In Horborg is de Mordkommission an't Ermiddeln, na en Doodstekeree mit Metzen. De Polizei seggt, an'n laten Avend harrn twee Mannslüüd an de Poststraat en Striet. Denn schüllt de 17-Johrige und de 34-Johrige mit Metzen openanner losgahn ween. Wieter seggt de Polizei, dat de Jungkeerl so swoor to Schaden keem, dat he later in't Krankenhuus sturven is. Bi den 34-Johrigen geiht dat noch üm Leven un Dood. En 19-Johrigen wull dortwüschen gahn un hett denn 'n beten wat afkregen. Worüm dat to den Striet keem, dat is noch unkloor.
Noch dree Daag bet Silvester un hüüt geiht ok in Hamborg dat Verköpen vun Böllers un Füerwark los. Bi welk vun de Bo-Markten gifft dat keen Böllers mehr - üm de Deerten un de Ümwelt to schützen. Denn afsehn vun den Larm kummt dor ok veel Fienstoff un Müll tosamen. Verbaden is de Bölleree wedder üm den Raathuusmarkt un de Binnenalster ümto - un Böllers un Raketen dröff een ok nich in de S-Bahn mitnehmen.
De Butenministersch Annalena Baerbock, de hett vör Russland siene Schaddenflott wohrschaut. Se sä to de Funke Mediengrupp, dat binah in'n Maands-Rhythmus wichtige Ünnerseekabels vun Scheep kaputtmaakt warrt - un so wörr ehr dat swoor fallen, noch an Tofäll to glöven. Wieter hett Baerbock seggt, op de kritische Infrastruktur, dor müss noch beter oppasst warrn. Un de EU seggt, dat de Schaddenflott ut Scheep besteiht, mit de Russland üm de Sanktschonen üm rüm schippert.
In Poppenbüttel hebbt an'n fröhen Morgen mehrere Fohrtüüch brennt. An'n Müssenredder hebbt en Wahnmobil, twee Wahn-Anhängers, dree Motorrööd un twee Autos Füer fungen - worüm, dat is noch unkloor. Deelwies sünd de Fohrtüüch dull to Schaden kamen. De Polizei geiht dorvun ut, dat de Füern mit Afsicht ingang bröcht worrn sünd - dat schall Tügen geven, de dor wat vun mitkregen hebbt.
In Busse, U-Bahnen un Statschonen, dor sünd siet binah twee Weken all möögliche Wapen verbaden, un dat blifft ok so. För de S-Bahn weer dat eerstmal blots bet Johrs-Enn fastleggt, denn dor mutt dat düütsche Binnenministerium över so en Verordnung entscheden. Nu is disse Verordnung för een Maand verlängert worrn, dat heet: Ok in'n Januar sünd Wapen in de S-Bahnen un op mehrere Bahnhööf verbaden - so hett dat de Bunnspolizei künnig maakt.
Bi dat Naams geven för Kinner, dor wählt de Öllern an'n leevsten Emilia un Noah - in Hamborg un ok düütschlandwiet. Dat hett de Naams-Expert Knud Bielefeld künnig maakt. Op Platz twee sünd denn Emma un Matteo - dorna kaamt Mia, Ella un Maja un Liam, Emil un Fiete.
Dat warrt en griesen Dag mit dicke Wulken, man dat blifft meisttiets dröög – bi bet to 5 Graad. Nu (Klock negen) is in Allermööh noch een Graad ünner null. Ok morgen wedder dicke Wulken mit af un an beten Fisselregen, man later an’n Dag kann dat ok mal oplockern – bi nochmal 5 Graad.
