De Hamborger SPD un de Grönen kaamt in en halve Stünn för de eersten Koalitschoonsgespräken tohoop. Vör de eerste Verhannelnsrunn wiest sik de beiden Parteien, de ja bet nu ok Regerenspartners weren, toversichtlich. Folgens Hamborgs Böverste vun de SPD Melanie Leonhard gifft dat en goden vertroensvullen Uttuusch. Themen, bi de dat Differenzen geven kunn, sünd Verkehr un Binnere Sekerheit. Wenn de SPD un de Grönen övereens kamen sünd, denn mööt ok de Liddmaten vun de beiden Parteien noch tostimmen.
Meist jeedeen veerten Hamborger Schandarm is polietsch rechts oder rechts buten. Dat wiest en Ünnersöken vun de Akademie vun de Polizei Hamborg. Freewillig mitmaakt hebbt dorbi bummelig 2.000 Polizeilüüd. Wat dor ok bi rutsuert is: Goot een Drüttel vun de Schandarms, de fraagt worrn sünd, hebbt togeven, dat se apen sünd för populistsche oder verswörensideoloogsche Utsagen. De Düütsche Polizeiwarkschop bekrittelt de Ünnersöken: Blots 13 Perzent harrn dor mitmaakt un dat weer nich repräsentativ.
US-Präsident Donald Trump will Extratöll op all Autos ansetten, de nich in de USA boot worrn sünd. Dat heet: Op importeerte Wagens kaamt Afgaven vun 25 Perzent bavento. Dat schall vun den 2. April af an gellen – un ok för Autodelen. Autos kunnen denn för US-Amerikaners dürer warrn, wieldat de Herstellers de Töll an de Kunnen wiedergeevt. Ok för de Düütsche Autobranch‘ is dat en Slag in’t Kontor, seggt Weertschopsfacklüüd.
Vör dat Hamborger Landgericht fangt vundaag en Perzess gegen twee Autofohrers an. Jüm warrt to Last leggt, dat se bi en illegaal Autorennen en tweejöhrigen Jung dootmaakt hebbt. Sien Tweschenbroder is bi den Unfall swoor an’t Lief to Schaden kamen. De beiden Fohrers in’t Öller vun 23 un 25 Johr drauht en Moordoordeel un dat heet tietlevens achter Trallen.
Dat Hamborger Stratenmagazin Hinz un Kunzt klaagt tohoop mit de Sellschop för Freeheitsrechten un twee Bedrapenen gegen dat Beddelverbott in Bus un Bahn. Se argumenteert, dat dat allgemene Beddelverbott dat Persönlichkeitsrecht un de Menensfreeheit vun Minschen in Armoot besnieden wörr. Dat een nich beddeln dörv, dat gellt bi den Hamborger Verkehrsverbund al siet mehr as 20 Johr.
De Hamborger Tennisprofi Alexander Zverev kümmt ut sien Kries nich mehr rut. De Nummer twee vun de Welt hett bi dat Masters-Turneer in Miami al in’t Achtelfinaal gegen Arthur Fils ut Frankriek in dree Sätz verloren. Un bi de HSV-Froenslüüd schall dat en ne’en Trainer geven. Blots en poor Daag na dat de Kru in‘t Halffinaal vun den DFB-Pokaal vun Werder Bremen een op de Mütz kregen hett, hett de Vereen künnig maakt, dat se sik vun Coach Marwin Bolz to’t Enn vun de Speeltiet trennen warrt.
Vundaag gifft dat eerst Daak, denn Wulken un pö a pö waagt sik de Sünn ok rut. Mehrstendeels blifft dat dröög. De Temperaturen klattert op 15 bet 16 Graad. Opstünns sünd dat 5 Graad in Hogeluft. Morgen köönt wi uns op veel Sünnschien freien, eerst an’n Avend treckt Wulken op. Dat Ganze bi 17 bet 18 Graad.
