Bi de Welt-Klimakonferenz in Aserbaidschan, dor sünd se wiederhen an't Strieden doröver, wo veel Klimahölp betahlt warrn schall. Kriegen schüllt dat Geld för Klimaschutz dejenigen Länner, de dat dull drapen hett - so ünner annern in Afrika un ok Inselstaten. De Industrielänner, wo ok Düütschland mit bi is, de hebbt nu pro Johr 300 Milliarden Dollar för de armeren Länner anbaden, man de hebbt betto mehr as een Billion Dollar verlangt.
Dat blifft nu dorbi: An'n tweten März warrt in Hamborg de Börgerschop wählt. SPD un Gröne hebbt sik güstern nu gegen dat Opschuven vun den Wahltermin fastleggt. Man CDU, Linke un FDP, de hebbt wullt, dat de Hamborg-Wahl un de Bunnsdagswahl op densülvigen Dag leggt warrt. Root-Gröön is aver bang dorför, dat in so en Fall gegen de Wahl vör Gericht klaagt warrn kunn.
He is de Baas vun't Bunnskanzler-Amt un siet Johren de engste Vertroote vun Kanzler Olaf Scholz - nu warrt Wolfgang Schmidt bi de Bunnsdagswahl för de SPD as Direktkandidaat antreden, in den Wahlkreis Hamborg-Eimsbüddel. Mit goot 94 Perzent vun de Stimmen hebbt se den 54-Johrigen güstern Avend opstellt. He warrt de Nafolger vun Niels Annen. Man bi de vörige Wahl, dor weer Eimsbüddel an den Direktkandidaten Till Steffen vun de Grönen gahn.
De tokamen US-Präsident Donald Trump hett den neegsten Posten in siene Regeern vergeven. To'n ne‘en Finanzminister warrt de Hedgefonds-Manager Scott Bessent. Trump seggt, dat weer een vun de besten Finanzinvestoren un Geostrategen in de Welt. Bessent gellt as een, de sik för Dereguleern insetten deit un för lütte Ünnernehmensstüern. Mit dissen Ministerposten hett Bessent veel mittosnacken bi amerikaansche Sanktionen un ok to'n Bispeel bi de Weltbank un den Internatschonalen Währungsfonds.
Twoors weern de Hamborger Straten hüüt fröh witt, aver nich glatt. De Stadtreinigung hett to NDR 90,3 seggt, dat de Fohrbahnen vun den Insatz güstern noch goot afstreut sünd. Un so is de Winterdeenst in de Nacht ok blots mit bummelig 50 Fohrtüüg ünnerwegens ween - güstern weern dat noch 360.
Bayern München is in de Football-Bunnsliga Augsburg mit dree to null över ween. De Rekordmeester blifft in de Tabell op den eersten Platz. De FC St. Pauli speelt morgen in Mönchengladbach. Un in de Twete Liga mutt de HSV vunavend to Huus gegen Schalke ran.
De Schuern klingt af, un denn kriegt wi ok noch beten Sünnschien – bi bet to 4 Graad. Nu (Klock negen) sünd dat an de Bill 2 Graad över null. In de Nacht denn Regen, un an’n Sünndagvörmiddag jüst so. Later lockert dat op, un dat Thermometer geiht hooch bet op 13 Graad.
