Wi snackt platt
Sonntag, 18. Juni 2023, 08:30 bis
09:00 Uhr
Bi "Wi snackt Platt" stellt wi Jo dütmal en echtet Königspaar vör, wi besöökt Annegret Grant ut Kirchwarder bi de Arbeit un wi weern bi een Proov vun Knipp Gumbo un siene Musikers dorbi. Knipp Gumbo hett jüst en ne’e CD rutbröcht un is tokamen Sünndag mit dorbi bi uns grote „Vertell doch mal“-Gala in’t Ohnsorg-Theater.
Knipp Gumbo: Ne'et Album un "Vertell doch mal"-Gala
Kennt Ji den Snack vun‘t Reporterglück? "Wi snackt Platt"-Reportersch Vanessa Kossen, de harr jüst so en Reporterglück! Se hett in Bremen den Sänger Knipp Gumbo un siene Musikers drapen. Un dat an een för jüm ganz besünnern Dag. Denn kort vördem Vanessa „Moin!“ seggen kunn, dor hett de Postbüdel to de Musikers „Tschüß! seggt - un em en Paket mit jümehr ne‘e CD dorlaten. Een vun de gröttsten Glücks-Ogenblicke för Musikers. Bi "Wi snackt Platt" vertellt Jo mehr över dat ne'e Album un ok, wat dorbi rutsuuert, wenn sik Musikers in Rock’n’Roll verleevt hebbt un se düsse Leevde mit Plattdüütsch tosamenbringt. Un, kloor, dat geiht ok üm uns grote "Vertell doch mal"-Gala, wo Knipp Gumbo Musik maken warrt. An'n Sünndag, den 25. Juni is de, vörmiddags Klock 11 geiht dat los. Een paar Restkarten gifft dat noch to köpen!
Besöök bi Annegret Grant in Fiefhusen in Hamborg-Kirchwarder
Bi NDR 90,3 „Wi snackt Platt“ stellt wi Jo jümmer mal wedder plattdüütsche Lüüd an jümehrn Arbeitsplatz vör. Dütmal geiht de Tour na den ländlichen Hamborger Süüdoosten: wi sünd in den Kirchwarder Oortsdeel Fiefhusen to Besöök. Groot is Oort nich, man dat gifft dor - to’n Glück - en Supermarkt. Un jüst dor arbeit Annegret Grant, de "Wi snackt Platt"-Reporter Bernhard Koch annerletzt mal besöcht hett.
"Jungs un Deerns leest Platt" in't Ohnsorg-Theater
„Jungs un Deerns leest Platt“. So heet en Wettbewarv, den dat all twee Johr hier bi uns in’e Stadt geven deit. Schölersche und Schölers ut Hamborg leest dor Geschichten op Plattdüütsch vör. Üm un bi hunnert Junge Lüüd ut ünnerscheedlich Hamborger Scholen hebbt dütmal bi den Vörutscheed vun "Jungs un Deerns leest Platt" mitmaakt. Nu sünd de besten vun jüm an'n Sünndag, den 18. Juni, üm Klock 11 in't Ohnsorg-Theater to beleven. Vörlesen warrt de jungen Lüüd plattdüütsche Geschichten vun Autorinnen un Autoren, de hier bi uns ut den Noorden kaamt. Geschichten to'n Högen un Smustergrienen sünd dorbi, man ok ernste Texten. Modereern warrt de Veranstalten Sandra Keck - un singen warrt se ok: tohoop mit Schauspelersche und Schauspelers vun't Ohnsorg-Theater gifft dat Pop-Songs op Platt to höörn. As en lütten Vörgesmack op de "Jungs un Deerns leest Platt"-Gala in't Ohnsorg-Theater kriegt Ji bi "Wi snackt Platt" de Geschicht "Ümmer op de Lütten" op de Ohren. Phelan Natebus hett weer 2021 mit düssen Text en vun de Winners vun "Jungs un Deerns leest Platt".
Henwies: De "Jungs un Deerns leest Platt"-Gala is an'n Sünndag, den 18. Juni in't Ohnsorg-Theater. Vörmiddags, Klock 11 geiht dat los - un dat Beste is: kössen deit dat Ganze nix. Ji köönt dor eenfach vörbigahn, Jo hinsetten un tokieken.
De Traditschoon leevt: Wahl vun't Oornkönigspaar in Scharmbeck
De Monarchie, de hett bi uns in’e Freie un Hansestadt Hamborg nie so en besünners grote Rull speelt. Man vör de Dören vun Hamborg, dor seeg dat man en beten wat anners ut, un hie un dor, dor gifft dat de ok hüüt noch! Bummelig 20 Minuten mutt en mit dat Auto vun Harborg ut fohrn, denn is en in Scharmbeck in'e Neegde vun Winsen/Luhe. Jüst vör een poor Daag is dor dat ne'e Oornkönigspaar wählt un kröönt worrn. En oole Tradition is dat un dat sünd een Barg Lüüd, de dor in'n Oornvereen togang sünd un sik engageren doot. "Wi snackt Platt"-Reporter Gerrit Hoss, de weer bi Krönung vun dat Königspaar dorbi un hett sik düssen "historschen Ogenblick" ankeken.
Moderatschoon: Jan Wulf
De Leder in uns Sennen:
- Help - Charmonia
- Sömmernacht - Jan Cornelius
- Op bald - Norma
- Land in Sicht - Godewind
- Jackson - Knipp Gumbo
Plattdüütsch op'e Ohren mit den "Wi snackt Platt"-Podcast
Snacks, Reportagen un Musik: Wat in Hamborg un ümto in de plattdüütsche Welt passeren deit un över wat in Kultur, Politik un Sport op Platt snackt warrt - dat kriegt Ji mit bi "Wi snackt Platt". Tö höörn is de Sennen jümmers an'n Sünndagmorgen üm halvig negen bi NDR 90,3 un bi NDR Schlager an'n Middewekenavend üm Klock söven. Un wokeen will, de kann "Wi snackt Platt" ok as Podcast abonneern. De kümmt jümmers al an'n Freedagnamiddag rut!