Come together

Matthias Stührwoldt hat gern viele verschiedene Menschen aus ganz verschiedenen Ländern und Kulturen um sich.

"Come together"

Nülichs harrn wi een Konzert bi uns in Gaarn, open air. Tim Lothar, een Fründ vun mi, leevt in Norden vun Dänemark. He is an düssen Dag ut Dänemark komen, üm för uns to spelen. Uns Dochter Marie weer ok dor. An Dag dorna is se in de Schweiz trocken. Nich wegen dat Konzert; de Ümtoch weer all vörher plant.
Ik mach ja sone Geschichten. De een kümmt vun Norden; de annern föhrt in Süden, bi uns in Gaarn dropt se sik, un achteran schwarmt se all ut, in all de Richtungen, in de wiete Welt. Schön, jichtenswie, oder?
Noch as ik an düssen Avend op de Strohklapp seet un Tim siene Musik hör, möss ik denken an den eenen Dag in 2012. Warr ik nie vergeten. Uns Dochter Nora weer för een halvet Johr in Costa Rica, un mien Fru un ik hebbt ehr dor besöcht. Wi hebbt uns een Auto miet, sünd rümföhrt, un Nora hett uns Costa Rica wiest. As wi an de Pazifikküste weren, sünd wi anholen, weil wi wat eeten wullen. Nora hett achtern de Autodöör open mokt, un in den Ogenblick is een Fru op Rad vun achtern komen, möss utwieken un hett sik dorbi op den Appel packt. Ton Glück weer nich veel passeert, blots een poor Schürfwunden. Wi hebbt de Fru, de ut Kolumbien keem, ton Dokter föhrt – de, ji warrt dat nich glöven, Kanadier weer – dat Rad is heil bleven, un achteran weer allens wedder goot. För manche Lüüd weer dat een ganz normalen Verkehrsunfall, aver för mi is de Welt an düssen Dag een lütt Stück wieter tosamen rückt. Wi, dree Dütsche, harrn in Costa Rica, mit een koreanischet Auto een lütten Unfall mit eene Kolumbianerin un hebbt ehr nah een kanadischen Doktor bröcht. Ehrlich mol, geiht mehr Multikulti?
Achteran hebbt wi ehr föfftig Dollar geven un uns ton Avscheed anlächelt. Se meen, so goot harr se lang nich verdeent, un hett uns fraagt, wat wi nich nochmol een Unfall mit ehr hebben wullen, aver eenmol langt, hebbt wi to ehr seggt. Tja, denn nich, sä se, wink noch eenmol, un wech weer se. Mit een Grienen int Gesicht stünnen wi dor un keken ehr nah. Schön weer dat. Meist de ganze Welt keem tohopen an düssen hitten Dag op een Landstraat in Costa Rica. Un wi weren dorbi! Come together!

Hier gibt es mehr Plattdeutsch:
Podcast: Die plattdeutsche Morgenplauderei "Hör mal 'n beten to" als als kostenloses Audio-Abo für Ihren PC:
https://www.ndr.de/wellenord/podcast3096.html

Die Welt snackt Platt: Alles rund um das Thema Plattdeutsch:
https://www.ndr.de/plattdeutsch