You‘re welcome

Diesmal berichtet Gerd Spiekermann von seiner USA-Reise wieder aus seinem Hotelzimmer. In Boston beklagt er sich über die Tücken der modernen Bezahl-Technik.

"You're welcome"

Hi guys un Moin, Moin ut Boston. De Lüüd hier in Amerika, dat heff ick ja al'n paarmal seggt, dat sünd fründliche Minschen, de Di ook geern helpen doot. Un wenn Du denn mit dien 'Thank you very much' kümmst, denn heet dat foots: You're welcome. Up düütsch: Heff ick geern doon.

Nu schall een dat ja ook nich överdrieven un loten bi jede Gelegenheit anner Lüüd för sick arbeiten, over hier in Boston gifft dat een wunderbar Bus- un U-Bahnnetz un dorför bruukst du een Wekenkort un de gifft dat blots an'n Automaten mit Kreditkort un an so een Automaten sünd dusend Knööp un Slitzen, flimmert Lampen över een lüürlütt Display un snackt egolweg een Automotenstimm mit Di: 'Cannot read your creditcard' oder sowat. As wi us denn de eerste Wekenkort besorgen wullen, stunnen wi een beten verloorn an dissen Schiet-Automaten un drücken up de Knööp rum, as een Fro von de U-Bohn in ehr Uniform us to Hülp keen, de sick use Murkseree nich mehr mit ankieken kunn. Zack, Zack, 1,2,3 - un wi harrn use Wekenkort. Thank you. You’re welcome.

No ene Week mussen wi de Kort upfüllen - mit use Kreditkort, un wat wull dat Glück: de sülvige Fro harr wedder Deenst un stunn wedder an den Automoten. Ick ja glieks up ehr los un hool ehr de Kort vör de Nees. Please. Un se hett us wohrhaftig nochmol hulpen. Zack, Zack, 1,2,3. Thank you very much. You're great! Se schuddel mit‘n Kopp un miemel wat för sick hen, wat ick overs nich verstohn heff. Klung as 'Bloody‘ stupid'. Schietendösig. Doch nee, ick heff mi bestimmt verhöört. Sowat dröövt de gor nich seggen in ehr Uniform. Bye, bit to‘n neegsten Mol.

Hier gibt es mehr Plattdeutsch:

Podcast: Die plattdeutsche Morgenplauderei "Hör mal 'n beten to" als als kostenloses Audio-Abo für Ihren PC: https://www.ndr.de/wellenord/podcast3096.html

Die Welt snackt Platt: Alles rund um das Thema Plattdeutsch:
https://www.ndr.de/plattdeutsch