Negen Daag vör de Börgerschopswahl kann de Hamborger SPD in’e Ümfragen ehren Vörsprung wieder utboen. Denn in den ne’en Hamborg-Trend vun Infratest-Dimap kummt de SPD nu op 32 Perzent. De Grönen kammt dorna to uurdelen op 18 Perzent. Un de CDU kummt op 17 Perzent. Düütlich wat na baven geiht dat för de Linken, de nu bi 10 Perzent liggen doot. Un dormit liegt se denn liekop mit de AfD.
Man övermorgen warrt aver eerstmal noch de Bunnsdag wählt. Un in den Tosamenhang wohrschaut nu Hamborgs Wahlleitsmann Oliver Rudolf vör en Fake-Video, wat dat in’t Internet geven deit. In den Film warrt wiest, woans schienbore Bunnsdags-Breefwahlümslääg apen maakt warrt un de Stimmzeddels, wo dat Krüüz bi de AfD maakt worrn is, de warrt denn achterran in en Schredder packt. De Film is, so as Oliver Rudolf dat seggen deit: „de perfide Versöök, uns demokraatsche un fre’e Wahlen to delegitimeren."
Siet de verleden Nacht hebbt in söss Bunnslänner bi de Busfirmen vun’e Gemenen de Lüüd jümehr Arbeit daalleggt. Vun düssen Warnstreik in’n apentlichen Deenst sünd hier bi uns in’n Noorden Neddersassen un Bremen vun bedrapen. De Warkschop Ver.di verlangt bi de Tarifverhanneln acht Perzent mehr wat an Geld för de Lüüd. Man de Arbeitgevers hebbt noch keen Anbott op’n Disch packt.
In’n Hamborger Haven geiht dat mit Boarbeiden los, wo se denn en dörtig Hektar groot Flach so trechmaken doot, dat een dat later denn ok bruken kann. Dat geiht üm en Flach in Steenwarder, wat dor al siet mehre Johren braak liggen deit. Un dor schüllt denn later Firmen op henkamen. Wat för welk Ünnernehmens dat denn sünd, dat schall denn tokamen Johr fastleggt warrn. Man nu steiht aver al fast, dat dor nich noch en Containerterminal bavento op boot warrn schall. För dat Praatmaken un de Boarbeiden nu plaant de Havenverwalten HPA alltohoop üm un bi 180 Millionen Euro in.
De Hamas hett güstern veer Lieken vun’e Gieseln an Israel övergeven. Man so as dat nu utsehn deit hett de Terrororganisatschoon dorbi woll en verkehrte Froensliek uthännigt. So as Israel dat seggt, hannelt sik dat bi de een Liek nich üm de Mudder vun twee lütte Jungs, wat twee- un fiefjöhrige Bröder sünd un de bi de Övergaav ok to de Lieken mit tohören deen. En israel’sche Armeespreker snack nu vun en eernsthaften Verstoot gegen de Afspraak rund üm de Wapenroh.
In Rahlsteed hett dat güstern Avend in en Hoochuus in de achten Etaag brennt. De Füerwehr is bi den Insatz mit üm un bi sösstig Lüüd in de Straat Anklamer Ring togang ween. De Flammen slögen al ut dat Fenster rut vun de Wahnen, wo dat brennt hett. Een Minsch is bi de ganze Saak swoor wat bi to Schaden kamen. Dörtig anner Lüüd müssen ne Tiet lang in en Bus ünnerkamen.
Vundaag hebbt wi dat wedder mit veel Wulken to doon. Meisttiets blifft dat dröög. Mit Schangs kriegt wi de Sünn hüüt Namiddag nochmal’n beten wat to sehn bi Temperaturen vun bet 14 Graad. Morgen süht dat meist jüst so ut as vundaag, villicht mit’n lütten Tick mehr wat an Sünn. Na’n Avend hen kann denn villicht ok mal’n beten wat an Regen daalkamen. Man de Temperaturen liegt ok morgen wedder bi üm un bi 14 Graad.
