You’re welcome!

Gerd Spiekermann ist während seiner Amerikareise am westlichen Ufer des Missouri in St. Louis angekommen und ist von der Freundlichkeit der Menschen überwältigt.

You´re Welcome!

Hi guys! oder Moin, Moin ut St. Louis/Missouri.
Ick heff ja jümmers dacht, wi in Düütschland, wi weern enigermoten nette un höfliche Minschen, overs gegen de Amerikoners, vör all de hier in St. Louis, stoht wi ja in de Welt as een Holtpluck. Kümmst du hier in een Loden, Bohnhoff oder Lokal, denn heet dat foors: How are you doing? Wo geiht di dat? Un du seggst: Fine! And you? Un denn höörst du: I´m fine too. Mit geiht´t ook goot. Un denn eerst seggst du, wat du wullt. Hest du kregen, wat du wullst un du bedankst di, denn heet dat foors: You´re welcome. Weer mi een Vergnögen, heff ick geern för di doon
Hier kann dat ook angohn, dat een Autofohrer an een rode Ampel sien Schiev eenfach so dooldreiht un seggt: Have a nice day! Schönen Dag noch. Letzt güngen mien Fro un ick ´s ovends noch even um´t Huus to, as wi achter us höörn: Wi wish you a very beautiful evening! Een wunnerschönen Ovend noch. Stell di mol vör, di snackt bi us een von achtern up de Stroot eenfach so an: Ick wünsch di noch een wunnerschönen Ovend! Wat denkst du denn? Mol ehrlich! Du denkst, de hett se woll nich mehr all oder: Dat is een Överfall! Overs nee, dat bün ick, retour ut Amerika. Hey man! Un wenn ick denn noch in diene verdatterte Visage kieken do, denn segg ick: You´re welcome! Weer mi een Vergnögen!
Glöövst du nich? Ick ook nich!
Bye, bit to´n neegsten Mol.

Die Welt snackt Platt: Alles rund um das Thema Plattdeutsch:
https://www.ndr.de/plattdeutsch