Bi de Koalitschoonsverhanneln twüschen SPD un de Grönen in Hamborg, dor speelt ok de Regerensverhanneln in Berlin en Rull. Wat Börgermeister Peter Tschentscher seggt, geiht dat dorbi üm de ne’en Geller, de dat geven warrt. Dat heet: Üm dat Milliarden-Finanzpaket, dat de Bunnsraat besloten hett. Wat un woveel dorvun na Hamborg kümmt, dat is noch nich rut. Hanneln kann de root-gröne Regeren mit jümehre Mehrheit in de Börgerschop nu al, so seggt de Börgermeister.
In Berlin gaht de Koalitschoonsverhanneln op Bunnsebene wieder. Vun hüüt af an snackt de Föhrungslüüd vun Union un SPD, vörher harrn Fachgruppen verhannelt. Dor sünd al eerste Resultaten rutsuert. Bi en poor Saken warrt dat swoor, op en Nenner to kamen – to’n Bispill bi de Migratschoon, Stüern un Finanzen.
En russ’schen Spionage-Fleger, de is in de Neegde vun Rügen ünnerwegens west. Foorts sünd düütsche Afwehrjäger opstegen. De Luftwaffe hett dat middelwiel ok so mellt. Dornah weer de russ’sche Fleger ahn Floogplaan un Transpondersignaal ünnerwegens. De Pilot hett ok nich op Funkkontakt reageert. Na de Eskort vun de düütschen Eurofighter hett he denn wedder kehrt maakt. Wat de Luftwaffe seggt, weer dat nich dat eerste Maal, dat en russ’schen Spionage-Fleger an de düütsche Küst rankamen is.
In Hamborg hett dat meist siet 90 Johr nich so wenig regent as in düssen Maand. In März hett dat betnu blots een Millimeter Regen per Quadraatmeter geven. En Bruchdeel vun dat, wat egens normaal is: knapp 60 Millimeter. In Planten un Blomen loopt dorüm nu al de Watersprengers: Dat is nee für den Maand März, so de Goornmeister vun de Gröön-Anlaag.
De Elvtunnel schall dütt Johr glieks teihn Wekenenn lang för Booarbeiden sparrt warrn. De eerste Vollsperren op de A7 geiht hüüt Avend üm Klock teihn los. Dat schall bet Mandag Klock fief in de Fröh anduern. Grund sünd Brüchen- un Montagearbeiden twüschen de Anslusssteden Hamborg-Heimfeld un Hamborg-Stellingen.
Vundaag find in’t Raathuus dat Oostasiat’schet Leevsmaal statt. Dat is en Nettwarkdrapen vun de düütsche Asien-Wirtschop. Rund 300 Gäst ut Wirtschop, Politik un Diplomatie sünd inlaadt. Ehrengäst un Festredner sünd Bunnspräsident Frank-Walter Steinmeier un de Premierministersch vun Sri Lanka, Harini Amarasuriya. Dat is en Traditschoonsdrapen för all, de Interesse hebbt an’n Hannel mit asiat’sche Länner. Ünner annern wüllt se doröver snacken, wo sik de aktuelle Hannelspolitik entwickeln deit.
Vundaag Schient de Sünn, dat is dröög, blots an‘n Avend kaamt en poor Wulken lang. Dat Ganze bi bet to milde 19 Graad. Opstunns meet wi bi ju in Hogeluft 4 Graad. Morgen fangt de Dag mit Wulken an, later lockert dat op un de Sünn kümmt dörch. Dat is dröög bi bet to 14 Graad.
