CDU-Böverste Friedrich Merz steiht nu kort vör’t Kanzleramt, denn de Union hett de Wahl wunnen un de SPD hett se verloren. So tominnst lett sik dat, wat bi de Bunnsdagswahl bi rutsuert ist, kort tohoopfaten. CDU un CSU winnt de Wahl mit 28,5 Perzent. Un siet de verleden Nacht is ok kloor: Se bruukt blots een Koalitschoonspartner an jümehr Siet. Un dat kunn de SPD warrn, de man kloor verloren hett un op 16,4 Perzent vun’e Stimmen kamen deit. Düütlich wat hentowunnen hett de AfD, de op 20,8 Perzent kummt. De Grönen staht bi 11,6 Perzent. Un ok vertreden in dat Parlament is de LINKE. Bi jüm hebbt 8,7 Perzent vun’e Lüüd jümehr Krüüz maakt. Dat BSW hett dat nich över 5 Perzent henweg schafft un is in den ne’en Bunnsdag nich mit dorbi. Dat glieke gellt ok för de FDP. Ok se schafft dat nich in den Bunnsdag rin. Dat is siet de verleden Nacht kloor. Deswegen stiggt de vörmalige Finanzminister Christian Lindner nu ok ut’e Politik ut.
In’e Twüschentiet kaamt för den Wahlsieger Friedrich Merz ok Glückwünsch vun‘t Butenland: NATO-Generaalsekretär Mark Rutte schrifft, he frei sik op de Tosamenarbeit, man schreev denn ok glieks bavento, Europa müss mehr för’t Militär utgeven. Gratulatschonen kaamt ok ut Paris: Frankrieks Präsident Emmanuel Macron hett an Merz schreven, in düsse Tiet vun’e Unsekerheit weren beide Länner eens, üm sik de groten Rutföddern vun’e Welt to stellen. Un de israeel’sche Ministerpräsident Benjamin Netanjahu schrifft, he frei sik op en enge Tosamenarbeit mit de ne’e Merz-Regeren.
In Hamborg gifft dat, wat de Wahl angeiht en poor Överraschen. Denn kickt een blots op uns Stadt, denn kummt de SPD bi dat, wat vörlöppig vun Amts wegen her bi rutsuert is op 22,7 Perzent vun’e Tweetstimmen. Dat is en Minus vun üm un bi 7 Perzentpunkten. De Grönen mööt jümehren tweten Platz afgeven un lannt bi 19,3 Perzent. Denn de ne’e tweetstarkste Kraft is de CDU mit 20,7 Perzent. De LINKE kunn ehren Stimmenandeel meist verdubbeln un kummt op 14,4 Perzent. Un de AfD sprüng vun üm un bi 5 Perzent op 10,9 Perzent.
Un wokeen geiht nu ut Hamborg na Berlin hen in den ne’en Bunnsdag? In dree Wahlkreisen hebbt sik SPD-Kannidaten bi dat Rennen üm en Direktmandaat dörsett. Dormitto höört Aydan Özoguz in Wandsbeek, Metin Hakverdi in Bardörp-Horborg un Falko Droßmann in Hamborg-Mitt. In Altna un Einbüddel liegt Linda Heitmann un Till Steffen vun’e Grönen vörn. Un in Hamborg-Noord hett de CDU mit Christoph Ploß de mehrsten Stimmen kregen.
Vundaag sünd wi all Ukrainers, dat sä EU-Raatspräsident António Costa. He besöcht vundaag de ukrain‘sche Hauptstadt Kiew tohoop mit de EU-Kommischoonsböverste Ursula von der Leyen. Grund is, dat dat vundaag op’n Dag nipp un nau dree Johr her is, wo Russland mit sien groten Angreep op de Ukrain anfungen hett. Raatspräsident Costa sä: Dat Leiden dor weer grusig un nich to vergeven.
In‘e Football-Bunnsliga hett de FC Bayern güstern wunnen. De Rekoordmeister hett Eintracht Frankfurt mit veer to null na Bett henschickt un dormit denn sien souveränen Vörsprung in’e Football-Bunnsliga noch mal düütlich wat ünnerstreken.
De Dag fangt eerst noch dröög an, hier un dor schient villicht ok noch’n beten wat de Sünn. Man later kaamt denn dichte Wulken hento un to’n Namiddag kriegt wi denn ok mehr un mehr ’n beten wat an Regen af – dat Ganze bi Temperaturen vun üm un bi teih, ölven Graad. Un morgen sünd de Temperaturen denn meist de glieken as vundaag. De Rest is denn akraat annersrüm, denn dor is mehr de Namiddag de dröge Deel vun’n Dag.
