Dree Saken

Annie Heger macht sich über drei ganz banale Haushaltsgegenstände Gedanken.

"Dree Saken"
Maal en echt banaal Thema vandaag. Achtung: Wat hebbt Duschkoppen, Kloschöttels un Fensters gemeensaam? Richtig, se sünd al dree Dinge, de wi elke Dag bruken. Hier un ok güntsied an d' anner Kant van de Atlantik in de USA! Man dat sünd ok dree Dinge, de in Amerika heel un dall anners sünd as bi us.

Duschkoppen sünd meist an de Wand fast angebrocht, also nich so as hier in Düütschland, dat an de Bruus en Slauch is un man dat Ding den in so en Holler an d' Wand faststeken kann. Ick find dat ja in de USA sowat van unlogisch un ick hebb mi al so männig Maal verrenkt, daarmit de Waterstrahl an all de wichtigen Steen van mien Körper ok ankummt.

Kloschöttels hebbt nienich en Upfangbecken, de sonöömt "Flachspüler" kennt een blots in Düütschland. Un um den to spölen mutt een en Henkel andaaldrücken, daar gifft dat meist keine Drückknöppe daarför. Un de Klospölen spöölt nich blot, nee de suugt ok noch to glieke Tiet un allens dreiht sik in Kringels, wat Du to de Welt uthebben wullt de Ofloop andaal. Dat amerikaansch WC is an Enn aver doch de düütsch Toilette ähnlich, daar hebb ik in Japan noch heel anner Saken beleevt. Daar hett de Pott nämlich Tirili und Tirilaa maakt as en Vögel, daarmit anner Minschen nich hören, wat Du daar … naja, aver Fensters in Düütschland sünd echt so richtig anners as in de USA.

Daar kannst Du dat Fenster bloot hoog un andaal schuven. Nich as us Fensters up Kipp of vull open to maken. Nich an to denken för en Düütschen sien leevstet Stoßlüften uptogeven. Wo kann't angahn, dat sik wat so unnerscheden deit, ofschoon wi in en globaaliseerten Welt leven. Un waarum finnen de dat so beter un wi dat even so?

Vellicht weer dat wat, dat wi as verscheden Kultuuren un Lannen noch an Enn wat vannanner lehren? Hm … an Enn is dat Thema vielleicht doch nich so banaal.

Hier gibt es mehr Plattdeutsch:

Podcast: Die plattdeutsche Morgenplauderei "Hör mal 'n beten to" als als kostenloses Audio-Abo für Ihren PC:
https://www.ndr.de/wellenord/podcast3096.html

Die Welt snackt Platt: Alles rund um das Thema Plattdeutsch:
https://www.ndr.de/plattdeutsch