De Ämter in Hamborg warrt digitaler. 290 Saken, de man fröher blots op Papier or direkt op't Amt maken kunn, gifft dat nu al online – un dat schull noch mehr warrn. Bummelig 680.000 Börgers hefft al en digital Kunnenkonto bi de Stadt. Dör düssen Afbo vun Bürokratie schull de Arbeit vun de Ämter denn ok effitschenter warrn. De Senat seggt: Dör't Online-Anbott wöörn nu al teihndusende Arbeidsstunnen insport.
De Hamborger Polizei sitt graad an en Fall, wo en Jungkeerl, de in en Kita in Rahlstedt arbeit hett, Missbruuk vörsmeten warrt. De Jungkeerl, de ünner Verdacht steiht, is süssteihn Johr oolt un harr in de Kita sien Freiwilligendeenst maakt. He schull Kinner ünner annern slaan un ok küsst hebben. De Kinner harrn dat jümehr Öllern vertellt un de harrn de Henwiesen denn wiedergeven, sä de Kita-Dräger WABE op Nafraag vun NDR 90,3. De Jungkeerl ünner Verdacht harr stracks Huusverbott kregen. Nich kloor is, woso he mit de Kinner alleen weer.
De ne'e US-Präsident Donald Trump hett noch mehr Plaans för sien Präsidentschop kunnig maakt. Ok de Start vun en KI-Vörhebben höört dorto. Ünnern Namen "Stargate" schullen in'n Minimum fiefhunnert Milliarden Dollars in de USA för KI-Infrastruktur utgeven warrn. Dat Geld schull man vun Ünnernehmen kamen. Trump sä, dat dat dormit ok eenhunnertdusend ne'e Jobs geven wöör.
De Angreep vun Hooligans an't Wekenend schull Folgen hebben, heet dat vun'n HSV. Sportvörstand Stefan Kuntz will, dat de, de dat weren, Stadionverbott kregen. So licht is de Saak man ok nich, denn de Däders harrn sik vermummt un de Polizei mutt eerst mal rutfinnen, wat för Lüüd dorbi ween sünd. De Warkschop vun de Polizei harr gern, dat de Clubs generell mehr gegen aggressive Fans möken.
Ok bi de Hamborger FDP is de Wahlkamp nu so richtig losgahn. Se hefft sik op en Slogan enigt: "Allens lett sik ännern." De Weertschop harr to veel Arger mit Bürokratie, de Stüern weren to hooch un an de Scholen geev dat Problemen. Dat allens müss anners warrn, sä de Bunnsdagsaforndte Ria Schröder güstern in'n Bessenbinderhoff. In Hamborger Ümfragen liggt de FDP ünner fief Perzent Stimmenandeel.
In't Hamborger Raathuus sünd an'n Avend de Werner-Otto-Priesen utgeven worrn. To'n högsten Pries geev dat föffteihndusend Euro baven op. Kregen hett dat Geld en Skatepark, de ok vun Rollstohlföhrers bruukt warrn kann. Priesen mit fiefdusend Euro geev dat noch för wat anners: Golf för Kinner mit Down-Syndrom un Boxen för Lüüd de Parkinson hefft.
Eerst hefft wi vundaag noch recht veel Wulken. Övern Dag lockert dat denn man en beten op un to'n Avend hen warrt dat en beten regen: dat denn bi Temperaturen bet to veer Graad. Morgen regent dat veel, ok Sneeregen mach dorbi ween – bi Temperaturen bet to fief Graad.
