnerstütten schullen. In Sassen-Anholt is de Anslag vundaag Thema in'n Üllstenraat vun'n Landdag. Dorbi schall dat ok üm de Arbeit vun'n Mann, de dat ween is, gahn. De föfftig Johr ole hett as Dokter för Psychiatrie arbeid.
Dat Sporpaket warrt bannig groot. VW is sik mit de Warkschop IG Metall jo an'n Freedag enig worrn – un nu gifft dat ne'e Details dorto. De SZ schrifft: Ok bummelig veerdusend Managers schullen üm un bi teihn Perzent vun jümehrn Johresverdeenst opgeven. Kloor is al, dat in de tokamen fief Johr 35.000 Steden wegfallen schüllt.
Gifft de Hamborger Hoochbahn to veel Geld ut? De Linke smitt de Hoochbahn vör, dat se to veel för't Renovieren un Beraters betahlt. So harr en Drapen vun'n Vörstand in Travemünn bald 160.000 Euro köst – un bummelig 80.000 Euro kreeg en Beraterfirma ut de Swiez. De Senat see, dat weer allens noch in'n Rahmen.
Wokeen na Hamborg reist un in Hotels or Pensionen slöppt, mutt Kultur- un Tourismus-Taxe betahlen: Un de schall de Stadt in't tokamen Johr veerundörtig Millionen Euro bringen. Dat liggt ok doran, dat se ropsett warrt. Mit dat Geld schüllt tomehrst Saken ut Kultur, Tourismus un Sport ünnerstütt warrn. Dorto will de Stadt bummelig 3,6 Millionen Euro utgeven, so dat man wieder ümsünst op de Plaza vun de Elvphilharmonie rop kann.
Bet nu is he blots Interimstrainer ween. Nu warrt Merlin Polzin offiziell Trainer vun'n HSV. Sportvörstand Stefan Kuntz see, he weer övertüügt vun Polzins Arbeit. De veerundörtig Johr ole folgt dormit ok offiziell op Steffen Baumgart.
Vundaag hefft wi veel Wulken un Regen mit dorbi. Dat warrt recht frisch un winnig: mit Temperaturen bet to söven Graad. Hilligavend kiekt eerst deelwies de Sünn dörch. Later an'n Dag treckt denn wedder mehr Wulken ran un to'n Avend hen warrt dat ok wedder en beten regen. Dat allens bi bet to süss Graad.
