In Berlin sünd rund 160-Dusend Lüüd gegen Rechtsextremismus op de Straat gahn. Se bekrittelt ok, dat de Union verleden Week versöcht hett, strengere Asylregeln dörch den Bunnsdag to bringen - un dorbi ok de Stimmen vun de Afd in Koop nahmen hett. De CDU steiht liekers achter ehre Plaans. Se will vundaag op ehren Parteidag in Berlin en Sofortprogramm besluten, för den Fall, dat se de Bunnsdagwahl winnen deit. Dorin sünd Plaans, mit de de illegaal Inwannern indemmt warrn schall, mit Torüchwiesen an de Grenzen un Grenzkontrullen, de anduern schüllt.
Ranzen op’n Rüch un Schooltüüt in de Hand – wenn in’n Sommer de Erstklässlers inschoolt warrt, denn warrt dat weniger Jungs un Deerns ween as noch verleden Johr. Wat de Schoolbehöörd mellt, kaamt Stand nu düüt Johr 17-Dusend Kinner in de eerste Klass. Dat sünd rund 620 weniger as 2024.
Eegens schull dat mit de högeren Töll för Kanada, Mexiko un China morgen los gahn. Man vundaag will US-Präsident Donald Trump noch mal mit den kanad’schen Regenschef Justin Trudeau un mit de mexikan’sche Präsidentin Claudia Sheinbaum doröver schnacken- För Woren ut Mexiko un Kanada, dor plaant de USA en Toschlag vun 25 Perzent, för de ut China 10 Perzent. An’t Wekenenn harrn de Länner, de bedrapen sünd, ankünnt, dat se wat dorgegen setten wüllt.
Bi en Deel vun de Alsterstreek, dor is nachts kuum Licht. Dat geiht üm den Afsnitt twüschen Kroogkoppelbrüch un de Ole Rabenstraat – dor schall dat bald heller warrn. SPD un Gröne, de wüllt dorför 150-Dusend Euro praat stellen. Över den Plaan, dor schall de Börgerschop tokamen Week afstimmen. De Lüchten, de dor betnu sünd, de hebbt private Lüüd betahlt un de sünd nu twei.
Acht Spelers weren nich dor. De HSV müss güstern ahn acht Stammkräft utkamen, bi’n Liekop gegen Hannover 96. Dorüm will sik de Hamborger Spoortvereen Verstärken halen. Ut Norwegen warrt de 18 Johr ole Alexander Leleliit kamen un ut Frankriek de 19 Johr ole Aboubaka Soumahoro.
Se gellt as de wichtigsten Musikpriesen vun de Welt – graad warrt in Los Angeles Musiklüüd mit de Grammys uttekend. Ok en Düütschen is dorbi. Filmmusikkomponist Hans Zimmer hett en Grammy för sien Arbeid an’n tweten Deel vun den Film „Dune“ kregen. Annere Grammys güngen to’n Bispill an de Sänger’schen Beyoncé un Sabrina Carpenter.
Vundaag is dat eerstmal nevelig. Ansünsten wesselt sik Sünn un lockere Wulken af. De Sünn kann ok mal länger schienen. Dat is dröög bi bet to 3 Graad. Opstunns meet wi bi ju in Moorfleet 2 Graad ünner Null. Morgen warrt dat meist so as hüüt.
