Dat is al nu nich so licht, in Hamborg en Steed to'n Wahnen to finnen – un nu is de Tahl vun de Hüüs, de to'n Bo tolaten warrt, noch mal wedder torüchgahn: na Infos vun NDR 90,3 in't eerst Halfjohr üm bummelig en Viddel. Bet Juni hefft Hamborgs Ämter goot tweedusend ne'e Wahnungen to'n Bo tolaten – dat weren sövenhunnert weniger as in de glieke Tiet in't verleden Johr. De Verband vun de noorddüütschen Immobilienünnernehmen sä, dat dat mehrstendeels an Klima-Oplagen leeg. Denn de möken dat Boen düer.
In de Ferien geiht de Tahl vun de Blootspenden in Hamborg normalerwies üm bummelig en Föfftel torüch. Man graad reckt dat woll noch goot, heet dat vun de Uni-klinik Eppendörp un vun't Rode Krüüz. Bloot künnt se man ok nich ewig inlagern – un so sünd Blootspenders jümmer hartlich willkamen.
In de USA warrt Kamala Harris vun ehr Partei nu vull stööt. Bi en Afstimmen in de Demokraatsch Partei kreeg se negenunnegentig Perzent vun de Stimmen. Dat se Kandidaatsche för't Präsidentenamt warrt, stünn al an'n Freedag fast – dor harr se al noch Stimmen kregen. Nu mööt blots noch de Böversten vun de Partei de Saak formell afsluten.
De süss sonöömten Klimaaktivisten, de an'n Freedag woll den Hamborger Flooghaven lahmleggen wullen, warrt keen Straaf kriegen. Dat liggt doran, dat de Polizei gau bi de Arbeit weer un de Grupp för de Daat fastnehmen kunn. Se hefft man en Flooghavenverbott kregen un de Polizei hett de Grupp wohrschoot, dat se so wat nich maken schull. Blots een ut de Grupp is ut Hamborg, all de annern weren extra anreist.
Dat Krüüzfahrtschipp "Queen Mary 2" is wedder op Besöök in Hamborg un liggt an't Terminal Steenwarder. De Besöök vun't 345 Meter lang Schipp duert blots en Dag. Man in de tokamen Week schall de "Queen Mary 2" gliek noch mal wedder na Hamborg kamen.
In Rothenborgsoort is güstern en Arbeitsponton vun en ole Warft sunken. Baven op stünn en lütt Lagerhuus. An't End keken noch süsstig Centimeter dorvun ut't Water rut – un en Kraan. Füerwehr un THW weren ok dor. Denn in dat Lager stünnen Stoffen mit Öl, de in de Elv rinkamen sünd. Woso dat sunken is, is noch nich rut.
Vundaag gifft bannig veel Sünn: blots af un an en poor lütte Wulken mit dorbi un dat blifft ok dröög – bi Temperaturen bet to negenuntwintig Graad. Ok morgen is dat eerst noch recht warm un dröög, man in'n Loop vun'n Dag treckt wedder Regen ran – bi bet to süssuntwintig Graad.
