Mit de Fähr röver över de Elv, dat is vundaag nich mööglich, denn siet Klock veer hüüt fröh warrt bi de HADAG streikt. Un dorto opropen hett de Warkschop ver.di, denn se verlangt vun den Fährbedriever, de de Stadt tohören deit, achtteihn Perzent mehr wat an Geld för de Arbeitslüüd. Un vundaag to’n Fieravend schall denn af Klock söss noch bi’n Elvtunnel in de Zentraal, wo se den bedrieven doot, streikt warrn. Man wat dull een dat denn op sien Weg op’e A7 wat marken deit, dat kann een noch nich so recht wat seggen, denn ver.di un de Autobahn GmbH striet sik neemich hüüt Middag noch vör Gericht.
Mehre hunnert Milliarden wat an Euro sünd Utgaven, de Union un SPD tohoop planen doot. Un deswegen kummt vundaag nu de ole Bunnsdag tohoop, liekers de ne’e al wählt is. Union un SPD wüllt de Bunnswehr wat moderner maken. Blangen dat Ganze wüllt se denn ok noch fiefhunnert Milliarden Euro Schullen opnehmen för ne’e Straten, Brüchen oder Scholen. Un dormit dat allens denn ok wat warrt, mööt twee Drüttel vun de Lüüd, de in‘n Bunnsdag sitten doot, „Ja“ to dat Ganze seggen.
Vundaag gaht in Berlin de Koalitschoonsverhanneln los. Un dormit kann een ok seggen, Union un SPD sünd nu al een Stück wieder kamen, denn verleden Week geev dat ja al de ersten Snacks, dat so nöömte Sonderen. Vundaag nu kaamt in Berlin sössteihn Arbeitsgruppen tohoop. Un dor sünd denn ok söven Politikerlüüd mit dorbi ut Hamborg. Blangen anner sünd dat vun de SPD uns Kultursenater Carsten Brosda, Binnensenater Andy Grote un Stadtentwickelnssenatersch Karen Pein. För de CDU sünd ut Hamborg Christoph Ploß un Franziska Hoppermann bi de Koalitschoonsverhanneln mit dorbi.
De Firma Northvolt, de Batterien herstellen deit, de steiht vör de Pleite. Un liekers drückt Hamborgs Weertschopssenatersch Melanie Leonhard de Dumen för en Batteriewark in Sleswig-Holsteen un hööpt nu, dat de beiden Bunnslänner noch en Weg hierför finnen doot. Denn de Firma Northvolt will dicht bi Heide Batterien för Elektroautos boen un so denn ok üm un bi dreedusend Arbeitsplätz schaffen. Deswegen is ok al en Kredit in Höög vun sösshunnert Millionen Euro vun de staatliche Födderbank KfW utbetahlt worrn.
Dat geiht üm sowat as Gewalt tohuus, wenn een süchtig is oder wenn een keen Dack mehr över’n Kopp hett. Hölp bi all düsse Problemen gifft dat twoors, man liekers mutt een de aver ok eerstmal finnen. Un dat schall in Horborg in dat Phoenix-Viddel nu beter warrn. Üm un bi föfftig Soziaalanbotten gifft dat dor, de sik nu in en so nöömten Hölp-Kompass vörstellen doot. Düssen Kompass gifft dat nu op Papeer, man ok online un he schall all de Lüüd wat bringen, de dor in dat Phoenix-Viddel vun düsse Hölp un Stütt betto nix weten un för sik denn so ok nix vun bruukt hebbt.
Kiekt wi noch kort na’n Football hen un op de Champions League: Dor is de FC Bayern al een Runn wieder un nu hett dat ok Borussia Dortmund na’t Viddelfinaal hen schafft. Denn de Dortmunder hebbt güstern Avend mit twee to een gegen OSC Lille wunnen un mööt nu as neegst gegen den FC Barcelona ran.
Blangen en ganze Reeg Wulken schient hier un dor villicht ok noch mal ’n beten wat de Sünn. Man dat is nich veel, aver dat blifft noch ne längere Tiet wat dröög. Man later an’n Dag fangt dat denn stedenwies ok wedder ’n beten wat an to regen bi Temperaturen vun bet to acht Graad. Un morgen is dat Wedder denn nich veel wat anners as vundaag bi Temperaturen vun bet to söven Graad.
