Hamborg hett in't verleden Johr woll mehr as 1700 Minschen afschoven. Dat seggt de Binnenbehöörd. In't Johr 2023 weren dat noch üm un bi 1500 Fäll. Kritik doran, woans in de Praxis afschoven warrt, kummt vun de Hamborger Diakonie. Merle Abel, de dat för de Diakonie beluert, bekrittelt to'n Bispeel, dat Kinner wat dorvun mitkriegt: Wenn de Üllern nachts hoolt un gegen'n Willen na'n Flooghaven bröcht warrt.
SPD-Binnensenater Andy Grote wiest sik tofreed, dat en Vörslag ut Hamborg in'n Koalitschonsverdrag vun Union un SPD in'n Bund rinkamen is. Dorbi geiht dat üm't Ophissen gegen Volksgruppen. Wokeen wegen dat mehrmsls veroordeelt worrn is, schall in Tokunft nich mehr in staatliche Ämter wählt warrn: to'n Bispeel as Börgermeester un Aforndter. Wo veel Politikers dat in Düütschland nu al dropen wöör, is nich kloor.
De SPD-Liddmaten stimmt vun vundaag an över'n Koalitionsverdrag vun Union un SPD af. De 358.000 Liddmaten köönt online Jo or Ne dorto seggen. De Böversten vun de Partei worven bi en Drapen in Hannover güstern noch mal för dat, wat se mit de Union uthannelt hefft: to'n Bispeel SPD-Baas Lars Klingbeil. Grote Delen vun de Jusos sünd man gegen den Koalitschonsverdrag. Afstimmt warrt noch bet na'n 29. April.
So lang Daten optekent warrt, is in Europa keen Johr wärmer ween as 2024 – un keen anner Kontinent warrt gauer warm. Dat wiest en Bericht vun de Weltorganisatschon för Meteorologie un vun'n EU-Klimadeenst Copernicus. 2024 geev dat ok veel Extremwedder: so as to'n Bispeel Stöörm un Floten. Üm un bi veerhunnertdusend Minschen weren dorvun drapen, seggt de Organisatschonen.
Över Klimawannel schall ok in't "Huus vun de Eer" in Hamborg forscht warrn. Doch bi düssen Uni-Neebo gifft dat jümmer wedder Problemen. De Bund vun de Stüertahlers bekrittelt den Senat wegen de Bokösten, de jümmer höger warrt. Bet nu sünd se op veerhunnert Millionen Euro wussen. De Neebo weer man blots en vun veel Projekten, de veel dürer worrn sünd, as dat mal ploont ween is, bekrittelt de Stüertahlerbund.
De Polizei versöcht wat över de Liek ruttofinnen, de bi en Recyclingfirma in Altno-Noord funnen worrn is. Dat geiht ok dorüm, dat dat ween kunn, dat de Achtergrund en Verbreken is. En Arbeider harr de Liek güstern an'n Namiddag funnen, as he Ooltpapeer ümsortiert hett. De Dode is na't Institut för Rechtsmedizin bröcht worrn. Wokeen he is, is noch nich rut.
Vundaag is dat tomehrst warm un dröög. Eerst an'n Avend treckt en poor Wulken ran un dat mach ok en beten regen. De Temperaturen klattert op bet to dreiuntwintig Graad. Morgen warrt dat denn en lütt beten köler, man in't Maximum ok bi twintig Graad rüm.
