Vundaag is in Hamborg de letzte Schooldag vör de Sommerferien un dormit geiht denn dat grote Reisen los. Un wokeen dorbi denn mit’n Auto losföhren deit, den raadt de ADAC, dat vundaag to maken, denn af Freedag kunn dat superlange Staus geven. De Flaaghaven raadt de Lüüd bitiets dortoween un blangen de Kuffers blots een Saak as Handpackelaasch to hebben. Un wokeen mit’e Bahn föhren deit, de mutt in Hamborg sünnerlich gode Nerven hebben jüst in Richt na Süden hen. Denn wegen Boarbeiden an’e Brüchen twüschen Hauptbahnhoff un Horborg sünd dor denn welk Töög later ünnerwegens oder fallt goors ganz ut.
Nu hett de neegste Oppositschoons-Politiker in Hamborg Besweer inleggt bi de EU-Kommischoon. Un de richt sik gegen den plaanten Deelverkoop vun’e HHLA an de Swiezer Rederee MSC. Denn Norbert Hackbusch vun’e Linken glöövt, dat MSC de Andelen to billig kriegen deit. He is bang för en weertschoplichen Schaden för Hamborg. De CDU-Politiker Götz Wiese hett sik deswegen ok al bi de EU beklaagt hatt.
Hamborg will noch mehr Wahnungen an de Hauptverkehrsassen boon - an de sonöömten Magistralen. Denn de schüllt attraktiver warrn dör mehr Bööm un Bus- un Fohrradweeg. De Behöörden hebbt veer Johr lang an den Plaan dorför arbeidt hatt un güstern nu is de afnickt un op’n Weg bröcht worrn. Üm un bi fiefhunnertdusend Minschen wahnt nu al an de twölf Hauptverkehrsassen, faken twüschen Supermarkten, Büro- un Autohüüs. En Video dorto kann een sik ok in sien NDR Hamborg App ankiekien.
De Nootfallreform vun SPD-Sundheitsminister Karl Lauterbach schall blangen anner Saken de Tieden körter maken, de man in’e Nootopnahm töven mutt. Vundaag nu schall dat Bunnskabinett düsse Reform afnicken. Op’e Agenda steiht ok de Huushooltsplaan vun FDP-Finanzminister Christian Lindner.
In Hamborg hebbt düt Johr in’e School 9.216 Schölers dat Abitur schafft. Dat is dat eerste Mal wedder ween, ahn dat dor jichtenswat lichter maakt worrn is vunwegen den ganzen Corona-Slamassel. In’n Snitt legen de Noten düt Johr bi 2,36 un dat is goors noch’n beten wat beter as vör de Pandemie. De vun’n Snitt her beste Abi-Johrgang kummt vun dat Gymnasium Oberalster in Sasel, denn kummt dat Gymnasium Eppendörp un op Rang dree liggt dat Christianeum in Othmarschen.
Bi’n Football hett de düütsche Natschonaalmannschop vun’e Froonslüüd ehr letztet EM-Qualifikatschoonsspeel düütlich wat wunnen un dat güstern Avend mit veer to null gegen Österriek.
Hüüt Vörmiddag hebbt wi dat noch mit ne ganze Reeg Wulken un Regenschuer to doon bi opstunns sössteihn Graad in Fuhlsbüddel. Na’n Namiddag hen lett sik denn aver ok noch mal’n beten wat de Sünn sehn bi Temperaturen vun üm un bi eenuntwintig Graad. Un de Dag morgen warrt denn schöner as vundaag mit düütlich weniger Regen dorför denn düütlich mehr Sünn un Temperaturen vun bet to sössuntwintig Graad.
