De Probleme bi de Hamborger Uni ehr "Haus der Erde" an'n Schlump sünd grötter as bet nu bekannt weer. In dat ne'e Zentrum för de Lehr un dat Forschen hebbt sik na en Waterschaden Bakterien un Pilz utbreedt - dat is bi en Nafraag vun NDR 90,3 bi de Finanzbehöörd rutkamen. 1.900 Quadraatmeter Footbodden müssen opstemmt un wegnahmen warrn. Plaant weer, dat Zentrum schull 2019 fardig warrn. Nu is aver wiederhen unkloor, wannehr de Bedriev dor losgahn kann.
In Horborg is in de Nacht en jungen Mann ut en Hoochhuus dalfullen un dorbi to Dode kamen. De Polizei geiht dorvun ut, dat dor annerseen an schuld is. Op Nafraag hett se seggt, dat harr vörher in de Wahnung en Striet geven. In dat Hoochhuus in'n Soltauer Ring, dor harrn sik twee Gruppen vun junge Mannslüüd in de Hoor kregen. Na de Lüüd, de ünner Verdacht staht, dor sünd se noch an't Fahnden. Bi een Mann, de fastnahmen worrn is, dor hebbt de Polizeilüüd en Machete funnen.
Politikers ut vele Länner hebbt de Attack vun Russland op de ukrainsche Stadt Sumy verordeelt. De franzöösche Präsident Emmanuel Macron sä, dat weer hoochnödig, Russland to en Wapenroh to bringen. Bi dat Angriepen güstern weern mehr as 30 Minschen ümkamen. CDU-Baas Friedrich Merz hett nochmal wedder in Utsicht stellt, dat de Ukraine womööglich Taurus-Marschfloogkörpers kriegen kunn. In de ARD sä Merz, de Ukraine müss ut de Defensive rutkamen.
De Hamborger Polizei hett in't eerste Quartaal vun't Johr weniger Verbreken tellt as een Johr torüch. De Tahl an straafbor Doon is söven Perzent rünnergahn, op knapp 56.000 Delikten. Besünners bi allens, wat mit Gewalt verbunnen is, so as Moord, Dootslag oder Vergewaltigen, dor is dat düütlich weniger as een Johr torüch. De Tahlen för een Vierteljohr köönt aver blots so üm un bi wat utseggen.
De Bahnverkehr in'n Noorden rullt nu wedder normaal - nadem dat an't Wekenenn vele Töög to laat kemen oder utfullen sünd. Bet to'n Avend hett in Hamborg en Stellwark, wat kaputt weer, för Probleme bi'n Feernverkehr sorgt. De Fohrgäst hebbt deelwies mehr as annerthalf Stünnen töven müsst. Ok bi de Regionaal-Töög twüschen Schleswig-Holsteen un Hamborg, dor müss bet to een Stünn töövt warrn, un welk vun de Fohrten sünd ok utfullen.
Siet November weer de Hauptkark St. Jacobi dicht ween, man siet güstern hett se wedder op, un dor kunn al de eerste Gottsdeenst in fiert warrn. Wohrschienlich mutt de Kark aver nochmal wedder dichtmaken, denn dat gifft dulle Schadens an de Müern. Bet Anfang de 2030er-Johren schall St. Jacobi vun Grund op saneert warrn.
De Dag bringt Sünnschien un Wulken, un hier un dor kann mal en Schuer Regen rünnerkamen, bi bet to 19 Graad – nu (Klock negen) sünd dat an de Bill 11 Graad. Morgen geiht dat mit Sünnschien los, man de Namiddag kann Schuern un Gewidders bringen – bi bet to 22 Graad.
