Hunnerte Milliarden Euro för’t Militär, för Straten, Brüchen un Schienen – för dütt Schuldenpaket mööt Union un SPD wieder na Mehrheiten kieken. Bi en Drapen mit de Grönen is güstern noch nix rutsuert. De Grönen, de bruukt een Week Tiet, üm jo oder ne to de Reform vun de Schuldenbrems to seggen. Union un SPD, de sünd op de Stimmen vun de Grönen anwiest.
Vör de brit’sche Noordseeküst, dor maakt se sik Sorgen üm de Ümwelt. Dor weren güstern en Öltanker un en Frachter tosamenstött. De Öltanker, de harr woll Drievstoff vun’t US-Ministerium för Verdedigen laadt. Vun beid Scheep hebbt se 37 Minschen in Sekerheit brööcht. De Söök na dat letzte Liddmaat vun de Crew hebbt se nu instellt.
In Hamborg is hüüt in de Fröh to’n Bedrievsbeginn de U-Bahnverkehr tosamenbroken. Middewiel löppt dat allens wedder na Plaan. Wat de Hoochbahn seggt, weren dulle Maleschen bi de Stroomversorgen de Grund. Fohrgäst müssen en Tiet lang op S-Bahnen un Bussen utwieken.
All dree Minuten en Autopann: Dat weer verleden Johr de Laag op Hamborgs Straten. Wat de ADAC-Pannenstatistik seggt, blievt de Wagens stahn oder springt nich an. Rund 197-Dusend Mal sünd de Pannenhölpers verleden Johr utrückt – 2 Perzent mehr as een Johr vöraf. De ADAC meent, dat liggt doran, dat de Autos in Hamborg in’n Snitt knapp 13 Johr oolt sünd.
En Nootroop bi de Hamborger Polizei, de hett güstern en Grootinsatz in de Havencity utlööst. En anonymen Anroper, de harr güstern meldt, he harr sien Fruu ümbröcht. In de Wahnen, üm de dat güng, dor seet en bekannten Youtuber un hett streamt. De Mann weer Opper vun en ne’e Mobbing-Masch worrn.
Beach-Volleyball-Olympiasiegersch Laura Ludwig, de will bi’n HSV eV en Platz an de Spitz hebben. Se bewarvt sik för de Steed as Viez-Präsidentin un will sik üm sportliche Themen kümmern. De Präsident opstunns, Marcell Jansen, de will nich noch mal kandideren. Laura Ludwig harr letzt Johr ehr aktive Karrieer beendt. Bi’n HSV eV will se sik in en Dreerteam to Wahl in’n Juni stellen.
Vundaag fangt de Dag mit Wulken un Nevel an. Af un to kiekt de Sünn dörch. Dat is meist dröög bi bet to 9 Graad. Opstunns meet wi bi ju op Finkwarder 0 Graad. De Wind weiht flau ut West. Morgen kriggt wi Wulken, wenig Sünn un twüschendörch kann dat ok regen bi bet to 9 Graad.
