Wi snackt platt
Sonntag, 12. Februar 2023, 08:30 bis
09:00 Uhr
Dütmal geiht dat bi uns üm dat ne'e Theaterstück "Leveslocken" vun dat Amateurtheater Duvensteed. Denn hebbt wi noch twee plattdüütsche Geschichten för Jo, un wi maakt en lütten Utfloog hen na de Insel Börkum. Dree Lüchttoorns gifft dat dor, un wi hebbt en Mann drapen, de kennt sik richtig goot mit düsse dree Blinkfüer ut un hett sogar en Book doröver schreven."
"Leeveslocken" mit dat Amateurtheater Duvensteed
In‘n Nord-Oosten vun Hamborg, dor gifft dat en Bühn, wo se in jümehr Freetiet all mit anpacken doot – un bavento noch richtig goot Theater speelt! "Leeveslocken" so heet dat ne'e Stück vun dat Amateur-Theater Duvensteed. Vunaf Sünnavend, den 11. Februor, gifft dat dat in't Theater vun dat Max-Kramp-Huus an'n Duvensteder Markt 8 to beleven. "Leeveslocken", dat is en plattdüütsche Kummedie, wo dat nich blots üm de Leev gahn deit, de een wat vörsnackt. Nee, dat geiht ok üm de Locken, de een op’n Kopp hett - üm’e Hoor. Verleden Middeweken hebbt wi avends mal bi de General-Proov vun dat Stück vörbikeken.
To'n Valentinsdag: Leevde tüschen Suurkohl
An'n 14. Februor is Valentinsdag. Wat ok ümmer düsse Dag bi Jo tohuus för en Rull speelt: dat de Leev en feine Saak is, dat denkt wi woll all! Bi "Wi snackt Platt" hebbt wi en Geschicht vun Reimer Bull för Jo, de ganz goot to'n Valentinsdag passen deit. De Geschicht belücht de Leev twüschen junge Lüüd - un mit Suurkohl hett se ok to doon. Bi "Wi snackt Platt" warrt Ji gewohr, woans dat tohoop passen deit.
Börkum - De Insel mit dree Lüchttorns
Börkum liggt nich blots wiet buten in de Nordsee, dat Eiland is ok en bedüden Markeren för de Schippfahrt. Dree Lüchttorns hett de Insel, un düsse Blinkfüer speelt een wichtige Rull op Börkum. Een vun de Torns, de hett dat sogar mal op en Breefmark schafft. Een vun de Insulaner vun Börkum, Gregor Ulsamer, de weet so richtig goot Bescheed över de Lüchttorns. Sogar Böker hett he över jüm schreven - un "Wi snackt Platt"-Reporter Frank Jakobs hett em drapen.
Vertell doch mal: Dat Geföhl vun Tohuus
Wat is för Jo Tohuus? Woneem föhlt Ji Jo so richtig Tohuus? Un wat för Geschichten köönt Ji vun Joon Tohuus vertellen? Bi uns plattdüütsche Schrievakschoon „Vertell doch mal“ söökt wi, also de NDR tohoop mit Radio Bremen und dat Ohnsorg Theater de besten Kortgeschichten op Platt un twors schreven vun Jo – uns Tohörers. "Hör mal'n beten to"-Autor Helge Albrecht, de hett sik ok mal Gedanken to dat Thema tohuus maakt – un dat nich bi sik Tohuus an’n Schrievdisch, sünner: in’n Urlaub!
Moderatschoon: Jan Wulf
De Leder in uns Sennen:
- An't Enn vun de Welt - Santiano
- Born, wo de Wind herkümmt - Charly Beutin & Die Schreckschuss-Band
- Leev kaam un bliev in mien Huus - Knipp Gumbo
- An Land - Annie Heger
- Veel to oolt - Ina Müller
Schlagwörter zu diesem Artikel
Plattdeutsch
