Rinfullen

Ralf Spreckels hat sich ein neues, modisches Accessoire zugelegt und fällt damit gleich auf die Nase.

Rinfullen 1
Jungedi! Sowat vun „Rinfullen“ letzt!
Ik luer jo ümmer op Sünnschien.
Wenn`t sünnig warrn schall, steek ik de düre Sünnbrill in.
Ton Arger vun mien Fru. „Opspeleree“! seggt se.
Aver ik seh dor so Mega mit ut!
„Schatz, wat höllst du vun `n Spazeergang un achterran fein eten. Se: „Okay! Ik bestell ´n Disch.“

Ünnerwegens Brill ruut, opsetten!
Dat feine Restaurant good besett.
För uns is de Tweeerdisch in de Mitt frie.
Sitt wi as op `ne Bühn. Gor nich maal so slecht!
Ik schuuv mien coole Super-Retro-Sünnbrill hooch bit se in de Hoor fast sitt. Mien Schatz schüddelt den Kopp, winkt af. Spieskort kieken, töven, Smalltalk.

Opmaal - se is aver ok ümmer so liekut: „Nimm doch endlich maal de dusselige Brill af. Sühst ut as so`n hoochmödig Partylööw, de sik dickdoon mutt. De Lüüd kiekt al.“
Ik `n beten luter: „Pfff, laat se kieken. Argert sik, dat se sülm nich so`n kostbor Nesenfohrrad hebbt. De Brill blifft woans se sitt!“
Se winkt af.
Uns erste Gang ward anlefert: Hummersupp! Bevör ik tolang, laat ik mien Oogen noch maal över de annern Gäst gohn. Visentiert se uns?
Nu de Supp ansmecken. Mmmh! Bi`t wedder Röverbögen över den Teller fallt de in de Hoor fastklemmte Brill rünner un lannt in de Supp. Platsch! Unnn dat sprütt!

Rund-rüm kiekt gottloff kener na uns röver. Oder doch?

Weest wat mien Fru ganz dröög rööp: „Rinfullen!“
Un spöttsch: „Hoochmoot kümmt vör dat Fallen“.
Afwinken hett se vör Schreck vergeten.

Die Welt snackt Platt: Alles rund um das Thema Plattdeutsch:
https://www.ndr.de/plattdeutsch