Wi snackt Platt: Rolf Zuckowski, Hittfelder Speeldeel un Orchideen
Bi "Wi snackt Platt" geiht dat düsse Week üm den Orchideen-Experten Wolf Baus, dorto stellt wi Jo dat ne'e Stück vun de Hittfelder Speeldeel vör un wi snackt mit den Ledermaker Rolf Zuckowski.
"Tohuus" - dat is dat Thema vun de plattdüütsche Schrievakschoon "Vertell doch mal" düt Johr. Noch bet to'n 28. Februar söcht de NDR tohoop mit Radio Bremen un dat Ohnsorg-Theater de besten Kortgeschichten op Platt. Yared Dibaba, de is düt Johr de Botschafter vun "Vertell doch mal". Man Stütt kriggt de Schrievakschoon ok vun anner prominente Lüüd: to't Bispeel vun Rolf Zuckowski!
Rolf Zuckowski to Besöök bi "Wi snackt Platt"
Siene Grootöllern un Öllern hebbt domals mit'nanner Platt snackt, man nich mit em. "Bannig schaad!", seggt Rolf Zuckowski hüüt. Man liekers hett he later lehrt, Plattdüütsch to snacken - un twoors in de 1970er Johren vun Adi Albershardt, de domals de Speelbaas vun de Finkwarder Speeldeel weer. So hett Rolf Zuckowski denn in düsse Tiet ok anfungen, Plattdüütsche Leder för de Finkwarder Speeldeel to schrieven. Bi "Wi snackt Platt" vertellt he vun düsse Tiet un gifft Schrievtipps för de Lüüd, de mitmaken wüllt bi de plattdüütsche Schrievakschoon "Vertell doch mal".
Hittfelder Speeldeel fiert Premieer
"Düvel ok, Herr Paster" - so heet dat ne'e Stück vun de Hittfelder Speeldeel. An'n 5. Februar, dor fiert de Kummedie Premieer in’e Borg Seevetal, also direktemang vör de Dören vun Hamborg. In dat Stück, dor geiht dat üm en Mann mit Naam Freddie Schwarz. Freddie is en Clochard un Tippelbroder, un wiel he sik mal opwarmen un sien Kledaasch waschen will, stiggt he in en oolt Pfarrhuus in. Dor treckt he sik den Talar vun den Paster över un warrt so nu sülvst för den Paster hollen. En Verwesselkummedie par excellence! Kort vör de Premieer, dor lepen de Proven bi de Hittfelder Speeldeel nochmal op Hoochtouren. "Wi snackt Platt"-Reportersch Benita Brunnert hett bi de Hittfelder Speeldeel mal vörbikeken un stellt dat Stück vör.
Orchideen-Experte Wolf Baus - Vördrag in'n Lichtwarksaal
Mank all de Blomen, de dat gifft, sünd se woll mit dat Schöönst, wat de Natur sik utdacht hett: de Orchideen. Üm un bi 40.000 Oorten vun Orchideen gifft dat - un wokeen düsse Blomen mal bi sik tohuus hatt hett, de weet, dat se veel Pleeg verlangt un ok "Know-how". Een Mann, de so richtig goot över Orchideen Bescheed weet, dat is Wolf Baus. An'n 9. Februar is he mit en plattdüütschen Vördrag in'n Lichtwarksaal vun'e Carl-Toepfer-Stiften in Hamborg to beleven. "Wakanki - de Tronen vun de Inkaprinzess. Spurensuche in Peru" heet de. Avends Klock söss geiht dat los. För "Wi snackt Platt" hebbt wi den Orchideen-Fachmann Wolf Baus mal bi sik tohuus in Hamborg-Bargsteed besöcht, wo he sik sien egen lütt Orchideen-Paradies opboot hett.
"Jan Düvel" - Plattdüütsch Hörspeel mit Peter-Heinrich Brix
Peter-Heinrich Brix is bekannt as "Adsche Tönnsen" ut de Fernseh-Reeg "Neues aus Büttenwarder". Nu is he mal wedder in een Plattdüütsch Höörspeel to hören. In "Jan Düvel", een Höörspeel ut dat Johr 1989, is he in de Hauptrull as jungen Paster to beleven. In dat Stück is "Jan Düvel" de Ökelnaam för en olen Discher un Plünnenhöker (speelt vun Walter A. Kreye), vun den de Lüüd seggt, dat he afsünnerlich is un mit den Düvel gemeensame Saak maakt. Dat Füer speelt en grote Rull in sien Leven. So wunnert dat de Lüüd ok nich, dat he jichtenswann sülvst bi en groot Füer in sien egen Huus üm't Leven kümmt. Kort vörher hett sik de junge Paster noch lang mit em ünnerhollen. Bi "Wi snackt Platt" vertellt wi Jo mehr över dat Höörspeel "Jan Düvel", in dat ok de unvergeten Schauspelerinnen Erika Rumsfeld und Ruth Bunkenburg to beleven sünd.
De Leder in uns Sennen:
- Ganz goot - Norma
- Help - Charmonia
- Wenn de Wind dreiht - Rolf Zuckowski
- Fröhjohrsbloom - Valentine & The True Believers
- Deep in Dien Hart - Janina
Schlagwörter zu diesem Artikel
Plattdeutsch
