Wi snackt platt
Sonntag, 27. Oktober 2024, 08:30 bis
09:00 Uhr
Dütmal fiert wi mit den Oostfreesenvereen Hamborg vun 1899 e.V. Jubiläum, wi sünd op den Stückgootfrachter MS Bleichen to Besöök un wiel an’n Dunnersdag ja nich blots Reformatschoonsdag, sünnern ok Halloween is, geiht dat dütmal ok noch üm dat Thema Körbissen. Wi hebbt den Körbis Buern Manfred Brumund drapen. Togoderletzt wiest wi ok noch hen op de ne'e Utgaav vun "De Noorden op Platt".
De öllste Ostfreesenvereen op'e Welt
Wokeen al mal in’n Oostfreesland ween is, de weet, wo schöön dat dor is! Man nich blots, dat vele Lüüd un Familien ut Hamborg na de oostfreeschen Inseln Borkum, Norderney un Spiekeroog fohren un dor Urlaub maken doot, nee, dat gifft ok vele Oostfreesen, de dat na Hamborg trecken deit! Un dat nich blots, üm hier Urlaub to maken, man ok üm hier för en Tiet lang oder ok för jümmers to wahnen. Dat weer ok al an’t Enn vun’t 19 Johrhunnert so - un dorüm hett sik 1899 in Hamborg gors en egen Oostfreesenvereen grünnt! Bet hüüt is de aktiv is - un verleden Wekenenn, dor hett düsse Vereen sien 125-johrig Jubiläum fiert. Benita Brunnert weer för "Wi snackt Platt" mit dorbi.
MS Bleichen: Een Stück Hamborger Geschicht beleven
Wenn Ji Lust hebbt, mal wedder en vun Homborg siene wunnerbaren Museen to besöken, denn weer villicht Dünnersdag de richtige Dag dorför. Denn Dünnersdag, dor is Reformatschonsdag, also arbeitsfree, un ünner dat Motto “See for free” kann en sik an’n düssen Dag ganz vele staatliche, man ok private Museen för ümsünst amkieken. Tohooprekent 47 Museen maakt düt Johr mit – un ok mit dorbi is de Stückgootfrachter MS Bleichen in’n Hansa-Haven. Dat is op den Lütten Grasbrook. Bernhard Koch hett sik för Jo al vöraf mal mit en Ehrenamtlichen vun’e Crew vun’e MS Bleichen drapen.
De Körbis-König vun Tungeln
An‘n Dünnersdag, dor is ja nich blots Reformatschoonsdag, nee: dor is ok Halloween. Un wat Halloween angeiht, dor gifft dat ja een Gemöös, dat to düsse Tiet ganz besünners in Mood is - un dat sünd de Körbissen! Ganz vele ünnerscheedlich Sorten vun Körbissen gifft dat - un een kann dorut so veel maken: lütte Körbis-Geister to’n Bispeel, de en sik vör dat Huus stellen kann. Un nich toletzt: Eten kann een de mehrsten Kürbissen ja ok: wat as Supp, as Eenpottmahltiet oder ok as Koken. Anboot warrt Körbissen ok hier bi uns in Noorddüütschland – un dorüm hett Svenja Nanninga sik mal op den Padd maakt un en Körbis-Buern drapen. In de Neegte vun Ollenborg is Manfred Brummund tohuus un vun'e Lüüd in'e Gegend warrt he geern ok mal "De Körbis-König" nöömt.
De Noorden op Platt: Appel-Buer Karsten Palm ut dat Ole Land
“De Noorden op Platt”, dat is uns plattdüütsche Sennen in’t NDR Fernsehn. Eenmal in’n Maand gifft dat dor plattdüütsche Bidrääg ut den ganzen Noorden to sehn - un in uns Oktober-Utgaavgeiht dat dütmal üm dat Thema Landweertschopp. Ook mit dorbi is Appel-Buer Karsten Palm ut dat Ole Land. He hett uns mitnahm to de Appel-Oornt – un uns ok en beten wat mehr doröver vertellt, woans de Klimawannel siene Arbeit verännert hett.
Moderatschoon: Jan Wulf
Schlagwörter zu diesem Artikel
Plattdeutsch
