Wi snackt platt
Sonntag, 26. Februar 2023, 08:30 bis
09:00 Uhr
Bi "Wi snackt Platt" geiht dat dütmal üm de grote Bunnspolitik: denn tokamen Dunnersdag, den 2. März, dor warrt in’n Düütschen Bunnsdag Platt snackt. 25 Johr Europääsche Charta för Regionaal- oder Minnerheitenspraken, dat is dat Thema vun de Debatt – un ok de Hamborger Bunnsdagsafornte vun de Grönen Linda Heitmann warrt dor een Reed op Platt holen. Denn stellt wi Jo bi "Wi snackt Platt" ok noch de plattdüütsche Band „Rockwark“ vör, un wi sünd in’t Lichthof-Theater to Besöök: „Dat Leven vun de Liven“ heet dor en ne’et Stück. En Tosamenarbeit mit dat Ohnsorg-Theater is dat.
De Bunnsdag debatteert över de Regionaal- un Minnerheitenspraken
Dat is wat heel Besünnert, wat dat dor an’n tokamen Dunnersdag in Düütschen Bunnsdag to beleven gifft: denn an’n Nameddag vun’n tweten März, dor warrt in’n Bunnsdag nich op Hoochdüütsch debatteert, sünnern op Plattdüütsch, Freesch un Däänsch. Dreihen deit sik de Sitten vun'n Bunnsdag üm de Europääsche Charta för Regionaal- un Minnerheitenspraken, de dat nu al siet 25 Johr gifft. Un wat dat heel Besünnere is: de Afornten sünd opropen, jümehr Reden in jümehr egen Regionaal- oder Minnerheitenspraken to holen. Ok mit debatteern – un twoors op Plattdüütsch, warrt dor Linda Heitmann. Se is Bunnsdagsafornte vun’e Grönen in Altna. Bi "Wi snackt Platt" vertellt Linda Heitmann dorvun, woso Plattdüütsch ehr so bannig an't Hart liggen deit.
Dat Leven vun de Liven
Wenn een bi Plattdüütsch op Theater to snacken kümmt, denn fallt een fuurts, ganz kloor, dat Ohnsorg-Theater in: DE Hamborger Institutschoon, DE Traditschoonsbühn för Platt. Op’e anner Siet gifft dat aver ok de „hippe“ Bühn, wo se Saken utprobeern doot, so as dat Lichthof Theater in Bohrenfeld. Un nu maakt düsse beide Theaters wat tohoop. Dat Stück, üm dat dat dor gahn deit, dat heet „Dat Leven vun de Liven“. Bi "Wi snackt Platt" vertellt Jo Jürgen mehr över dat Stück, dat sik üm'e Tokunft vun'e Regionaal- un Minnerheitenspraken dreiht.
Hard Rock op Platt: De Band Rockwark
De Band „Rockwark“ speelt Hard Rock-Musik op Platt. Keen plattdüütsche Musik mit folkloristischen Anstreek wüllt se maken, man Hardrock mit Texten op Plattdüütsch - ganz so as se dat ok tohuus snacken doot. Nu hett de Band een ganz ne’e Idee hatt: mit een Sängersch ut de Ukrain hebbt se en Song op Platt un Ukrainsch opnahm. Bi "Wi snackt Platt" stellt wi Jo de Band un ehr Projekt vör.
Noch bet to'n 28. Februor: Mitmaken bi Vertell doch mal
“Tohuus” – dat is dat Thema vun uns Plattdüütsche Schrievakschoon „Vertell doch mal“ düt Johr. Noch bet tokamen Dingsdag, den 28. Februor, köönt Ji uns Joon Kortgeschicht op Platt toschicken. Nich mehr lang hen is dat, man ok, wenn Ji noch nix to Papeer bröcht hebbt: för’t Mitmaken is dat noch nicht to laat. Bi "Wi snackt Platt" gifft Yared Dibaba "Last-Minute"-Tipps, wenn Ji noch dorbi ween wüllt.
Moderatschoon: Jan Wulf
Schlagwörter zu diesem Artikel
Plattdeutsch
