Vundaag kümmt de Hamborgsche Börgerschop den drütten Dag tohoop un snackt över den Huushoolt, un dat geiht üm den Sozjalhuushoolt. Denn wüllt se ok över de Plaans vun de Binnenbehöörd un to’t Thema Stadtbo un Wahnen snacken. Güstern harrn se dat vun de Hamborger Scholen. De schüllt 11 Perzent mehr Geld kriegen. Maryam Blumenthal vun de Grönen stell rut, dat Hamborg noch nienich so veel Geld för de Billen utgeven hett as nu. De Oppositschoon betwiefel man, wat dat Geld ok för de richtigen Saken insett warrt.
Hamborg will den Inbo vun Warmspumpen ornlich Stütt geven. Betnu gifft de Bund al 30 Perzent dorto. Vun Februormaand af an betahlt de Stadt denn nochmal 20 Perzent ut Lannsmiddel bavento. Folgens Ümweltsenater Jens Kerstan sünd sünnerlich Fackfirmen günstig, de blots Warmspumpen inboot – un denn ok noch de Föddermiddel beandragen doot. De Stadt will dorop dal, de Versorgen mit Warms bet 2045 klimaneutral to maken.
Kottarbeidergeld schall in Tokumst för bet to 24 Maand lang utbetahlt warrn – betnu weren dat blots bet to 12 Maand. Dat will dat Bunnskabinett vundaag in sien letzte Sitten düt Johr besluten. Denn befaat sik dat Kabinett mit en Gesettvörslag vun Sundheitsminister Karl Lauterbach: Utbillte Pleegkräft schüllt mehr Tostännigkeiten kriegen. Se schüllt bi’t Versorgen vun Patschenten sülvtstänniger hanneln könen, ahn dat eerst en Dokter wat seggen mutt.
In’t Johr warrt in de Ladens un Supermarkten in Hamborg Woren in’n Weert vun 111 Milljonen Euro klaut. Un dat Klauen warrt mehr. Folgens den Hannelsverband Noord intresseert sik de Deven vör allen för Eten un Drinken. Dordör stiegt de Kosten un ok de Priesen an. Denn mööt de Ladens ok mehr Geld för de Sekerheit utgeven. Dat Lannskriminalamt meent, dat mehr klaut warrt, kunn doran liggen, dat de Levenskosten so anstegen sünd.
De Hamborger Bunnsliga-Basketballers, de Towers, hebbt dat drütte Mal in düsse EuroCup-Saison wunnen. Gegen den Tweten in de Tabell Hapoel Jerusalem harrn se unvermodens mit 82 to 80 de Nees vörn. Vunwegen den Konflikt in’n Negen Oosten gell de Partie as Hoochrisikospeel. Man dat is freedlich aflopen.
Vundaag is dat wulkendüüster un vun Westen her gifft dat af un an Regen. Bi 11 bet 12 Graad is dat wedder teemlich lau. Opstünns sünd dat 8 Graad op de Veddel. Un de Wind dorto blaast düchtig. Ok morgen süht dat nich veel anners ut: Vele Wulken un ornlich Regen un Wind. Dat Ganze wedder bi 11 bet 12 Graad.
Siet güstern slaat de Aforneten vun de Hamborg’sche Börgerschop Raat övern den tokamen Duppelhuushoolt. Man eerstmaal hett de Oppositschoon mit de root-gröne Politik afrekent. De CDU smitt den Senaat för, keen Geföhl mehr för den Ümgang mit Stüergeller to hebben. Se will en Stadt, in de sik all Lüüd seker föhlt un de Verkehr löppt. De Linke will mehr Geld för de soziaale Infrastruktur. Alltohoop plaant de root-gröne Senaat 44 Milliarden för den Duppelhuushoolt in. Övermorgen wüllt se den ganzen Huushoolt afniggen.
